سەنبى, 8 جەلتوقسان 2012 7:17
اقش-قا جاۋاپ شارالار قولدانادى
اقش كونگرەسى «ماگنيتسكي ءتىزىمى» دەيتىنگە قاتىستى ارنايى زاڭ قابىلدادى. ول بويىنشا رەسەيدەگى ادام قۇقىن اياققا باسىپ وتىر دەپ سانالعان لاۋازىم يەلەرى قۇراما شتاتتار شەكاراسىنان ءارى اتتاپ باسا المايدى.
اقش-تىڭ بۇل قادامىنا رەسەي بىردەن جاۋاپ شارالار قابىلداناتىنىن مالىمدەدى. بۇل مالىمدەمە رەسەي سىرتقى ىستەر ءمينيسترى سەرگەي لاۆروۆتىڭ اۋزىمەن جاسالدى. ەندى ماسكەۋ دە ادام قۇقىن بۇزعان اقش ازاماتتارىن ەلگە ەش جاعدايدا كىرگىزبەيدى. ادام قۇقىنىڭ بۇزىلۋى قانداي ءىس-ارەكەتپەن ولشەنەتىنىن ەكى جاق تا ناقتىلامايدى.
سەنبى, 8 جەلتوقسان 2012 7:17
اقش-قا جاۋاپ شارالار قولدانادى
اقش كونگرەسى «ماگنيتسكي ءتىزىمى» دەيتىنگە قاتىستى ارنايى زاڭ قابىلدادى. ول بويىنشا رەسەيدەگى ادام قۇقىن اياققا باسىپ وتىر دەپ سانالعان لاۋازىم يەلەرى قۇراما شتاتتار شەكاراسىنان ءارى اتتاپ باسا المايدى.
اقش-تىڭ بۇل قادامىنا رەسەي بىردەن جاۋاپ شارالار قابىلداناتىنىن مالىمدەدى. بۇل مالىمدەمە رەسەي سىرتقى ىستەر ءمينيسترى سەرگەي لاۆروۆتىڭ اۋزىمەن جاسالدى. ەندى ماسكەۋ دە ادام قۇقىن بۇزعان اقش ازاماتتارىن ەلگە ەش جاعدايدا كىرگىزبەيدى. ادام قۇقىنىڭ بۇزىلۋى قانداي ءىس-ارەكەتپەن ولشەنەتىنىن ەكى جاق تا ناقتىلامايدى.
مىسىردىڭ مازاسى كەتىپ تۇر
ەگيپەت اراب رەسپۋبليكاسىنىڭ پرەزيدەنتى موحاممەد مۋرسي ەل حالقىنا تەلەۇندەۋمەن شىقتى. وندا ول وپپوزيتسيانى كەلىسسوز ۇستەلىنە وتىرۋعا شاقىردى. بىراق وپپوزيتسيا پرەزيدەنتتىڭ بۇل ۇسىنىسىن قابىلداماي تاستادى.
ءسويتىپ, مىسىردا تايتالاس جالعاسىپ جاتىر. ءمۋرسيدى جاقتاۋشىلار مەن وپپوزيتسيا اراسىنداعى قاقتىعىس سالدارىنان قازا تاپقاندار دا بار. 600-دەن استام ادام ءتۇرلى دەنە جاراقاتىن العان. ەل استاناسى – كاير قالاسىندا وپپوزيتسياشىلار «مۇسىلمان-باۋىرلار» پارتياسىنىڭ شتاب-پاتەرىنە وت قويدى. بۇل شاراعا شامامەن 200 ادام قاتىسقان. ەلدەگى قاقتىعىستار 22 قاراشادا مۋرسي كونستيتۋتسياعا وزىنە كەڭ وكىلەتتىكتەر بەرەتىن تۇزەتۋلەر ەنگىزبەك بولعان كەزدە باستالعانى بەلگىلى.
تايفۋن قۇرباندارى كوبەيىپ بارادى
ءفيليپپيننىڭ وڭتۇستىگىندەگى مينداناو ارالىنداعى تايفۋننان كوز جۇمعان ادامدار سانى 420-عا جەتتى. كەم دەگەندە تاعى 400 ادام ءىز-ءتۇزسىز جوعالعاندار قاتارىندا. ال اعر دەرەكتەرى بويىنشا, قازا تاپقاندار سانى 500 ادامعا جەتىپ وتىر.
«بوفا» تايفۋنى فيليپپين جاعالاۋلارىنا 4 جەلتوقسان كۇنى ەرتەڭگىسىن جەتكەن بولاتىن. ەل باسشىلىعى ەۆاكۋاتسيا جاريالاسا, ول 56 مىڭنان استام ادامدى قامتىعان ەدى. توپان سۋ سالدارىنان بارىنەن دە نيۋ باتاان قالاسىنىڭ تۇرعىندارى كوپ زارداپ شەكتى. وسىدان ءبىر جىل بۇرىن اتالعان ارالداعى سۋ تاسقىنىنان 1200 ادام قۇربان بولعان ەدى.
مەدۆەدەۆ وتستاۆكاعا كەتە مە؟
دميتري مەدۆەدەۆتىڭ ۇكىمەتى 2013 جىلدىڭ ناۋرىز-ءساۋىر ايلارىندا وتستاۆكاعا كەتەدى. مۇنداي بولجامدى جاھاندانۋ پروبلەمالارى ينستيتۋتى جاسادى. ونىڭ سەبەبى, رەسەيدىڭ بيلىگىندەگى «اعايىندار» اراسىنداعى سوعىس, دەيدى ميحايل دەلياگيننىڭ ينستيتۋتىنداعىلار.
ۇكىمەت وتستاۆكاسىن جەدەلدەتەتىن قوسىمشا فاكتور رەتىندە بۇرىنعى اۋىل شارۋاشىلىعى ءمينيسترى ەلەنا سكرىننيك ءتوڭىرەگىندەگى جانجال اتالادى. ول مەدۆەدەۆ سەرىكتەرىنىڭ ءبىرى سانالادى. وتكەن قاراشا ايىندا «روسسيا 1» تەلەارناسى سكرىننيكتىڭ «روساگروليزينگ» كومپانياسىنداعى ۇرلىققا ىقتيمال قاتىستىلىعى تۋرالى ماتەريال كورسەتكەن بولاتىن.
ساياساتكەر ءۇي قاماعىنا الىندى
بىشكەكتە سوت وپپوزيتسيونەر نۇرلان موتۋەۆكە جازا قولداندى. ول جاقىندا ايەل زورلادى دەگەن كۇدىكپەن قاماۋعا الىنعان بولاتىن. ەندى, سوت شەشىمى بويىنشا, موتۋەۆ ەكى اي بويى ءۇي قاماعىندا ۇستالماقشى.
قىرعىز ساياساتكەرى 5 جەلتوقسان كۇنى ۇستالعان ەدى. بۇعان وسىدان ءبىر كۇن بۇرىن 21 جاستاعى بىشكەك تۇرعىنىنىڭ ميليتسياعا جازعان ارىزى سەبەپ بولدى. بيكەشتىڭ سوزىنە قاراعاندا, ول موتۋەۆپەن جاقىندا تانىسىپتى. ساياساتكەر ونى بىردەن ۇيىنە شاقىرىپ, زورلىق كورسەتكەن. ەندى وسى ءىس بويىنشا قىلمىستىق ءىس قوزعالىپ, زارداپ شەگۋشىگە دەنە زاقىمى بار-جوعىن انىقتاۋ ءۇشىن ساراپتاما تاعايىندالعان.
اقىرزامان تۋرالى جاريالادى
اۆستراليا پرەمەر-ءمينيسترى دجۋليا گيللارد ەل ازاماتتارىنا ۇندەۋ جازىپ, وندا جاقىندا اقىرزامان ورنايتىنىن جاريالاعان. «مەنىڭ قىمباتتى وتانداستارىم! اقىرزامان شىن مانىندە كەلە جاتىر. [...] مايا ۇندىستەرىنىڭ كۇنتىزبەسى ءدال بولىپ شىقتى», دەلىنگەن گيللاردتىڭ ۇندەۋىندە.
«سوڭعى سوققى قانداي بولاتىنى ماڭىزدى ەمەس. ول ميدى ىشتەي جەيتىن زومبي بولا ما, تامۇقتان شابۋىلدايتىن ازازىلدەر بولا ما, ءبارىبىر. ەڭ باستىسى, مەن ارقاشان سىزدەرمەن بىرگەمىن. اقىر اياعىنا دەيىن», دەپ ءسوز بەرىپتى گيللارد. اۆستراليالىقتار جەرگىلىكتى راديوستانسالاردىڭ بىرىندە ەفيرگە شىعارىلعان روليككە ءارتۇرلى كوزقاراس تانىتقان.
قىسقا قايىرىپ ايتقاندا:
اۆستراليا پوليتسياسى چيليدەن جەتكىزىلگەن كوكايننىڭ اسا ءىرى پارتياسىن تاركىلەدى. چيليدەن, تۇتاستاي العاندا, جالپى قۇنى 81 ميلليون دوللار تۇراتىن 135 كيلو ەسىرتكى جەتكىزىلسە كەرەك.
جاپونيانىڭ حونسيۋ ارالدارى جاعالاۋلارىندا ماگنيتۋداسى 7,3 بالل بولاتىن جەر سىلكىنىسى تىركەلدى. دۇمپۋلەر توكيو قالاسىندا دا قاتتى سەزىلگەن. بيىكتىگى ءارى كەتكەندە 1 مەتر بولاتىن تسۋنامي كۇتىلىپ وتىر.
قىرعىزستان سىرتقى ىستەر مينيسترلىگى جەرگىلىكتى بازارلاردا ساۋدا جاسايتىن شەتەل ازاماتتارىنا تىيىم سالۋ كەرەك دەگەن ۇسىنىس ءبىلدىردى. مۇنداعى ماقسات جەرگىلىكتى كاسىپكەرلەردىڭ مۇددەسىن قورعاۋ كورىنەدى.
تۇركىمەنستاندا اداسىپ كەتىپ شەكارا بۇزعان قازاقستاندىق ءتورت كوشى-قون پوليتسياسىنىڭ قىزمەتكەرى مەن ءۇش اڭشىعا ۇكىم شىعارىلدى. تۇركىمەنباشي قالالىق سوتى ۇستالعانداردى قاتاڭ رەجىمدەگى كولونيادا جەتى جىلعا باس بوستاندىقتارىنان ايىردى.
رەسەيدىڭ تۆەر وبلىسىنىڭ بۇرىنعى گۋبەرناتورى دميتري زەلەنين تراكتور جۇرگىزۋشىسىنىڭ كۋالىگىن الدى. ول اتالعان وبلىستى 2003 جىل مەن 2011 جىل ارالىعىندا باسقارعان بولاتىن. ەندى د.زەلەنين اۋىل شارۋاشىلىعىمەن اينالىسپاق.
ينتەرنەت ماتەريالدارى نەگىزىندە ازىرلەندى