كەزەكتى حالىققا جولداۋىندا مەملەكەت باسشىسى ۇكىمەتكە جەر زاڭناماسىن جەتىلدىرۋگە قاتىستى بىرنەشە تاپسىرمالار بەرگەنى بەلگىلى. بۇل ماسەلە بۇگىندە عىلىمي ورتادا كەڭىنەن تالقىلانۋدا. وسىعان وراي قازاق ۇلتتىق اگرارلىق ۋنيۆەرسيتەتىندە وڭىرلىك دامۋ مينيسترلىگىنىڭ ءبىرىنشى ۆيتسە-ءمينيسترى قايىربەك ءوسكەنباەۆتىڭ قاتىسۋىمەن جەر قاتىناستارى زاڭناماسىن جەتىلدىرۋ تۋرالى ارنايى ءماجىلىس بولىپ ءوتتى.
باسقوسۋدى قازۇاۋ رەكتورى, اكادەميك تىلەكتەس ەسپولوۆ اشىپ, مازمۇندى بايانداما جاسادى. رەكتور ءوز سوزىندە: «جەر ماسەلەسىنىڭ قاشان دا ءمانى مەن ماڭىزى جوعارى. ول ەشقاشاندا مەملەكەتىمىز بەن ۇكىمەتىمىزدىڭ كۇن تارتىبىنەن ءتۇسىپ كورگەن ەمەس. ونىڭ ەلىمىزدىڭ الدىندا الىپ وتىرعان كوكەيكەستى پروبلەمالارى دا از ەمەس. ونى وڭدى شەشۋ باعىتىندا قولعا الىنىپ جاتقان يگىلىكتى ءىس-شارالار دا كەزەك كۇتتىرمەيتىن مىندەتتەرگە اينالدى. سونىڭ ءبارى دە جەرگە بايلانىستى زاڭ شەڭبەرىندەگى زاڭدىلىقتارعا سايكەس اتقارىلىپ كەلەدى. قازاقستان ەكونوميكاسىنىڭ ەسەلەپ ارتۋىنا جەردىڭ بەرەر پايداسى كوپ. سوندىقتان الەۋمەتتىك جاعىنان حالىقتىڭ تالابىن قاناعاتتاندىرۋ ءۇشىن جەردى يگەرۋگە عىلىمي كوزقاراسپەن قاراۋىمىز قاجەت», – دەدى.
ەلباسى تاپسىرماسىنا وراي بۇگىندە وڭىرلىك دامۋ مينيسترلىگى تۇرعىن ءۇي قۇرىلىسىنىڭ, جەر تەلىمدەرىنىڭ, جەردى پايدالانۋ مەن قورعاۋعا مەملەكەتتىك باقىلاۋ مەحانيزمىن قالىپتاستىرۋ مەن جەتىلدىرۋ جۇمىستارىن جۇرگىزۋدە. قازىرگى كەزدە زامان اعىمىنا ساي جەردى پايدالانىپ يگەرۋدە, زاڭدىق تەتىكتەردى جەتىلدىرۋ ماڭىزدى بولىپ وتىر. مىسالى جەردى العان كەز كەلگەن مەنشىك يەسى, مەيلى ول بانك بولسىن نەمەسە جەكە تۇلعا بولسىن, سول جەردى ماقساتتى تۇردە پايدالانۋى قاجەت. وكىنىشكە قاراي كەيبىرەۋلەر ولاي ىستەمەي وتىر. سوندا اۋىل ادامدارى قايدا جۇمىسقا بارادى؟ اۋىل تۇرعىنى بۇل جەر ۋچاسكەسىندە جۇمىس ىستەي المايدى, ويتكەنى, ول جەر باسقاعا تيەسىلى, ال جەردىڭ يەسى ونى قاجەتىنە جاراتپاي وتىر. سول سەبەپتى وسى ماسەلە ءالى دە بولسا ءتيىستى ورىنداردا جان-جاقتى سارالانۋى قاجەت.
بۇل رەتتە اۋىلشارۋاشىلىعى ماماندارىنىڭ ءوز ايتارلارى بار. ويتكەنى, جەر تەك اگرارلىق سالانىڭ عانا اينالىساتىن ماسەلەسى ەمەس. سوندىقتان ەنگىزىلەتىن وزگەرىستەردىڭ مەملەكەت ءۇشىن ماڭىزى زور. وسى ورايدا وڭىرلىك دامۋ مينيسترلىگىنىڭ جەر كودەكسىنە ەنگىزىلمەك وزگەرىستەردى عالىمدارمەن كەڭەسە وتىرىپ تالقىلاۋى وتە ورىندى. قازاق ەجەلدەن جەر – حالىقتى اسىراۋشى دەيدى. سوندىقتان دا ءار جەر تەلىمى ونىڭ يەسىنە دە مەملەكەتكە دە پايدا اكەلۋى ءتيىس.
جيىن بارىسىندا وڭىرلىك دامۋ ءمينيسترىنىڭ ءبىرىنشى ۆيتسە-ءمينيسترى ق.وسكەنباەۆ, ر.ەلەشەۆ, س.كەنەنباەۆ, ا.ومباەۆ, ا.ساپاروۆ سىندى عىلىمي-زەرتتەۋ ينستيتۋتتارىنىڭ ديرەكتورلارى مەن ا.راۋ, م.الەكسەەۆا, ت.جولامانوۆ سەكىلدى قازۇاۋ عالىمدارى ءسوز سويلەپ, اتالعان ماسەلەگە وراي ۇسىنىس-پىكىرلەرىن ورتاعا سالدى.
قانات ەسكەندىر,
«ەگەمەن قازاقستان».