جۇما, 13 ءساۋىر 2012 6:42
سولتۇستىك كورەيانىڭ كوسەمى كيم چەن ىن جاڭا لاۋازىمعا يە بولدى.
كحدر ەڭبەك پارتياسى ونى پارتيانىڭ ورتالىق اسكەري كوميتەتىنىڭ توراعاسى ەتىپ سايلادى. كەيبىر مالىمەتتەرگە قاراعاندا, كوميتەت شامامەن 1,1 ميلليون اسكەري قىزمەتشىنى قۇرايتىن سولتۇستىك كورەيا ارمياسىنا باقىلاۋ جاسايدى. كيم چەن ىننىڭ قازىردىڭ وزىندە كورەيا حالىق ارمياسىنىڭ باس كومانداشىسى دەگەن لاۋازىمى بار. بۇعان دەيىن وعان ەڭبەك پارتياسىنىڭ ءبىرىنشى حاتشىسى اتاعى بەرىلگەن بولاتىن. ءىس جۇزىندە ول ونىڭ باسشىسى بولىپ تابىلادى. كيم چەن ىندى كحدر-دا « ۇلى كوشباسشى» دەپ اتايدى.
جۇما, 13 ءساۋىر 2012 6:42
سولتۇستىك كورەيانىڭ كوسەمى كيم چەن ىن جاڭا لاۋازىمعا يە بولدى.
كحدر ەڭبەك پارتياسى ونى پارتيانىڭ ورتالىق اسكەري كوميتەتىنىڭ توراعاسى ەتىپ سايلادى. كەيبىر مالىمەتتەرگە قاراعاندا, كوميتەت شامامەن 1,1 ميلليون اسكەري قىزمەتشىنى قۇرايتىن سولتۇستىك كورەيا ارمياسىنا باقىلاۋ جاسايدى. كيم چەن ىننىڭ قازىردىڭ وزىندە كورەيا حالىق ارمياسىنىڭ باس كومانداشىسى دەگەن لاۋازىمى بار. بۇعان دەيىن وعان ەڭبەك پارتياسىنىڭ ءبىرىنشى حاتشىسى اتاعى بەرىلگەن بولاتىن. ءىس جۇزىندە ول ونىڭ باسشىسى بولىپ تابىلادى. كيم چەن ىندى كحدر-دا « ۇلى كوشباسشى» دەپ اتايدى.
مەكسيكاداعى جەر سىلكىنىسى
مەكسيكا جاعالاۋىندا وتە كۇشتى جەر سىلكىنىسى بولدى.
اقش-تىڭ گەولوگيالىق قىزمەتىنىڭ مالىمەتى بويىنشا, ءزىلزالا كۇشى 7,1 باللدى قۇراعان. جەر سىلكىنىسىنىڭ كىندىگى سونورا شتاتىنىڭ اۋماعىندا بولعان كورىنەدى. ازىرگە قيراعان عيماراتتار مەن قۇربان بولعاندار تۋرالى مالىمەتتەر جوق. وسى ورايدا, ۇستىمىزدەگى جىلدىڭ 24 ناۋرىزىندا مەكسيكانىڭ وڭتۇستىگىندە 7,4 باللدى قۇراعان جەر سىلكىنىسىنىڭ ورىن العانىن, سونىڭ سالدارىنان كەم دەگەندە 32 مىڭ ءۇيدىڭ زاقىمدانعانىن دا ايتا كەتۋ قاجەت.
سيريادا تىنىشتىق ورنادى
باتىس اقپارات اگەنتتىكتەرى 12 ءساۋىر كۇنى تاڭەرتەڭگىلىك اسكەر مەن ەرەۋىلشىلەر قاقتىعىسى نەعۇرلىم شيەلەنىستى بولعان ايماقتاردا تىنىشتىق بولعانىن حابارلاعان.
بۇل سيريالىق اسكەريلەردىڭ ەرەۋىلشىلەرگە قارسى بىرنەشە اپتا بويى جۇرگىزگەن بەلسەندى ءىس-قيمىلدارىنان كەيىنگى العاشقى ءۇزىلىس. جەكەلەگەن اتىستاردىڭ ورىن العاندىعى تۋرالى حابارلانعانىنا قاراماستان, بۇتىندەي العاندا قاقتىعىستار نەعۇرلىم كۇشتى بولعان اۋدانداردا تىنىشتىق ورناعان كورىنەدى. ەڭ ءىرى ەرەۋىلشى توپ بولىپ سانالاتىن سيريانىڭ ەرىكتى ارمياسى ۇكىمەت اسكەرلەرى وزدەرىنە شابۋىل جاساماسا, وسى ءبىتىمدى ودان ءارى ساقتايتىندارىن مالىمدەپ وتىر. بۇل بۇۇ-نىڭ ارنايى ەلشىسى كوفي انناننىڭ بەيبىت جوسپارىنىڭ جۇزەگە اسقانىن كورسەتەتىن ءتارىزدى.
ادۆوكاتتان باس تارتىپ وتىر
ليۆيانىڭ قازا تاپقان كوسەمى مۋاممار كاددافيدىڭ ۇلى سەيف ءال-يسلام سوتتا ءوزىن ادۆوكات كومەگىنسىز قورعاماق نيەتتە.
بۇل جونىندە تريپولي وكىمەتى مەن گااگاداعى حالىقارالىق قىلمىستىق سوتپەن بايلانىس ورناتۋشى جانە وسى ىسكە جاۋاپتى ليۆيالىق زاڭگەر احمەد ءال-دجيحاني مالىمدەگەن. ونىڭ ايتۋىنشا, سوڭعى بولعان كەزدەسۋدە كاددافيدىڭ ۇلى بۇعان زاڭدىق تۇرعىدا بىرنەشە ساۋالدار قويىپ, ودان كەيىن سوتتا ءوزىن دەربەس قورعايتىنىن جەتكىزگەن. ءال-ءدجيحانيدىڭ ادۆوكات جالداۋ تۋرالى كەڭەس بەرگەنىنە قاراماستان, ول ءوزىن «ميلوشەۆيچ سياقتى قورعاماق نيەتتە».
بانتيوعا تاستالعان بومبا
سۋداننىڭ اسكەري-اۋە كۇشتەرى كەشە وڭتۇستىك سۋدانداعى بانتيو قالاسىنا بىرنەشە رەت سوققىلار جاساعان.
وڭتۇستىك سۋدان ۇكىمەتى تاراتقان اقپاراتقا قاراعاندا, اسكەري-اۋە كۇشتەرى قالا ايماعىنا بەس بومبا تاستاعان كورىنەدى. كەيبىر مالىمەتتەر بويىنشا سۋدانعا اپاراتىن جولداعى كوپىر نىساناعا الىنعان. بومبالاۋعا دۋشار بولعان قالا ەكى مەملەكەت شەكاراسىنان 60 شاقىرىم قاشىقتىقتا ورنالاسقان. اۋە سوققىلارى سالدارىنان ەشكىم زارداپ شەكپەگەن كورىنەدى. حالىقارالىق باقىلاۋشىلار ەكى ەل اراسىنداعى شيەلەنىستىڭ ۇلعايىپ بارا جاتقانىن, ونىڭ سوڭىنىڭ اشىق قاقتىعىسقا سوقتىرۋى مۇمكىن ەكەنىن ايتۋدا.
ناتو جوسپارىن وزگەرتپەك ەمەس
ناتو اۋعانستانداعى قاۋىپسىزدىككە باقىلاۋ جاساۋدى ەل وكىمەتىنە 2014 جىلدىڭ سوڭىندا بەرۋ جوسپارىنان تايماق ەمەس.
ناتو-نىڭ باس حاتشىسى اندەرس فوگ راسمۋسسەن وسىنداي مالىمدەمە جاساعان. ءسوز رەتىندە اليانس باسشىسىنىڭ ەل پرەزيدەنتى حاميد كارزايمەن كەلىسسوزدەر جۇرگىزۋ ءۇشىن اۋعانستانعا كەلگەنىن ايتا كەتۋ قاجەت. كابۋل قالاسى تۇبىندەگى حالىقارالىق كۇشتەر بازاسىندا ءسوز سويلەگەن راسمۋسسەن 2013 جىلدىڭ ورتاسىنان باستاپ اۋعاندىق كۇشتەردىڭ ەلدە تەك قوسالقى ءرول عانا اتقارۋى ءتيىس ەكەنىن اتاپ كورسەتكەن. قازىرگى ۋاقىتتا اۋعانستان قاۋىپسىزدىك كۇشتەرىنىڭ سانى 330 مىڭ ادامدى قۇرايدى. جىل سوڭىنا دەيىن ول 352 مىڭعا جەتۋى ءتيىس.
گرەكيادا پارلامەنت سايلاۋى وتەدى
گرەكيا ۇكىمەتى مەرزىمىنەن تىس پارلامەنت سايلاۋىن ۇستىمىزدەگى جىلدىڭ 6 مامىرىنا بەلگىلەدى.
ەل پرەزيدەنتى كارولوس پاپۋلياس شىعارعان دەكرەتتە اتاپ كورسەتىلگەندەي, ول پارلامەنتتى تاراتىپ, مەرزىمىنەن تىس پارلامەنت سايلاۋىن تاعايىندايدى. وسى ورايدا گرەكيا ەكونوميكاسىنىڭ ايتارلىقتاي ەكونوميكالىق داعدارىستى باستان كەشىپ جاتقانىن ايتا كەتۋ كەرەك. وسى جىلدىڭ ناۋرىزىندا جەكە سەكتوردىڭ قولىندا بولعان مەملەكەتتىك وبليگاتسيالاردى ايىرباستاۋ تابىستى جۇزەگە اسقان سوڭ, حالىقارالىق ۆاليۋتا قورى افيناعا 130 ميلليون ەۋرودان استام تۇراقتاندىرۋ نەسيەسىن ءبولۋدى قۋاتتاعان بولاتىن.
قىتايداعى جول-كولىك اپاتى
قىتايدىڭ انحوي پروۆينتسياسى اۋماعىندا جولاۋشىلار اۆتوبۋسىنىڭ جۇك ماشيناسىمەن سوقتىعىسۋى سالدارىنان 24 ادام قازا تاپقان.
قۇتقارۋشىلار جاپىرىلىپ قالعان اۆتوموبيل استىنان شىعارىپ العان ەكى ادام اۋرۋحاناعا جەتكىزىلگەن. سونىمەن بىرگە, جۇك ماشيناسى جۇرگىزۋشىسىنىڭ اپات بولعان جەردە قازا تاپقانى دا راستالىپ وتىر. اۆتوبۋستا قانشا جولاۋشى بولعانى ازىرگە بەلگىسىز. وقيعا بولعان جەردە تەرگەۋ جۇمىستارى جۇرگىزىلۋدە. جول-كولىك اپاتى ورىن العان ماگيسترال انحوي پروۆينتسياسىن تسزيانسۋ جانە حەنان پروۆينتسيالارىمەن جالعاستىرادى. جول-كولىك وقيعالارى سالدارىنان جىل سايىن قىتايدا شامامەن 70 مىڭداي ادام قازا تاباتىن كورىنەدى.
ينتەرنەت ماتەريالدارى نەگىزىندە ازىرلەندى.