استانادا «نۇر وتان» پارتياسى توراعاسىنىڭ ءبىرىنشى ورىنباسارى باۋىرجان بايبەكتىڭ ليۆاننىڭ «ءال-مۋستاكبال» («بولاشاقتىڭ قوزعالىسى») پارتياسى پارلامەنتتىك توبىنىڭ جەتەكشىسى, ليۆاننىڭ بۇرىنعى پرەمەر-ءمينيسترى فۋاد سينيورامەن كەزدەسۋى ءوتتى.
ف.سينيورا باستاعان ليۆان دەلەگاتسياسى ەلىمىزگە وسى كۇندەرى قازاقستاننىڭ ەلورداسىندا ءوتىپ جاتقان VII استانا ەكونوميكالىق فورۋمىنا قاتىسۋ ساپارىمەن كەلىپ وتىر.
كەزدەسۋ بارىسىندا تاراپتار قازاقستان-ليۆان قارىم-قاتىناستارىنىڭ دامۋ ديناميكاسىن ءسوز ەتىپ, پارتياارالىق ءۇنقاتىسۋدى جولعا قويۋ قاجەتتىلىگىن اتاپ ءوتتى.
«ءبىز ءۇشىن تسەنتريستىك يدەياعا جاقىن ليبەرالدىق قۇندىلىقتاردى ۇستاناتىن «ءال-مۋستاكبال» پارتياسىمەن بايلانىستار ورناتۋ وتە ماڭىزدى. ءبىزدىڭ پارتيا وتكەن جىلعى جۇرگىزىلگەن رەبرەندينگتەن كەيىن تسەنتريستىك پارتياعا اينالدى. كۇنى كەشە عانا «حريستيان-دەموكراتيالىق وداعى» وكىلدەرىمەن, كونراد ادەناۋەر اتىنداعى قوردىڭ وكىلدەرىمەن كەزدەستىك. ءبىز ەۋروپا حالىقتىق پارتياسىمەن, قكپ, «سەننۋري», «ەدينايا روسسيا» جانە وزگە دە پارتيالارمەن تىعىز جۇمىس جاساۋدامىز. ەڭ باستى مىندەتىمىز – قوعامنىڭ سەنىمىن قالىپتاستىرۋ, ول ءبىزدىڭ بيلەۋشى پارتيا رەتىندەگى جاۋاپكەرشىلىگىمىز بولىپ تابىلادى», – دەپ اتاپ ءوتتى كەزدەسۋدە باۋىرجان بايبەك.
ءوز كەزەگىندە ليۆاننان كەلگەن قوناقتار پارتيانىڭ XV سەزىندە قابىلدانعان «نۇر وتان» دوكتريناسىنىڭ تاريحي ماڭىزدىلىعىن اتاپ ءوتتى.
«سىزدەردىڭ ەلدەرىڭىزدە پرەزيدەنتتەرىڭىزدىڭ ساياساتى ارقاسىندا بەيبىتشىلىك, تىنىشتىق پەن كەلىسىم ورناعان. ليۆان مەن قازاقستاننىڭ كوزقاراسى ۇقساس. ءبىزدەردىڭ تاۋەلسىزدىك, وتباسى, سالت-ءداستۇر, ەلدىڭ ەركىندىگى مەن بىرلىگىن ساقتاۋ سەكىلدى ۇقساس قۇندىلىقتارىمىز كوپ. بۇعان دەيىن ەكونوميكالىق جانە ساياسي ىنتىماقتاستىقتى ورناتتىق, ەندى وزگە سالالاردا ءوزارا قارىم-قاتىناستى دامىتۋىمىز كەرەك», – دەدى كەزدەسۋ بارىسىندا فۋاد سينيورا.
قازاقستان مەن ليۆان حالىقارالىق ومىردە كوپتەگەن ماڭىزدى پروبلەما بويىنشا ۇقساس ۇستانىمداردى ۇستانىپ, بۇۇ, يىۇ جانە وزگە دە حالىقارالىق جانە ايماقتىق ۇيىمدار شەڭبەرىندە ءوزارا قارىم-قاتىناس جاسايدى. 2012 جىلى ليۆان ەلىمىزدىڭ بۇۇ ادام قۇقىعى جونىندەگى كەڭەسىنە مۇشە بولۋ كانديداتۋراسىن, ەحرو-2017-ءنىڭ استانادا وتكىزىلۋىن, يىۇ جانىنداعى ازىق-ت ۇلىك قورىن قۇرۋدى قولداعان بولاتىن.
سونىمەن قاتار, كەشە باۋىرجان بايبەك ەۋروپا حالىقتىق پارتياسىنىڭ ۆيتسە-پرەزيدەنتى, ەۋروپا پارلامەنتىنىڭ دەپۋتاتى ماريو دەۆيدپەن كەزدەستى. كەزدەسۋ بارىسىندا تسەنتريستىك يدەولوگيانى ۇستاناتىن ەۋروپالىق پارتيالارمەن ىنتىماقتاستىقتى, سونداي-اق, «نۇر وتان» پارتياسىنىڭ كونسەرۆاتيۆتىك, ليبەرال-كونسەرۆاتيۆتىك يدەولوگيانى ۇستاناتىن وڭشىل ساياسي پارتيالار بىرلەستىگى –حالىقارالىق دەموكراتيالىق وداقپەن ىنتىماقتاستىقتى تەرەڭدەتۋ ماسەلەلەرى تالقىلاندى.