قىزىلورداداعى ك.قاراكوزوۆ اتىنداعى №235 ورتا مەكتەپتە «اتامەكەن» اتتى مۇراجاي بار. وتكەن عاسىرداعى سەكسەنىنشى جىلداردىڭ سوڭىنان بەرى جۇمىس ىستەپ كەلە جاتقان مۇراجاي مەكتەپتىڭ العاشقى ديرەكتورى راحات قۇلتانوۆتىڭ باستاماسىمەن اشىلعان.
ەلىمىزدەگى ءبىلىم بەرۋ ۇيىمدارىنداعى مۇراجايلار اراسىندا كوش باستاپ تۇرعان «اتامەكەن» 15 بولىمنەن تۇرادى. جاقىندا ءبىلىم وشاعىنا بارعان وبلىس اكىمىنىڭ ورىنباسارى بالجان شامەنوۆاعا مۇراجايدى ارداگەر ۇستاز كۇلاش الماتشاقىزى تانىستىرىپ, تاريحىنا كەڭىنەن توقتالدى.
جاستارعا ۇلتتىق قۇندىلىقتارىمىزدى دارىپتەپ, ەڭبەك پەن ەرلىكتىڭ ۇلگىسىن كورسەتكەن تۇلعالار ءومىرىن ۇلگى ەتەتىن, تۋعان جەردىڭ باي تاريحىمەن تانىستىراتىن «اتامەكەندە» جادىگەرلەر وتە كوپ. «اباي جانە الاش ارىستارى», «نۋميزماتيكا», «زەرگەرلىك بۇيىمدار», «ۇلتتىق قۇندىلىقتار», «كيەلى كيىز ءۇي», « ۇلى وتان سوعىسى ارداگەرلەرى», «بايقوڭىر», «ارال» بولىمدەرىنىڭ وقۋشىلار ءۇشىن ماڭىزى ەرەكشە. مەكتەپ ديرەكتورى روزا تاعىبەرگەنقىزىنىڭ ايتۋىنشا, بۇگىندە ءبىلىم وشاعىندا ساباقتى مۇراجايمەن بايلانىستىرا وتىرىپ وتكىزۋ داستۇرگە اينالعان.
مۇراجايدىڭ جۇمىسىمەن تانىسقان وبلىس اكىمىنىڭ ورىنباسارى جاس وركەندەرىمىزدىڭ پاتريوت تۇلعا بولىپ قالىپتاسۋى ءۇشىن مۇراجايداعى ۇلتتىق قۇندىلىقتار مەن سىر ەلىنەن شىققان داڭقتى تۇلعالاردىڭ ونەگەلى ءومىر جولدارى تۋرالى مالىمەتتەردىڭ ۇرپاق ءۇشىن الار ورنى ەرەكشە ەكەنىن ايتتى. مۇراجايدا جاسالىپ جاتقان ەڭبەكتەرگە العىس ايتىپ, تىلەكتەر تاقتاسىنا ءوزىنىڭ لەبىزىن جازىپ قالدىردى.
وسىدان 33 جىل بۇرىن الماتى قالاسىندا وتكەن «مەكتەپ مۇراجايلارى جانە سىنىپتان تىس جۇمىستار» اتتى رەسپۋبليكالىق بايقاۋدىڭ ءى ورىن يەگەرى اتانعان مۇراجاي 2018 جىلى تۇڭعىش پرەزيدەنت قورىنىڭ ۇيىمداستىرۋىمەن وتكەن الەۋمەتتىك جوبالار كونكۋرسىندا جەڭىمپاز اتانىپ, 1 ملن تەڭگە گرانت يەلەنگەن.
قىزىلوردا