گازەتىمىزدىڭ بۇدان بۇرىنعى نومىرلەرىندە حابارلاعانىمىزداي ەل تاۋەلسىزدىگىنىڭ 20 جىلدىق تويىنا وراي جولعا شىققان «مەنىڭ قازاقستانىم» ارنايى پويىزى قاراعاندى وبلىسىنىڭ بالقاش قالاسى مەن شىعىس قازاقستان وبلىسىنىڭ اياگوز اۋدانىندا بولدى. مۇندا دا قوناقتاردى تەمىر جول ۆوكزالىنان جەرگىلىكتى حالىق قۇرمەتپەن قارسى الدى.
الدىمەن بالقاش جەرىنە توقتاعان پويىز جولاۋشىلارى بەلگىلەنگەن باعدارلاما بويىنشا تۇرعىندارمەن جولىعىپ, ولاردىڭ تالاپ-تىلەكتەرىن تىڭداپ, تولعاندىرعان ساۋالدارىنا جاۋاپتار بەردى. سونداي-اق, قوناقتار ءوندىرىستى ولكە بالقاش قالاسىنىڭ ءبىرقاتار كورىكتى جەرلەرىن ارالاپ, ءبىرشاما ماعلۇماتتار الدى. وسىدان سەكسەن جىلداي بۇرىن بالقاش كولىنىڭ سولتۇستىگىندە 20 شاقىرىمداي جەردەگى قوڭىرات مىس كەنتى نەگىزىندە ءىرى مىس قورىتۋ زاۋىتىنىڭ قۇرىلىسى باستالعان ەكەن. سونىڭ نەگىزىندە 1937 جىلى بالقاش شاھارى بوي كوتەرىپتى. ەلىمىزدىڭ ءتۇستى مەتاللۋرگيا سالاسىنىڭ ەڭ ماڭىزدى ورتالىقتارىنىڭ ءبىرى سانالاتىن قالا حالقى ماڭايىنداعى كەنتتەردى قوسقاندا جەتپىس مىڭنان استام كورىنەدى.
تەك ءوندىرىس سالاسىندا عانا ەمەس, ايدىندى بالقاش كولىن تۋريزم ورتالىعىنا اينالدىرۋ ءجونىندەگى ىرگەلى جۇمىستارعا دا كۋا بولدىق. قالادا تۋريستەردى ورنالاستىرۋ ءۇشىن 8 قوناق ءۇي سالىنىپ, قىزمەت كورسەتە باستاپتى. ماۋسىمدىق كەزدەردە قوناقتار قايىقپەن سەرۋەندەۋ, بالىق اۋلاۋ قۇرالدارىن جالعا الۋ, وزگە دە سەرۆيستىك قىزمەتتەردى پايدالانۋلارىنا مول مۇمكىندىكتەر جاسالىپتى. سونىمەن بىرگە, كول جاعاجايىنداعى كوپتەگەن دەمالىس ۇيلەرى دە تۋريستەرگە قىزمەت ەتە باستاپتى.
1967 جىلى لوندوندا وتكەن حالىقارالىق كورمەدە بالقاش مىسى ەڭ تازا دەگەن دۇنيەجۇزىلىك ەتالونعا يە بولىپ, قازاق ابىرويىن اسىرعانىن وسى تۇستا ەسكە سالا كەتسەك دەيمىز.
«مەنىڭ قازاقستانىم» ارنايى پويىزى اياگوز جەرىنە تابان تىرەگەندە, قاۋمالاعان ەلمەن بىرگە, سىمداي تارتىلعان ساردارلار مەن ساربازدار ۇرمەلى وركەسترمەن سالتاناتتى جاعدايدا قارسى الدى.
جالپى, اۋداندا سەكسەن مىڭداي تۇرعىن بولسا, ونىڭ قىرىق مىڭعا جۋىعى اۋدان ورتالىعىندا تۇرادى. حالىققا قىزمەت كورسەتۋدە جاقسى جۇمىستار جۇرگىزىلۋدە ەكەن. اۋداندىق قىزمەت كورسەتۋ ورتالىقتارىنىڭ جۇمىسى جۇرت كوڭىلىنەن شىعىپ وتىرعانىنا ءتانتى بولدىق.
استانادان شىققان بۇل پويىزداعى دەلەگاتسيا مۇشەلەرى حالىقپەن وتكىزگەن قوعامدىق قابىلداۋلاردا تۇرعىنداردىڭ بەلسەندىلىك تانىتقانىن ايتادى. ماسەلەن, «نۇر وتان» حدپ ورتالىق اپپاراتىنىڭ وكىلى ءسابيت امانجولوۆ, پارلامەنت ءماجىلىسىنىڭ دەپۋتاتى تولەگەن ىبىراەۆتاردىڭ قابىلداۋىندا بولعان 30 ادامنىڭ تالاپ-تىلەكتەرى نەگىزىنەن دەنساۋلىق ساقتاۋ سالاسىنا بايلانىستى بولىپتى. سونىمەن بىرگە, اۋىز سۋ ماسەلەسىن دە نازاردان تىس قالدىرماپتى. مەديتسينادان كەڭەس الۋعا كەلگەندەردىڭ دەنى سۇراقتارىنا ناقتى جاۋاپتار الىپ قاناعاتتانعاندارىن ايتتى, دەيدى دەنساۋلىق ساقتاۋ مينيسترلىگىنىڭ مامانى ەرنار مىرزاقۇلوۆ بىزبەن وي بولىسكەن كەزدە. ول سونىمەن بىرگە تۇرعىنداردىڭ كوپشىلىگى اۋرۋحاناعا جاتۋ ءۇشىن جولداما الۋعا, كونسۋلتاتيۆتىك دياگنوستيكالىق كومەككە مۇقتاج كورىنەدى. ال ءادىلەت مينيسترلىگىنىڭ وكىلى قانات مىقتىباەۆ وتىزعا جۋىق ازاماتتىڭ ساۋالدارىنا جاۋاپ بەرسە, ەڭبەك جانە حالىقتى الۋمەتتىك قورعاۋ مينيسترلىگىنىڭ ساراپشىسى ءامينا ايۋپوۆا 42 ادامنىڭ اتاۋلى الەۋمەتتىك كومەك جانە بالالار جاردەماقىسى توڭىرەگىندەگى سۇراقتار جايىندا كەلگەنىن تىلگە تيەك ەتتى.
اڭىزدار مەن ابىزدار ەلى اياگوز جەرىنە كەلگەن «مەنىڭ قازاقستانىم» پويىزىنداعى ونەر ساڭلاقتارى جەرگىلىكتى جۇرتشىلىقتى كەشكىسىن ءان-جىرعا بولەدى.
ءابدىراحمان قىدىربەك.