سارسەنبى, 7 ناۋرىز 2012 8:01
مەن سىزدەرگە شيەتتەي 9 بالانى ايالاپ وسىرگەن انامىز باتەن جايلى ايتسام دەپ ەدىم. ءيا, ول كىسى مەيىرىمدى, جانى جىبەك جان ەدى. ەشقايسىمىزدىڭ ماڭدايىمىزدان شەرتپەي, تۋعان انامىزداي باۋىرىنا باستى. سىزدەرگە تۇسىنىكتى بولۋ ءۇشىن بۇل ءاڭگىمەنى باسىنان باستايىن. ءوز انامىز تىم ەرتە دۇنيە سالدى. اكەمىز ءمۇتاش سىزدىقوۆ ءسويتىپ, 9 بالامەن تاعدىردىڭ تالقىسىندا قالا بەردى. سول كەزدە ەڭ كىشىمىز نەبارى ءبىر جارىم جاستا عانا بولاتىن. بالانىڭ ۇلكەنى مەن. ۇلكەنى دەگەن اتىم عانا. ءايتپەسە, باستاۋىش سىنىپتا وقيتىنمىن. ءارينە, مەن شاما-شارقىم كەلگەنشە اكەمە سۇيەۋ بولۋعا تىرىستىم.
سارسەنبى, 7 ناۋرىز 2012 8:01
مەن سىزدەرگە شيەتتەي 9 بالانى ايالاپ وسىرگەن انامىز باتەن جايلى ايتسام دەپ ەدىم. ءيا, ول كىسى مەيىرىمدى, جانى جىبەك جان ەدى. ەشقايسىمىزدىڭ ماڭدايىمىزدان شەرتپەي, تۋعان انامىزداي باۋىرىنا باستى. سىزدەرگە تۇسىنىكتى بولۋ ءۇشىن بۇل ءاڭگىمەنى باسىنان باستايىن. ءوز انامىز تىم ەرتە دۇنيە سالدى. اكەمىز ءمۇتاش سىزدىقوۆ ءسويتىپ, 9 بالامەن تاعدىردىڭ تالقىسىندا قالا بەردى. سول كەزدە ەڭ كىشىمىز نەبارى ءبىر جارىم جاستا عانا بولاتىن. بالانىڭ ۇلكەنى مەن. ۇلكەنى دەگەن اتىم عانا. ءايتپەسە, باستاۋىش سىنىپتا وقيتىنمىن. ءارينە, مەن شاما-شارقىم كەلگەنشە اكەمە سۇيەۋ بولۋعا تىرىستىم. الايدا, ەكەۋمىزگە سونشاما بالانى باعىپ-قاعۋ, ءۇيدىڭ, سىرتتىڭ تىرلىگى وتە اۋىر ءتيدى. سونداي ءبىر قينالىستى ساتتە مەن بالا بولسام دا «اكە, ءسىز ۇيلەنسەڭىز قايتەدى» دەپپىن دە موينىنان قۇشاقتاپ جىلاپ جىبەرىپپىن. ول مەنىڭ قاتتى قينالىپ جۇرگەنىمدى ءتۇسىندى. كوپ ۇزاتپاي ول مۇلدە بەيتانىس ادامدى, ءباتەن شەشەمىزدى ۇيگە ەرتىپ كەلدى. ارينە, ءبىز وعان وڭايلىقپەن ۇيرەنىسە كەتكەنىمىز جوق. الايدا, ول باعىمىزعا قاراي وتە اقىلدى, كەڭپەيىل, مەيىرىمدى ادام بولىپ شىقتى. اكەم ەكەۋى قاشاندا ءبىر ءسوزدى بولدى. ءتىپتى ول بىرقاتار ماسەلەلەردى بالاسىنباي, ءبىزبەن كەڭەسىپ, اقىلداسىپ شەشەتىن ەدى. ءبىر سوزبەن ايتقاندا, 9 جەتىمەككە انا دا, پانا دا بولا ءبىلدى. ءبارىمىزدى جاداتىپ-ءجۇدەتپەي, قاتارىمىزدان كەم قىلماي, ۇلدى ۇياعا, قىزدى قياعا قوندىردى. اكەمىزبەن 43 جىل وتاسىپ, ونىڭ جانىنا جالاۋ بولا ءبىلدى. اكەم قايتقاننان كەيىن دە ول ءالدەكىم قۇساعان جوق. ءوزى ومىردەن قايتقانشا شاڭىراعىمىزدىڭ وتىن وشىرمەدى.
كەيىننەن ەستىپ جاتىرمىز عوي, سوناۋ جىلدارى ابىسىندارىنىڭ ءبىرى وعان ماقتانىپ, «ءبىزدىڭ بالامىز, مىنە, 10 پاشكە ءشاي بەرىپ جىبەردى» دەگەن كورىنەدى. سول كەزدە ءبىزدىڭ انامىز «مەنىڭ بالام وتكەندە سول ءشايدىڭ 50 پاشكەسىن جىبەرىپتى. مىنە, اۋىز تيىڭدەر» – دەپ الگى ابىسىندارىنا بالاسىنىڭ بەرىپ جىبەرگەن سالەمدەمەسى رەتىندە ءشاي ۇلەستىرگەن كورىنەدى. سوندا ءوز بالالارى ءۇشىن ونىڭ دا ماقتانعىسى كەلگەنى عوي… مەن ءۇيدىڭ ۇلكەنى بولعان سوڭ, تاربيەمە دە ايرىقشا كوڭىل ءبولىپ, ۇدايى اقىلىن ايتىپ وتىراتىن. موينىما باسى ارتىق جۇمىس جۇكتەپ, شارۋاعا كوپ جەكپەيتىن. ەكەۋمىز كەي كەزدە ءتۇننىڭ ءبىر ۋاعىنا دەيىن سىرلاسىپ وتىراتىنبىز. سول كۇندەردى مەن قالاي ۇمىتامىن. سەرىك ءىنىمىز قايتقان كەزدە انامنىڭ كۇيزەلگەنىن كورسەڭىز عوي. مەنەن كەيىنگى روزا دەگەن ءسىڭلىمدى دە ول وزگەشە جاقسى كورەتىن. ونىڭ قىزمەتى كوتەرىلگەن كەزدە انامىز قانداي قۋاندى دەسەڭىزشى. شەشەسى قايتىس بولعاندا ءبىر جارىم جاستاعى ءدانيا دىمكاستاۋ بولىپ ءوستى. ونى دا ايالاپ ءوسىردى. ول ءبىزدى ادام قاتارىنا قوسۋمەن قاتار ادال بولۋعا ءتاربيەلەدى. ارقايسىمىزدىڭ شاڭىراعىمىز شايقالماسىن دەپ تىلەدى. ەڭ ۇلكەنىمىز باۋىرجان ومبىداعى اۋىلشارۋاشىلىق ينستيتۋتىن بىتىرگەن بولسا, بەكتاي قاراعاندىنىڭ ساۋدا ينستيتۋتىن ءتامامدادى. ال مەن الەۋمەتتىك سالادا پەداگوگ-پسيحولوگ بولىپ ەڭبەك ەتتىم. سەرىك كوپ جىلدار بويى تەمىر جول قىزمەتكەرى بولىپ ىستەدى. داۋلەتاي مەن تيمۋر اۋىل شارۋاشىلىعى سالاسىندا ەڭبەك ەتسە, بولات قۇرىلىسشى-پروراب بولىپ جۇمىس ىستەدى. ءسويتىپ, ءبارىمىز انا ەڭبەگىن اقتاۋعا تىرىستىق.
اكەمىز قايتىس بولعاننان كەيىن دە ءبىز قاراشاڭىراقتا وتىرعان انامىزدى ساعىنىپ, ۇيگە ءجيى باراتىن ەدىك. ول دا ءبىزدىڭ كەلگەنىمىزگە جۇرەگى جارىلا قۋانىپ, بالالارىما دەپ ساقتاپ قويعان ءتاتتى-ءدامدىسىن الدىمىزعا توسىپ, ماڭدايىمىزدان ءيىسكەپ, مارە-سارە بولىپ قالاتىن. سول انامىز دۇنيە سالعاندا ءبىز دە قاتتى قايعىردىق. وسى كۇنى دە اكەمىز بەن ەكى انامىزعا دا دۇعا وقۋ ادەتىمىزگە اينالعان. ءيا, ەكى انامىز دەگەن ءسوزدى مەن جاڭىلىس ايتىپ وتىرعانىم جوق. مۇنداي مەيىرىمى مول دانا ايەلدى وگەي دەپ ايتۋعا اۋزىمىز بارمايدى.
ەندى وسى ءجايتتى نەگە ايتىپ وتىر دەگەنگە كەلسەك, وزگەلەرگە وسى ايتىلعان اڭگىمە وي سالسا كانە دەگەن نيەتپەن جازىپ وتىرمىن. ءيا, ءومىردىڭ بار ماعىناسى دا بىرەۋدى باقىتتى ەتۋ عوي. ول ءبىزدىڭ كوز جاسىمىزدى قۇرعاتىپ, شىن مانىندە 9 جەتىمەككە انا بولا ءبىلدى. شىركىن, وسىنداي مەيىربان ايەلدەر قاتارى كوپ بولسا, ەشكىم جەتىمدىك زارىن تارتپاس ەدى-اۋ!
ءمانسيا قۋاندىقوۆا.
اقمولا وبلىسى,
ستەپنوگور قالاسى.