قىزىلوردا تاريحي-ولكەتانۋ مۋزەيىنىڭ اقمەشىت فيليالى قولعا العان «كيەلى مۇرا» جوباسى شەڭبەرىندە تاعى ءبىر قۇندى جادىگەر ەل يگىلىگىنە اينالعالى تۇر. وبلىستىق مۋزەي مەن «Qyzylorda» تەلەارناسى بىرلەسىپ جۇرگىزگەن زەرتتەۋ بارىسىندا سىر بويىنداعى بەلگىلى باتىرلاردىڭ ءبىرى – بۇقارباي ەستەكباي ۇلىنىڭ قىلىشى مەن ءمورى, شاشاقتى تۋى تۋرالى حابار ەفيرگە ازىرلەندى.
بۇقارباي ەستەكباي ۇلى 1812 جىلى جالاعاش وڭىرىندە دۇنيەگە كەلگەن. ەل ءۇشىن ات ارقاسىنان تۇسپەگەن باتىر قازاقتىڭ سوڭعى حانى كەنەسارىنىڭ قاسىنا ەرگەن سەرىكتەرىنىڭ ءبىرى رەتىندە دە بەلگىلى. جۇرتىن جاۋعا تالاتپاعان بۇقارباي كەيىننەن ەلدى ارىق قازدىرۋعا جۇمىلدىرىپ, اينالاسىنداعى اعايىندى ەگىنشىلىككە باۋلىعان.
باتىردىڭ ەرلىكتەرى سول كەزەڭدى سۋرەتتەيتىن جىرلاردا, تاريحشى ەرمۇقان بەكماحانوۆتىڭ زەرتتەۋلەرىندە, جازۋشى ءىلياس ەسەنبەرليننىڭ «قاھار» رومانىندا باياندالادى.
– ەل ىشىندە بۇرىنعى باتىر-بيلەردەن قالعان جادىگەرلەر ءالى دە كوپ. ءبىزدىڭ مىندەت – وسى قۇندىلىقتار جايلى دەرەك جيناپ, ونى كوپتىڭ يگىلىگىنە اينالدىرۋ. الدا باتىردىڭ قىلىشى, تۋى مەن ءمورىنىڭ كوشىرمەسىن جاساتىپ, مۋزەيگە قويۋدى جوسپارلاپ وتىرمىز, – دەيدى وبلىستىق تاريحي-ولكەتانۋ مۋزەيى اقمەشىت فيليالىنىڭ مەڭگەرۋشىسى كەنجە احمەتوۆا.
بۇل دۇنيەلەر باتىر اتىن يەلەنگەن اۋىلداعى جالاعاش اۋداندىق تاريحي-ولكەتانۋ مۋزەيىنىڭ فيليالى سانالاتىن تاريحي ۇيدە ساقتالىپ تۇر. قىلىشقا ساراپتاما جاساعان ماماندار بىلعارى قىندا ساقتالعاندىقتان, قارۋ بۇگىنگە باياعى قالپىندا جەتىپ وتىرعانىن ايتادى.
تاريحي ۇيگە باتىردىڭ قىلىشىن, نايزاسىنا ىلىنگەن شاشاقتى تۋى مەن كۇمىستەن جاسالعان ءمورىن ۇرپاقتارى تاپسىرىپتى.
قىزىلوردا