ورتالىق كوممۋنيكاتسيالار قىزمەتىنىڭ مىنبەرىنەن پارلامەنت ءماجىلىسى توراعاسىنىڭ ورىنباسارى سەرگەي دياچەنكو ەلباسىنىڭ جولداۋى تۋرالى ءوزىنىڭ ويلارىن ورتاعا سالىپ, جۋرناليستەرگە بريفينگ بەردى.
ورتالىق كوممۋنيكاتسيالار قىزمەتىنىڭ مىنبەرىنەن پارلامەنت ءماجىلىسى توراعاسىنىڭ ورىنباسارى سەرگەي دياچەنكو ەلباسىنىڭ جولداۋى تۋرالى ءوزىنىڭ ويلارىن ورتاعا سالىپ, جۋرناليستەرگە بريفينگ بەردى.
ءوز باسىم ەلباسىنىڭ جاڭا جولداۋىنان العان اسەرىمنەن ءالى كۇنگە اجىراي الماي ءجۇرمىن, دەپ باستادى ول ءوزىنىڭ ءسوزىن. بۇل – ءبىزدىڭ ءومىرىمىزدىڭ بارلىق سالاسىن قامتىعان, ستراتەگيالىق جاعىنان مازمۇندى, ناقتى قۇجات. وندا ەلىمىزدىڭ بارلىق: ەكونوميكالىق, ساياسي, الەۋمەتتىك جانە مادەني ومىرلەرى كورىنىس تاپقان. سونىمەن بىرگە, وندا ىستەيتىن جۇمىستارىمىزدىڭ باسىم باعىتتار ايقىن بەلگىلەنگەن.
مەن ەلباسى جولداۋى نەگىزىنەن ەكونوميكالىق ماسەلەلەردى قامتىعانىمەن, قازاقستاندىقتاردىڭ ءومىر ءسۇرۋ ساپاسىن ارتتىرۋدى كوزدەگەنىن اتاپ ايتقىم كەلەدى. سونىڭ ىشىندە ءبىلىم بەرۋ, دەنساۋلىق ساقتاۋ سالالارىنا ايرىقشا كوڭىل بولىنگەن. بۇل فاكتورلار ەلىمىزدىڭ باسەكەلەستىككە قابىلەتتىگىن ارتتىراتىن دۇنيەلەر بولعاندىقتان دا ەلباسىنىڭ ولارعا ايرىقشا نازار اۋدارعانى انىق. سوندىقتان پرەزيدەنت بۇل سالالاردى الەمنىڭ ەڭ جوعارى ستاندارتتارىنا تەڭەستىرۋ جونىندە ۇكىمەتتىڭ الدىنا مىندەتتەر قويىپ وتىر.
ودان ءارى شەشەن ەلباسىنىڭ «ماڭگىلىك ەل» جالپىۇلتتىق يدەياسى تۋرالى ءوزىنىڭ ويىن ساباقتادى. وندا بارلىق قازاقستاندىقتاردى بىرىكتىرەتىن قۇندىلىقتار ايتىلعان. بۇل ءبىزدىڭ ورتاق ماقساتقا نەگىزدەلگەن ورتاق تاعدىرىمىز, دەدى ول.
جولداۋدىڭ اۋقىمدىلىعى, تەرەڭدىلىگى سول, ونىڭ ونە بويىنان قازاقستاننىڭ الىس بولاشاقتى كوزدەگەن ستراتەگيالىق باعدارلارىمەن قاتار, ولارعا قول جەتكىزەتىن تاكتيكالىق مۇمكىندىكتەر دە كورسەتىلگەن. ولارعا جەتى بەسجىلدىقتىڭ اياسىندا قانداي كەزەڭدەردەن ءوتۋ ارقىلى جەتۋ جولدارى ايقىن بەلگىلەنگەن. ءسويتىپ, جوعارى دامىعان 30 ەلدىڭ قاتارىنا ەنۋ پەرسپەكتيۆاسى ايدان انىق كورسەتىلىپ تۇر. مىنە, سوندىقتان دا بارلىق قازاقستاندىقتار قولدارىنا قارىنداش الا وتىرىپ, جولداۋدى بارىنشا تياناقتى وقىپ, ونداعى ويلار مەن پىكىرلەردىڭ, ۇسىنىستار مەن تالاپتاردىڭ مازمۇنىنا تەرەڭ بويلاۋى قاجەت دەپ سانايمىن. ويتكەنى, ولار پارلامەنتكە دە, بارلىق مينيسترلىكتەر مەن ۆەدومستۆولارعا دا, قوعامدىق-ساياسي ينستيتۋتتارعا دا, ءاربىر ازاماتقا دا تىكەلەي قاتىستى, دەدى س.دياچەنكو.
ودان ءارى شەشەن: جولداۋدى ىسكە اسىرۋ ءۇشىن بارلىق قازاقستان قوعامى ءبىرتۇتاس بولىپ بىرىگىپ ىستەر اتقارۋى كەرەك. ارينە, ەلىمىزدى بارىنشا دامىعان 30 ەلدىڭ قاتارىنا ەنگىزۋ تۋرالى مىندەت قويۋ – ەلباسى نۇرسۇلتان نازارباەۆتىڭ ەرىك-جىگەرى مەن قاجىر-قايراتى بارىنشا مول, ستراتەگيالىق اقىل-ويى تەرەڭ, اسا كەڭ قۇلاشتى كوشباسشى ەكەندىگىن كورسەتەدى. ەلباسى الدىمىزداعى 15-17 جىلدى ەلدىڭ قارىشتى دامۋىنىڭ كەزەڭى دەپ وتىر. وسى ماقساتقا قول جەتكىزۋ ءۇشىن ءىجو-ءنىڭ جىل سايىنعى ءوسىمى 4 پايىزدان تومەندەمەۋى جانە سالىناتىن ينۆەستيتسيا كولەمى ءىجو-ءنىڭ 30 پايىزىنا جەتۋى قاجەتتىگى ايتىلدى. سونىمەن بىرگە, قازاقستاندىق ەكسپورتتاعى شيكىزاتتىق ەمەس ۇلەستىڭ كولەمىن 70 پايىزعا جەتكىزۋ, عىلىمدى قارجىلاندىرۋ كولەمىن ءىجو-ءنىڭ 3 پايىزىنان كەم قىلماۋ, ەنەرگيا شىعىنىنىڭ كولەمىن ەكى ەسە ازايتۋ, ال ەڭبەك ونىمدىلىگىن بەس ەسە ارتتىرۋ كوزدەلگەن, دەدى. ۆيتسە-سپيكەر وسىنداي بيىكتەردى باعىندىرۋ ءۇشىن, ارينە, بارلىق قازاقستاندىقتارعا جاتپاي-تۇرماي ەڭبەكتەنۋ كەرەكتىگىن جەتكىزدى. سوندىقتان ەلباسى ەشكىمگە دە جەڭىلدىك جاسالماي, جۇمىس ناتيجەسى بارلىق لاۋازىم يەلەرىنەن قاتاڭ سۇرالاتىنىن اتاپ كورسەتتى, دەدى ول.
ءسوزىنىڭ ءبىراز بولىگىن پارلامەنت سپيكەرىنىڭ ورىنباسارى تومەنگى پالاتانىڭ زاڭ شىعارۋ جۇمىستارىنا قاتىستى تالاپتارعا ارنادى. قاڭتاردىڭ 17-سىندە, ياعني جولداۋ جاريالانعان كۇنى-اق ءماجىلىس ءتوراعاسى ن.نىعماتۋليننىڭ ءتوراعالىعىمەن پالاتانىڭ بيۋرو وتىرىسى بولعانىن, وندا پارلامەنتاريلەردىڭ مىندەتتەرى ايقىندالعانىن جەتكىزدى. وندا ءبىز جولداۋدى ىسكە اسىرۋعا بايلانىستى زاڭنامالىق جۇمىستاردىڭ باسىمدىقتارىن تالقىلاپ, جاڭا جوسپاردىڭ نوبايىن جاسادىق. سونىڭ ىشىندە ەلدى يندۋستريالاندىرۋ, حالىقتى الەۋمەتتىك قورعاۋ, اگروكەشەن, ءبىلىم بەرۋ مەن عىلىم, دەنساۋلىق ساقتاۋ سالالارىن جەتىلدىرۋگە بايلانىستى زاڭ جوبالارىن ءازىرلەۋ جوسپارعا ەنگىزىلمەك, دەدى ول.
ءسوزىنىڭ سوڭىندا س.دياچەنكو جۋرناليستەردىڭ سۇراقتارىنا جاۋاپ بەردى.
جاقسىباي سامرات,
«ەگەمەن قازاقستان».