سارسەنبى, 11 شىلدە 2012 7:16
8 شىلدەدە استانادا قالا اكىمدىگى مەن تۋريزم, دەنە تاربيەسى جانە سپورت باسقارماسىنىڭ ۇيىمداستىرۋىمەن قازاق كۇرەسىنەن «استانا قىرانى» جارىسى ءوتتى.
وسى كۇندەرى قىركۇيەكتە جالاۋىن كوتەرەتىن «قازاقستان بارىسى» ءتۋرنيرىنىڭ ىرىكتەۋ جارىستارى وڭىرلەردە ەكى ايدان بەرى جالعاسىپ كەلە جاتقانى بەلگىلى. جەكسەنبى كۇنى استانادا بالۋان شولاق بالۋاننىڭ ءىزىن باسقان استانالىقتار اراسىندا وتكەن باسەكەگە 78 بالۋان قاتىسىپ, سولاردىڭ 32-ءسى تۇيە بالۋانداردىڭ سايىسىنا جەتتى.
سارسەنبى, 11 شىلدە 2012 7:16
8 شىلدەدە استانادا قالا اكىمدىگى مەن تۋريزم, دەنە تاربيەسى جانە سپورت باسقارماسىنىڭ ۇيىمداستىرۋىمەن قازاق كۇرەسىنەن «استانا قىرانى» جارىسى ءوتتى.
وسى كۇندەرى قىركۇيەكتە جالاۋىن كوتەرەتىن «قازاقستان بارىسى» ءتۋرنيرىنىڭ ىرىكتەۋ جارىستارى وڭىرلەردە ەكى ايدان بەرى جالعاسىپ كەلە جاتقانى بەلگىلى. جەكسەنبى كۇنى استانادا بالۋان شولاق بالۋاننىڭ ءىزىن باسقان استانالىقتار اراسىندا وتكەن باسەكەگە 78 بالۋان قاتىسىپ, سولاردىڭ 32-ءسى تۇيە بالۋانداردىڭ سايىسىنا جەتتى.
جارىستىڭ اشىلۋ سالتاناتىنا ۇلتتىق سپورتتىڭ جاناشىرلارى – سپورت جانە دەنە تاربيەسى ىستەرى اگەنتتىگى توراعاسىنىڭ ورىنباسارى ەلسيار قاناعاتوۆ, «كتك» تەلەارناسىنىڭ باس ديرەكتورى, «قازاقستان بارىسى» جارىسى يدەياسىنىڭ اۆتورى ارمان شوراەۆ پەن قالالىق تۋريزم, دەنە تاربيەسى جانە سپورت باسقارماسىنىڭ باستىعى ايتالاپ قورعامباەۆ قاتىستى.
رەسمي بولىمىنەن كەيىن جارىس باستالىپ تا كەتتى. الدىمەن 1/16 سايىستارى ءوتتى. سپورتشىلار ءوز قارسىلاستارىن جەرەبە بويىنشا انىقتادى. تۇيە بالۋانداردىڭ سايىسىن باستاعان قازاقستان رەسپۋبليكاسىنا ەڭبەك سىڭىرگەن سپورت شەبەرى, ازيا چەمپيونى, ەكى دۇركىن الەم چەمپيونى عاني سەيدىلداەۆ العاشقى كەزەڭىن الىبەك بايسەنوۆپەن وتكىزىپ, ونى 19-شى سەكۋندتا-اق تازا جەڭدى. ال ەكىنشى اۋىر سالماقتاعى بالۋان قازاقستان رەسپۋبليكاسىنىڭ سپورت شەبەرى, قازاقستان مەن ازيا چەمپيونى اتانعان دارحان بيجانوۆ العاشقى كەزدەسۋىندە جامباس ۇپايمەن جەڭىسكە جەتتى. شيرەك فينالدا عاني سەيدىلداەۆ تولەگەن جەتپىسپاەۆپەن بوز كىلەمدە 23 سەكۋند قانا وتكىزىپ, ءبىرىنشى قولدانعان ادىستەن كەيىن تازا جەڭسە, جارىستىڭ بۇل كەزەڭىن دارحان بيجانوۆ تا ۋاقىتىنان بۇرىن وزىپ, 1/2 فينالعا جولداما الدى.
1/4 فينالعا جەتكەن ءتورت جۇپتىڭ ىشىندە سايىستىڭ ەڭ جاس قاتىسۋشىلارى دا ءبىر-بىرىمەن كەزدەستى. 20-جاسار ايبات سەيتەن (لاقاپ اتى – «قىپشاق») 18 جاسار الىبەك زەكەنوۆپەن (لاقاپ اتى – «تەمەش») بەلدەسىپ, جامباس ادىسىمەن جەڭگەن الىبەك جارتىلاي فينالعا شىقتى. مۇندا جاس جىگىت تاجىريبەلى دارحان بيجانوۆتان ۇتىلىپ, قولا جۇلدەگە يە بولدى. عاني سەيدىلداەۆ بولسا, فينالعا شىعۋ ءۇشىن ازات كەنجەبەكوۆتى تازا جەڭدى.
سونىمەن, ەكى دوس بالۋان قايتا فينالدا كەزدەستى. عاني دا, دارحان دا وزىنە ءبىر-ءبىر ۇپايدان تەك نەگىزگى ۋاقىتتىڭ اياقتالۋىنا جارتى مينۋت قالعاندا عانا قوسا الدى. قوسىمشا ۋاقىتتاعى بەلدەسۋدە جەڭىسكە جەتىپ, «استانا قىرانى» اتاعىنا بالۋان عاني سەيدىلداەۆ يە بولدى.
جەڭىمپازداردىڭ بارلىعىنا قوماقتى قارجىلاي سىياقى تارتىلدى. «جاۋ جۇرەك» لاقاپ اتىن جامىلعان عانيعا 1 ميلليون تەڭگە بەرىلىپ, يىعىنا التىنمەن قاپتالعان شاپان جابىلىپ, «التىن بەلبەۋ» تاعىلدى. ەكىنشى ورىندى يەلەنگەن «ەركە بالا» دارحان بيجانوۆقا 300 مىڭ تەڭگە قارجىلاي سىياقى بەرىلىپ, كۇمىسپەن قاپتالعان شاپان كيگىزىلدى. وسى ەكى بالۋان ەندى قىركۇيەكتە استانادا جالاۋىن كوتەرەتىن «قازاقستان بارىسى» ءدۇبىرلى دوداسىندا ەلوردانىڭ نامىسىن قورعاماقشى. ءۇشىنشى ورىنعا يە بولعان ازات كەنجەبەكوۆ پەن الىبەك زەكەنوۆكە ارقايسىسىنا ديپلوم مەن 100 مىڭ تەڭگەدەن سىياقى بەرىلدى.
– فينالدا قارسىلاسىم دارحاندى جاقسى تانيمىن, بىرگە جاتتىعىپ, ءبىر-ءبىرىمىزدىڭ قىلىقتارىمىزدى ابدەن بىلەمىز, – دەدى جارىستان كەيىن «استانا قىرانى» عاني سەيدىلداەۆ. – سوندىقتان بولار, سايىستى قوسىمشا ۋاقىتقا دەيىن جەتكىزگەنبىز. بۇعان دەيىنگى قارسىلاستارىمنان وڭاي وتسەم, فينالدا, ارينە, قيىنداۋ بولدى. قارسىلاسىم وتە مىقتى بالۋان. قازىر جەڭىسىمە وتە قۋانىشتىمىن. قازاقتىڭ ءتول سپورتىن قولداپ, جارىستى جوعارى دارەجەدە وتكىزگەن ۇيىمداستىرۋشىلارعا – قالالىق سپورت باسقارمامىزعا العىسىمدى بىلدىرگىم كەلىپ وتىر. ەندى, «قازاقستان بارىسى» جارىسىنا دايىندالامىز.
جارىس كورەرمەندەردىڭ كوڭىلدەرىنەن دە شىقتى. تارتىستى بەلدەسۋلەردى تاماشالاعان استانالىقتار مەن قالا قوناقتارى ۇيىمداستىرۋشىلار بەكىتكەن ۇتىس ويىنىنا دا قاتىسىپ, كوبى ۇيلەرىنە باعالى سىيلىقتارمەن قايتتى. ۇيالى تەلەفوندار, شاڭسورعىشتار, ميكروتولقىندى پەشتەر, جك-تەلەديدار, توڭازىتقىش, ۆەلوسيپەدتەر ويناتىلدى.
ەلىمىز ۇزدىك بالۋاندارىنىڭ باسىن قوساتىن «قازاقستان بارىسى» جارىسى استانا قالاسىندا قىركۇيەك ايىندا وتپەك.