قازاقستان ۇلتتىق بانكى تەڭگەنىڭ ايىرباستاۋ باعامىمەن الىپساتارلىق ارەكەت جۇرگىزگەنى ءۇشىن بىرقاتار اقشا ايىرباستاۋ پۋنكتىنە ايىپپۇل سالىپ, ليتسەنزيالارىنىڭ قىزمەتىن توقتاتتى جانە ءوز فيليالىنىڭ ەكى قىزمەتكەرىن قىزمەتىنەن بوساتتى.
ۇلتتىق بانك الىپساتارلىق ارەكەتتەردى بولدىرماۋ ماقساتىندا قاۋلى قابىلداعان ەدى. سول قاۋلى شارتتارىنىڭ ساقتالۋى بويىنشا جوسپارلانباعان 391 تەكسەرۋ جۇرگىزىلىپ ءوتتى.
«قاۋلى شارتتارىن ساقتاماۋدىڭ انىقتالعان فاكتىلەرى بويىنشا ۇلتتىق بانكتىڭ ايماقتىق فيليالدارىمەن اكىمشىلىك قۇقىق بۇزۋشىلىق بويىنشا قىلمىستىق كودەكستىڭ 188-بابىنىڭ 3-تارماعىنا سايكەس 2,8 ملن. تەڭگە كولەمىندە ايىپپۇل سالىندى», دەلىنگەن ۇلتتىق بانك ءباسپاسوز قىزمەتىنىڭ ءمالىمدەمەسىندە.
سونىمەن قاتار, تەڭگەنىڭ ايىرباستاۋ باعامىمەن الىپساتارلىق ارەكەت جۇرگىزگەنى ءۇشىن بەس وكىلەتتى قۇرىلىمنىڭ شەتەل ۆاليۋتاسىن ايىرباستاۋ وپەراتسيالارى بويىنشا ليتسەنزيالارىنىڭ قىزمەتى توقتاتىلدى.
«قىزمەتتىك مىندەتتەرىنە لايىقسىز قاراعاندارى ءۇشىن ۇلتتىق بانك فيليالدارىنىڭ ەكى لاۋازىمدى قىزمەتكەرى قىزمەتىنەن بوساتىلدى», دەلىنگەن ۇلتتىق بانك ءباسپاسوز قىزمەتىنىڭ ءمالىمدەمەسىندە.