مەملەكەت باسشىسىنىڭ حالىقپەن كەزدەسۋدى جاڭا فورماتتا وتكىزۋ جونىندەگى تاپسىرماسىنا سايكەس وبلىس اكىمى نۇرلىبەك نالىباەۆ قىزىلوردا قالاسىنىڭ تۇرعىندارىمەن جۇزدەستى. جيىنعا پرەزيدەنت اكىمشىلىگىنىڭ مەملەكەتتىك ينسپەكتورى ەلدار كۇزەنباەۆ قاتىستى.
حالىقتى تولعاندىراتىن الەۋمەتتىك ماسەلەلەرگە باسا نازار اۋدارا وتىرىپ, قازاقستاندى جاڭعىرتۋ باعدارىنىڭ نەگىزگى باعىتتارى تۋرالى حاباردار ەتكەن مۇنداي كەزدەسۋلەر بارلىق اۋداندا ءوتتى. وبلىس ورتالىعى تۇرعىندارى الدىندا ايماق باسشىسى ءوڭىردى دامىتۋدىڭ پەرسپەكتيۆالىق قادامدارىنا توقتالىپ, ينفراقۇرىلىم دامىتۋ, قوعامدىق كولىك قىزمەتىن جاقسارتۋ باعىتىنداعى جاڭالىقتاردى ايتتى.
ينجەنەرلىك-كوممۋنالدىق ينفراقۇرىلىمدى دامىتۋ ەلدىڭ ءال-اۋقاتىن ارتتىرۋ كورسەتكىشىنىڭ ءبىرى ەكەنى داۋسىز. بۇل رەتتە قىزىلورداداعى اۋەجايدىڭ زاماناۋي سيپاتقا يە بولۋى كەرەكتىگى كوپتەن بەرى ايتىلىپ كەلە جاتقانى تاعى راس. الداعى ۋاقىتتا بولات وتەمۇراتوۆ قورىنىڭ دەمەۋشىلىگىمەن جاڭا اۋەجاي تەرمينالى سالىنادى. بيىل قىزىلوردا قالاسىنا ۇلكەن سىيىمدىلىقتاعى 150 جاڭا اۆتوبۋس الىنۋى بيلىكتىڭ قوعامدىق كولىك سالاسىنداعى شيەلەنىسكەن ماسەلەنى شەشۋگە كىرىسكەنىن كورسەتەدى.
– جاقىن كۇندەرى قىزىلوردا قالاسىندا وبلىستىق قان ورتالىعىنىڭ قۇرىلىسى باستالادى. كەلەر جىلى 100 كەلۋشىگە ارنالعان ەمحاناسى بار 300 توسەكتىك كوپبەيىندى اۋرۋحانا قۇرىلىسى سالىنادى. الدا وبلىس ورتالىعىنان نەكە سارايى, ونەر ورتالىعى بوي كوتەرمەك. «قازگەرمۇناي» كاسىپورنى قالانىڭ سول جاعالاۋىنان وقۋشىلار سارايىن سالىپ بەرۋدى ءوز مىندەتىنە الدى, – دەدى ايماق باسشىسى.
وبلىس باسشىسى وتكەن ايدا وڭىرىمىزگە ساپارلاعان ۇلتتىق ەكونوميكا جانە ەنەرگەتيكا مينيسترلەرى بىرقاتار ماڭىزدى جوباعا قولداۋ بىلدىرگەنىن دە ايتىپ ءوتتى. ءتيىستى ورىندار تاراپىنان ماقۇلدانعان باستامانىڭ ءبىرى – قۇنى 215 ملرد تەڭگە بولاتىن جىلۋ ەلەكتر ستانساسىنىڭ قۇرىلىسى. جوبا 2025 جىلى جۇزەگە اسادى.
وسى جىلى شاھاردى سۋمەن جابدىقتاۋ ءۇشىن «نۇرلى جەر» مەملەكەتتىك باعدارلاماسى اياسىندا 4 جوبا جانە وبلىستىق بيۋدجەت ەسەبىنەن 4 جوبا بويىنشا جۇمىس جۇرگىزىلۋدە.
قالانىڭ جاڭا تۇرعىن ايماعىن دامىتۋ ماقساتىندا از جىلدىڭ اياسىندا مىڭداعان تۇرعىننىڭ مەكەنىنە اينالعان سىرداريا وزەنىنىڭ سول جاعالاۋىندا «گۇل بۋلۆارىن» اباتتاندىرۋ ءۇشىن جوبالىق قۇجاتتار ازىرلەنۋدە.
كەزدەسۋدە گازداندىرۋ ماسەلەسى دە ايتىلدى. قالاعا قاراستى ماحامبەتوۆ ەلدى مەكەنىن گازداندىرۋ كەلەر جىلى اياقتالادى. قوسشىڭىراۋ اۋىلدىق وكرۋگى ورتالىعى اباي اۋىلىنا «كوگىلدىر وتىن» جەتكىزۋ ءۇشىن ەنەرگەتيكا مينيسترلىگىنە بيۋدجەتتىك ءوتىنىم ۇسىنىلعان.
باسقوسۋدا ءوڭىر باسشىسى وبلىس ورتالىعىنداعى جول ينفراقۇرىلىمىن دامىتۋ جۇمىستارىنا دا كەڭىنەن توقتالدى. قالادا 34 شاقىرىم جولدى جوندەۋگە 5,1 ملرد تەڭگە قارالىپ وتىر. مۇنان بولەك, 19 كوشەگە جاياۋ جۇرگىنشىلەر جولى توسەلىپ, قالانىڭ ورتالىق كوشەلەرى جارىق ديودتى شامدارمەن بەزەندىرىلەدى. ون ءۇش كوشەدە ورتاشا جوندەۋ جۇمىستارى ءجۇرىپ, وبلىستىق بيۋدجەت ەسەبىنەن قالانىڭ 10 كوشە قيىلىسىنا باعدارشامدار ورناتىلاتىن بولادى.
وسى جۇمىستاردى جۇيەلى ىسكە اسىرۋ ءۇشىن ارنايى ءىس-قيمىل جوسپارى بەكىتىلىپ, ونداعى ءاربىر جوبا قۇرىلىسى وبلىستىق ءماسليحاتتىڭ شەشىمىمەن بەكىتىلەتىن كەزەكتىلىك ءتىزىمى نەگىزىندە باستالادى.
باسقوسۋ سوڭىندا وبلىس اكىمى قالا تۇرعىندارىنىڭ ساۋالدارىنا جاۋاپ بەردى. قالالىقتار قوعامدىق كولىك, جول ساپاسىن جاقسارتۋ, اۋىز سۋ جەلىلەرىن تارتۋ جانە دەنساۋلىق ساقتاۋ سالاسىنا قاتىستى ساۋالدار قويدى.
كەزدەسۋدەن كەيىن وبلىس اكىمى نۇرلىبەك نالىباەۆ جازىلعان ازاماتتاردى جەكە قابىلداپ, ماسەلەلەرىن تىڭداپ, جاۋاپ بەردى.
قىزىلوردا وبلىسى