قازاق كۇرەسىنەن ەلباسى ن.ءا.نازارباەۆتىڭ جۇلدەسى ءۇشىن «قازاقستان بارىسى» ءتۋرنيرىنىڭ فينالىنا قاتىساتىن بارلىق بالۋاندار انىقتالدى. وسىعان وراي الماتى قالاسىنداعى رەسپۋبليكالىق سپورت كوللەدجىنىڭ عيماراتىندا ەلىمىزدىڭ ەڭ ۇزدىك 33 بالۋانىن تانىستىرۋ ءراسىمى ءوتتى.
الماتىداعى بالۋاندار شەرۋىنە سپورت جانە دەنەشىنىقتىرۋ ىستەرى جونىندەگى اگەنتتىگىنىڭ توراعاسى تاستانبەك ەسەنتاەۆ, «سامۇرىق-قازىنا» ۇلتتىق ءال-اۋقات قورى اق قوعاممەن بايلانىس دەپارتامەنتىنىڭ ديرەكتورى ايدار ماحمەتوۆ, «سك-استانا» كق باس ديرەكتورى ەرلان داريموۆ, «استانا» پكسك پرەزيدەنتىنىڭ مىندەتىن اتقارۋشى يۋري مەلنيچەنكو, رەسپۋبليكالىق قازاق كۇرەسى فەدەراتسياسىنىڭ باس حاتشىسى سارسەن قۇرانبەك, «KAZsport» تەلەارناسىنىڭ ديرەكتورى دياس احمەتشارىپ, «قازاقستان بارىسى» قازاق كۇرەسىن دامىتۋ قورى قامقورلىق كەڭەسىنىڭ توراعاسى ارمان شوراەۆ, «رەسپۋبليكالىق سپورت كوللەدجى» رمقك ديرەكتورى امالبەك تشانوۆ قاتىسىپ, ۇمىتكەرلەرگە ساتتىلىك پەن جەڭىس تىلەدى.
ەلىمىزدىڭ 16 ايماعىندا وتكەن رەسپۋبليكالىق دوداعا ىرىكتەۋ كەزەڭى ءوز مارەسىنە جەتكەنى ءمالىم. ۇيىمداستىرۋشىلاردىڭ ايتۋىنشا, ءتورتىنشى ماۋسىمداعى ىرىكتەۋ سىنى كوپتەگەن توسىن سىيلارعا تولى بولدى. اتاپ ايتساق, جارىستىڭ ارداگەر بالۋانى مۇرات كەڭتونوۆ (قوستاناي وبلىسى) پەن تۇڭعىش «بارىس» ۇلان رىسقۇل (قىزىلوردا وبلىسى) فينالدىق سىننان سىرت قالسا, جاراقاتىنا وراي ماكسيم گەربەر (قوستاناي وبلىسى) مەن ۆيكتور دەميانەنكو (الماتى قالاسى) تۋرنيرگە قاتىسا المايدى. ال تاجىريبەلى بالۋان شالقار جولامانوۆ ءبىر جىلدىق ۇزىلىستەن سوڭ جوباعا قايتا ورالدى.
ال «شىعىس بارىسى», 2013 جىلعى جەڭىمپاز ايبەك نۇعىماروۆ پەن «تاراز ارلانى» 2012 جىلعى چەمپيون بەيبىت ىستىباەۆ جوبانىڭ فينالدىق سىنىنا قاتارىنان ءتورتىنشى رەت جولداما الىپ وتىر.
تاعى ءبىر ايتا كەتەرلىك جاڭالىق, بيىلعى جارىسقا قاتىساتىن جاس بالۋاندار مەن بۇرىندارى كوپشىلىككە كەڭىنەن تانىلماعان جاڭا ەسىمدەر وتە كوپ. تانىستىرىلىم بارىسىندا «قازاقستان بارىسى» جوباسىنىڭ ءتورتىنشى ماۋسىمىنا ىرىكتەۋ كەزەڭى قورىتىندىلاندى.
ەستەرىڭىزگە سالا كەتەيىك, «قازاقستان بارىسى» جوباسىنىڭ بيىلعى فينالدىق سىنى 29 ماۋسىم كۇنى استاناداعى «سارىارقا» ۆەلوترەگىندە وتەدى. جەڭىمپازعا التىن بەلبەۋ, تايتۇياق جانە 150 مىڭ اقش دوللارى تابىستالادى.
قانات ەسكەندىر,
«ەگەمەن قازاقستان».
الماتى.