ەرتەڭ, 22 جەلتوقسان كۇنى بەلارۋستىڭ استاناسى مينسك قالاسىندا قازاق كۇرەسىنەن وسىمەن ءتورتىنشى رەت وتەتىن الەم چەمپيوناتى باستالادى. بۇل تۋرالى www.egemen.kz ءتىلشىسى حابارلادى.
الەم چەمپيوناتى 22 جەلتوقسان كۇنىنە دەيىن جالعاسادى. وعان 30-دان استام ەلدەردىڭ قۇرامالارى قاتىسادى. قازىر بەلارۋسكە 29 ەلدىڭ وكىلدەرى تابان تىرەپ ۇلگەردى. ال جارىستىڭ ءوزى مينسكدەن 18 شاقىرىم جەردە ورنالاسقان «ستايكي» سپورتتىق بازاسىندا وتەدى. بۇل سپورت كەشەنىنىڭ كسرو كەزىندە وداقتىق دەڭگەيدەگى سپورت ورداسىنىڭ بولعانىن بىلەمىز. وعان كەڭەس وداعىنىڭ ءار تۇكپىرىنەن سپورتشىلار مەن جاتتىقتىرۋشىلار جينالىپ, وليمپيادا, الەم چەمپيوناتتارى سياقتى ۇلكەن دودالارعا دايىندالاتىن. قازىرگى كەزدە دە ول تمد كولەمىندە ماڭىزىن جويعان جوق. وعان دالەل رەتىندە ءتول كۇرەسىمىزدەن الەم چەمپيوناتىنىڭ «ستايكي «سپورتتىق بازاسىندا وتەتىنىن ايتۋعا بولادى. ال فينالدىق بەلدەسۋلەر مينسكدە وتەدى. وندا فينالعا جولداما العاندار ەركىن كۇرەستەن ءۇش دۇركىن وليمپادا چەمپيونى الەكساندر مەدۆەدتىڭ كۇرەس سارايىندا بەلدەسەدى. الاڭ يەلەرىن ايتپاعاندا, ءبىزدىڭ ەلدىڭ ۇلتتىق قۇراماسى مينسكىگە بارىنەن بۇرىن كەلدى. ءبىزدىڭ سپورت دەلەگاتسياسىمىز 19 جەلتوقسان كۇنى جەرگىلىكتى ۋاقىت بويىنشا تاڭعى ساعات 08.00-دە كەلىپ, «ستايكي» سپورتتىق بازاسىنا ورنالاستى. استانا مەن مينسكىنىڭ ساعات ايىرماشىلىعى 3 ساعات ەكەن. ياعني, استانانىڭ ۋاقىتى بەلارۋس استاناسىنان 3 ساعات الدا. سول سەبەپتى بالۋاندار كەلگەن كۇننەن بەرى جەرگىلىكتى ۋاقىتقا, اۋا-رايىنا بويارىن ۇيرەتىپ, جاتتىعۋلارىن جاساپ جاتىر. جالپى, ءبىزدىڭ ەلدەن الەم چەمپيوناتىنا 8 بالۋان كەلدى. سونىڭ بەسەۋى ءوز سالماقتارىندا كۇرەسسە, قالعان ۇشەۋى قوسالقى قۇرامدا قالىپ وتىر. بالۋانداردىڭ جارىسقا دايىندىعى جاقسى دەپ ايتۋعا بولادى. قوسالقى قۇرامداعى بالۋانداردىڭ ءوزى تاڭەرتەڭنەن ەرتە تۇرىپ, سپورتتىق بازانى اينالا جۇگىرىپ, جارىسقا قاتىسىپ قالامىز با دەگەن ۇمىتپەن دايىندالىپ جاتىر. سونىڭ ىشىندە وزىمىزبەن قوناق ءۇيدىڭ ءبىر نومەرىندە جاتقان 60 كيلو سالماقتاعى امانگەلدى ساتىبالدينوۆ كۇن سايىن سالماعىن قۋىپ, دايىندالۋدا. جارىسقا ۇلتتىق قۇراما جەڭىس بيتكوزوۆتىڭ باسشىلىعىمەن جاتتىعۋدا. ەندى كىلەمگە شىعاتىن بالۋنادارعا كەلسەك,ەڭ جەڭىل سالماقتا ابزال ارىستانبەكوۆ بەلدەسەدى. ونىڭ رەزەرۆيسى جاڭا ءبىز ايتقان امانگەلدى ساتىبالدينوۆ. كەلەسى 70 كيلو سالماقتا ەرلان ەستەك قاتىسادى. بۇل ەكەۋى جاقىندا تارازدا وتكەن «ەۋرازيا بارىسى» ءتۋرنيرىنىڭ جەڭىمپازى اتانعان بالۋاندار. 80 كيلو سالماقتا ەرسىن مۇحامەدجانوۆ كىلەمگە شىعادى. ودان كەيىن 90 كيلو سالماقتا مۇحيت تۇرسىنوۆ بەلدەسسە, ەڭ اۋىر سالماقتا بيىلعى «قازاقستان بارىسى» ايبەك نۇعىماروۆ كۇش سىناسادى. بۇل دوداعا بەلگىلى ءبىر سەبەپتەرمەن «ەۋرازيا بارىسى» بەيبىت ىستىباەۆ قاتىسپايدى. ول جارىستى جانكۇيەر رەتىندە عانا تاماشالايدى.
بۇگىن, 21 جەلتوقسان كۇنى «ستايكي «سپورتتىق بازاسىندا مانداتتىق كوميسسيانىڭ وتىرىسى مەن بالۋانداردىڭ سالماق ولشەۋ ءراسىمى ءوتتى. ال ەرتەڭ ىرىكتەۋ بەلدەسۋلەرى وتەدى. وندا قازاق كۇرەسىنەن باسقا دا جارىستار وتەدى دەپ جوسپارلانىپ وتىر. مىسالى, دۇنيەجۇزىلىك قازاق كۇرەسى فەدەراتسياسىنىڭ پرەزيدەنتى سەرىك توكيەۆتىڭ ايتۋىنشا, الەمدىك دودا كەزىندە قازاق كۇرەسىنەن بەلارۋس چەمپيوناتى, قىرعىزداردىڭ الىش كۇرەسىنەن جارىستار وتسە, ۋكرايندەر دە وزدەرىنىڭ ۇلتتىق كۇرەسىن كورسەتۋدى جوسپارلاپ قويىپتى. وسىدان كەيىن چەمپيونات كەزىندە دۇنيەجۇزىلىك قازاق كۇرەسى فەدەراتسياسىنىڭ وتىرىس ءوتىپ, وندا فەدەراتسيانىڭ پرەزيدەنتىن سايلاۋ, كەلەسى الەم چەمپيوناتى وتەتىن ەلدى انىقتاۋ مەن باسقا دا ماڭىزدى ماسەلەلەر قارالادى.
داستان كەنجالين.
دەرەككوز: egemen.kz.