ۇلتتىق مەرەكە مارتەبەسىن يەلەنگەن رەسپۋبليكا كۇنىنە وراي سىر بويىندا رەسمي ءىس-شارالارمەن بىرگە, قوعامدىق كەلىسىم مەن جالپىۇلتتىق بىرلىكتى ناسيحاتتاۋعا ارنالعان مادەني بۇقارالىق ءىس-شارالار, قايىرىمدىلىق جانە قورشاعان ورتانى قورعاۋعا باعىتتالعان ەكولوگيالىق اكتسيالار ۇيىمداستىرىلادى.
قالا مەن اۋدانداردا بىرقاتار الەۋمەتتىك قۇرىلىس نىساندارى اشىلادى. بالالار جىلى اياسىندا دەمەۋشىلەر قولداۋىمەن سالىنىپ جاتقان 80 ويىن الاڭىنىڭ 67-ءسى پايدالانۋعا بەرىلەدى. سونىمەن قاتار قالالىق اۆتوبۋس پاركى جاڭا كولىكتەرمەن تولىقتىرىلادى. جالپى 17-30 قازان ارالىعىندا جوسپارلانعان مەرەكەلىك ءىس-شارالار حالىقتىق سيپاتتا وتەدى.
مەرەكە قارساڭىندا جاڭاقورعان اۋدانىندا جاڭا دەمالىس پاركى ەل يگىلىگىنە بەرىلدى. وبلىس اكىمى نۇرلىبەك نالىباەۆ مادەني نىساندى ارالاپ, تۇرعىندار قۋانىشىنا ورتاقتاستى. وبلىس باسشىسى اۋدان حالقىمەن كەزدەسۋدە ۇلتتىق مەرەكە اياسىندا وڭىردە جۇزەگە اساتىن جاڭا باستامالار تۋرالى ايتتى.
– تۋعان جەرىنە تىلەۋلەس, ورتاق ىسكە جاناشىر كاسىپكەر ازاماتتاردىڭ قولداۋىمەن ايماعىمىزدا جاڭا نىساندار بوي كوتەرىپ كەلەدى. بۇگىن تۇرعىندار سەرۋەن قۇرىپ, وي سەرگىتىپ, بوي جازۋىنا مۇمكىندىك بەرەتىن جاڭا دەمالىس پاركى پايدالانىلۋعا بەرىلدى.
مۇنان بولەك, بالالار جىلىنا سىي رەتىندە قالا, اۋدانداردا 80 ويىن الاڭى سالىنىپ, باسىم بولىگى قولدانىسقا بەرىلىپ جاتىر. سونىڭ ىشىندە جاڭاقورعان اۋدانىندا 10 شاعىن سپورت الاڭقايى قازان ايىنىڭ سوڭىنا قاراي اشىلادى, دەدى ايماق باسشىسى.
وزگە اۋدان ورتالىقتارىندا كەزدەسە بەرمەيتىن پارك بەلگىلى كاسىپكەر مارلەن ىسقاقوۆ جەتەكشىلىك ەتەتىن «ازيمۋت-م» جاۋاپكەرشىلىگى شەكتەۋلى سەرىكتەستىگىنىڭ قارجىسى ەسەبىنەن سالىندى. جالپى, قۇنى 790 ملن تەڭگە بولاتىن پاركتە تۇرعىنداردىڭ كەشكى ۋاقىتتا تازا اۋامەن تىنىستاپ, ساۋىق قۇرىپ, سەرۋەندەۋىنە بار جاعداي جاسالعان. ءتۇرلى اتتراكتسيوندار, سۋبۇرقاق, جازعى ساحنا, بالالاردىڭ ويىن الاڭدارى اۋدان تۇرعىندارعا قىزمەت كورسەتەدى.
الداعى ۋاقىتتا پارك ىشىنەن بالالارعا ارنالعان كافە جانە نەكە سارايى سالىنباق.
دەمالىس پاركى الاڭىندا وبلىس اكىمى حالىقپەن كەزدەسۋ وتكىزدى. باسقوسۋ بارىسىندا نۇرلىبەك نالىباەۆ اۋدان جۇرتىن الاڭداتىپ كەلگەن ماسەلەلەر رەت-رەتىمەن شەشىمىن تاپقانىن تىلگە تيەك ەتىپ, اۋىل تۇرعىندارىنىڭ سۇراقتارىنا جاۋاپ بەردى.
– مەملەكەت باسشىسىنىڭ قولداۋىمەن وڭىردە اۋقىمدى جوبالاردى قولعا الدىق. از ۋاقىتتىڭ ىشىندە ءتۇرلى دەڭگەيدە ينۆەستيتسيا تارتىپ, قوماقتى جوبالارعا رەسپۋبليكادان قارجى اكەلىپ, كوكەيلەرىڭىزدە جۇرگەن كوپ ماسەلەنى شەشۋگە جول تاپتىق.
قازىرگى تاڭدا جاڭاقورعان اۋدانىنداعى وبلىستىق, اۋداندىق ماڭىزى بار جولدار ماسەلەسى شەشىمىن تاپتى دەۋگە بولادى. بۇل ماقساتقا 180 ملن تەڭگە قاراجات ءبولىندى. ەندى تەك اۋىلىشىلىك جولدار ماسەلەسى عانا قالىپ تۇر. ونى دا رەت-رەتىمەن جاسايمىز. ال ءبىلىم سالاسىنداعى «جايلى مەكتەپ» ۇلتتىق جوباسى شەڭبەرىندە 19,5 ملرد تەڭگەگە جاڭا مەكتەپتەر سالامىز. زاماناۋي ۇلگىدەگى 600 جانە 300 ورىندىق 2 مەكتەپ وسى جاڭاقورعاننان بوي كوتەرەدى, – دەدى وبلىس اكىمى.
بايكەنجە اۋىلى تۇرعىندارىنىڭ تىلەگىنە وراي جاڭا ءبىلىم وشاعىن تۇرعىزۋعا وبلىستىق بيۋدجەتتەن 100 ملن تەڭگە ءبولىنىپ, قۇرىلىسى كەلەسى جىلى باستالادى.
وبلىس ەلدى مەكەندەرىن گازداندىرۋ اياسىندا بيىل اۋدانداعى بىرلىك پەن قىراش اۋىلدارى «كوگىلدىر وتىنعا» قوسىلادى, وعان 800 ملن تەڭگەگە جۋىق قاراجات ءبولىندى. كەلەسى جىلى تاعى 5 ەلدى مەكەندى قوسۋ جوسپاردا تۇر.
قىزىلوردا