كەشە ەلىمىزدىڭ ورتالىق سايلاۋ كوميسسياسىنىڭ ءتوراعاسى قۋاندىق تۇرعانقۇلوۆ جۋرناليستەرگە ارنالعان بريفينگتە پارلامەنت سەناتى دەپۋتاتتارى سايلاۋىنداعى داۋىس بەرۋ ۇدەرىسىنىڭ باستاپقى قورىتىندىلارىن جاريالادى.
«بۇگىن قازاقستان پرەزيدەنتىنىڭ جارلىعىنا سايكەس, ەلىمىزدىڭ بارلىق وبلىستارىندا, سونداي-اق, استانا جانە الماتى قالالارىندا پارلامەنت سەناتىنىڭ 16 دەپۋتاتىنىڭ سايلاۋى بولىپ ءوتتى. داۋىس بەرۋ 39 كانديداتۋرا بويىنشا جۇرگىزىلدى. بارلىق وڭىرلەردە سايلاۋ وتكىزىلگەن دەپ تانىلدى. بارلىق جەردە سايلاۋدىڭ ناتيجەلەرى ءبىرىنشى تۋردا ايقىندالدى», دەدى قۋاندىق تۇرعانقۇلوۆ.
ول ءوز سوزىندە وبلىستىق, استانا جانە الماتى قالالىق سايلاۋ كوميسسيالارىنىڭ جەدەل مالىمەتتەرى بويىنشا, تاڭداۋشىلار تىزىمدەرىنە ەنگىزىلگەن ءماسليحاتتاردىڭ 3283 دەپۋتاتىنىڭ داۋىس بەرۋگە 96,6 پايىزى قاتىسقانىنا توقتالىپ ءوتتى. سونداي-اق, ول الدىن الا بەكىتىلگەن مالىمەتتەرگە سايكەس, داۋىس بەرۋگە قاتىسقان تاڭداۋشىلاردىڭ باسىم كوپشىلىك داۋىسىن العان ازاماتتاردىڭ اتى-ءجونىن جاريا ەتتى. ولار: استانا قالاسى بويىنشا ۆلاديمير رەدكوكاشين (91,7), الماتى قالاسى بويىنشا اقان بيجانوۆ (88,2), اقمولا وبلىسى بويىنشا جابال ەرعاليەۆ (84,6), اقتوبە وبلىسى بويىنشا ەلەۋسىن ساعىندىقوۆ (90,8), الماتى وبلىسى بويىنشا لاززات تۇرلاشوۆ (94,3), اتىراۋ وبلىسى بويىنشا قايرات يششانوۆ (66,4), شىعىس قازاقستان وبلىسى بويىنشا تالعاتبەك ءابايدىلدين (89,7), جامبىل وبلىسى بويىنشا ەرتارعىن استاەۆ (90,8), باتىس قازاقستان وبلىسى بويىنشا راشيت احمەتوۆ (86,9), قاراعاندى وبلىسى بويىنشا سەرىك اقىلباي (94,6) , قوستاناي وبلىسى بويىنشا جەڭىس نۇرعاليەۆ (92,4), قىزىلوردا وبلىسى بويىنشا مۇرات مۇحامەدوۆ (81,3), ماڭعىستاۋ وبلىسى بويىنشا باقتىباي شەلپەكوۆ (98,2), پاۆلودار وبلىسى بويىنشا اسحات كۇزەكوۆ (91,3), سولتۇستىك قازاقستان وبلىسى بويىنشا سامات ەسكەندىروۆ (82,5), وڭتۇستىك قازاقستان وبلىسى بويىنشا قۋانىش ايتاحانوۆ (81,9).
بريفينگ بارىسىندا وسك توراعاسى داۋىس بەرۋ جۇيەسىنىڭ, سونداي-اق, بارلىق سايلاۋ راسىمدەرىنىڭ قالىپتى ىسكەرلىك جاعدايدا, سايلاۋ زاڭناماسىنا سايكەس وتكىزىلگەنىن جەتكىزدى.
«ەلىمىزدىڭ بارلىق وڭىرلەرىندە داۋىس بەرۋ, داۋىستاردى ساناۋ قورىتىندىلارىن شىعارۋ بارىسىن بايقاۋدى 52 حالىقارالىق بايقاۋشى, 10 شەتەلدىك باق وكىلى, 99 كانديداتتىڭ سەنىم بىلدىرىلگەن ادامدارى, ەلىمىزدىڭ ساياسي پارتيالارى مەن قوعامدىق بىرلەستىكتەرىنىڭ بايقاۋشىلارى, سونداي-اق, 210 وتاندىق ماسس-مەديا وكىلدەرى جۇزەگە اسىردى. سايلاۋ زاڭىن بۇزۋ فاكتىلەرىنە قاتىستى سايلاۋ ورگاندارىنىڭ اتىنا ازىرگە كەلىپ تۇسكەن شاعىم-وتىنىشتەر جوق», دەدى قۋاندىق تۇرعانقۇلوۆ.
ءبىر اتاپ وتەرلىگى, داۋىس بەرۋ قورىتىندىلارى تۋرالى حاتتامالاردى وبلىستىق, استانا جانە الماتى قالالىق سايلاۋ كوميسسيالارى ورتالىق سايلاۋ كوميسسياسىنا 20 تامىزدان كەشىكتىرمەي جىبەرۋى قاجەت. سايلاۋ زاڭناماسىنا سايكەس, بۇل حاتتامالاردىڭ مالىمەتتەرى نەگىزىندە وسك 25 تامىزدان كەشىكتىرمەي, سايلاۋدىڭ تۇپكىلىكتى قورىتىندىلارىن انىقتاۋدى جانە 28 تامىزدان كەشىكتىرمەي, ولار تۋرالى حابارلامانى باق-تا جاريالاۋى ءتيىس.
ءلايلا ەدىلقىزى.