سول كۇنى زالعا جيىلعان جۇرتشىلىق ونەر كەشىنە عانا ەمەس, ادامداردىڭ ءبىر-بىرىنە جان جىلۋىن شاشىپ, قايىرىمدىلىق نۇرىن سىيلايتىن ادامگەرشىلىك كەشىنە كۋا بولدى. ول – كاسىبي انشىلەرمەن بىرگە مەملەكەتتىك قىزمەتكەرلەردىڭ 80-ءشى جىلدارداعى اندەردى شىرقاعان قايىرىمدىلىق شاراسى بولاتىن.
سول كۇنى زالعا جيىلعان جۇرتشىلىق ونەر كەشىنە عانا ەمەس, ادامداردىڭ ءبىر-بىرىنە جان جىلۋىن شاشىپ, قايىرىمدىلىق نۇرىن سىيلايتىن ادامگەرشىلىك كەشىنە كۋا بولدى. ول – كاسىبي انشىلەرمەن بىرگە مەملەكەتتىك قىزمەتكەرلەردىڭ 80-ءشى جىلدارداعى اندەردى شىرقاعان قايىرىمدىلىق شاراسى بولاتىن.
تاعدىردىڭ قيىندىعىن ەشكىم دە قالاپ المايدى, ال تاپ بولعان سوڭ كوتەرۋگە ماجبۇرلىك پايدا بولادى. نەبارى 37 جاستاعى ەلميرا ساپاروۆا دا وسى قيىندىقپەن بەتپە-بەت كەلگەن جان. اۆتوكولىك قاققان سوڭ سال بولىپ توسەككە تاڭىلعان جاس تاعدىردى ءۇش جىلدان بەرى جارى باعىپ-كۇتۋدە. جارىنا دەگەن جاناشىرلىقپەن جانە ەكى ۇلدىڭ اس-سۋىن دايىنداۋ ءۇشىن وتاعاسىنىڭ جشس-دەگى جۇمىسىنان قول ءۇزۋىن ءبىر جاعى قايسارلىق دەسەك, ەكىنشى جاعىنان ونىڭ ماتەريالدىق جەتىسپەۋشىلىككە اكەلىپ تىرەرى ايتپاسا دا تۇسىنىكتى. قازىر اي سايىن 50 مىڭ تەڭگەگە ءۇي جالداپ جۇرگەن وتباسىندا مي جاراقاتى, مي سۇيەگىنىڭ جابىق سىنىعى, اۋىر دارەجەدەگى سىنىق دياگنوزىمەن مۇگەدەك اتانعان ەلميرانى ەمدەتۋگە قارجى جوق. كوپتىڭ كومەگىمەن تاشكەنت قالاسىنا بارىپ كەلگەندەرىنە دە ءۇش ايعا جۋىقتاعان, وتا جاساتۋعا شاقىرعانىمەن, قارجىنىڭ جوقتىعى قولبايلاۋ.
جەرگىلىكتى «قازاقستان-اقتاۋ» تەلەارناسىنىڭ «ءۇمىت ساۋلەسى» باعدارلاماسى نەگىزىندە نازارعا ۇسىنىلعان بۇل اۋلەتكە جول ءۇستىندە ويلاماعان جەردە مۇگەدەك اتانعان ەلميرانىڭ شەتەلدە ەمدەلىپ, وتا جاساتىپ, ءوز اياعىنان باسۋىنا جاردەم بەرۋ ءۇشىن ماڭعىستاۋ وبلىستىق مادەنيەت باسقارماسى كومەك قولىن سوزدى. رەترو كەشتە 20 اۋىل, قالا اكىمدەرى, مەملەكەتتىك مەكەمەلەر باسشىلارى 20 كاسىبي انشىلەرمەن بىرلەسە ونەر كورسەتىپ, ءان شىرقادى. «ءاۋ دەمەيتىن قازاق جوق» دەگەن ءسوز بار, بىراق ءاۋ دەگەننىڭ ءبارى ءانشى ەمەس ەكەنى انىق. قىزمەت اراسىنان ۋاقىت تاۋىپ, الىس اۋىلداردان ارنايى اقتاۋعا كەلىپ شەنەۋنىكتەردىڭ ءان سالۋى تاۋەلسىز ەل ازاماتتارىنىڭ ءبىر-بىرىنە دەگەن قامقورلىعى, ءبىر-ءبىرىن قولتىقتان دەمەۋى دەپ تۇسىندىك. ەل تاۋەلسىزدىگىنىڭ 22 جىلدىعى اياسىندا, جاڭا جىل قارساڭىندا ەمدەلۋ ءۇشىن قارجىنى قايدان تابامىن دەپ قينالعان ەلميرا ءۇشىن العاش ۇيىمداستىرىلىپ وتىرعان ىزگى شارا كەلەشەكتە دە جالعاسىن تاپپاق.
– قارلىعاشتىڭ قاناتىمەن سۋ سەپكەنىندەي بولسا دا, جەتپەستى جالعاپ, تارىققاندى تاياپ, ازاماتتىق كورسەتكەن ۇيىمداستىرۋشىلارعا راحمەت ايتامىز. جينالعان قارجى وتاعا جەتىپ قالار دەپ وتىرمىز, ەندى تاشكەنتكە جول ءجۇرەتىن بولامىز, – دەيدى وتاعاسى ەلدوس.
گۇلايىم شىنتەمىرقىزى,
«ەگەمەن قازاقستان».
ماڭعىستاۋ وبلىسى.