بىلتىرعى جىلعى ورمان ءورتى كەزىندە اۋىل تۇرعىندارىنا دەر كەزىندە كومەككە كەلگەنى ءۇشىن ەلباسى جارلىعىمەن «ەرلىگى ءۇشىن» مەدالىمەن ماراپاتتالعان جاباعىلى اۋىلىنداعى دارىگەرلىك ءبولىمشەنىڭ دارىگەرى شاتتىق باتىرحانوۆا وسىلاي دەيدى:
قوستاناي قالاسىندا بولعان «ەل پاتريوتتارى» فورۋمىنان, شىنىن ايتسام, ءۇلكەن اسەرمەن ورالدىم. ەلدىڭ پاتريوتى, ونىڭ تاعدىرىنا جاۋاپتى ادامداردىڭ ءبىرى رەتىندە مەنىڭ وسى فورۋمعا شاقىرىلعانىمنىڭ ءوزىن باقىت دەپ سانايمىن. ءبىز 80-جىلداردىڭ ەلىم, جەرىم دەپ وسكەن ءورشىل رۋحتى جاستارىمىز عوي. بىزدەن كەيىنگى جاستارعا وسى رۋح قوستانايدا ۇيىمداستىرىلعان فورۋمدار ارقىلى جەتسە دەيمىز. مەن ءوزىم لەبياجى اۋدانىنداعى تۋىپ-وسكەن اۋىلىم توساعاشقا ارقالىق قالاسىنداعى دارىگەرلىك ۋچيليششەنى ءبىتىرىپ, 1985 جىلى كەلدىم.
قازىر اۋىلدىڭ وركەندەۋى – ەلدىڭ وركەندەۋى دەپ ءجۇرمىز عوي. ال بىزدەر سول كەزدە-اق ەشكىم ءبىزدى ءدال بۇگىنگىدەي ۇرانداتىپ شاقىرماسا دا ەل ىشىنە, اۋىلعا كەلدىك, ەلدىڭ پاتريوتى بولدىق. ءبۇگىنگى ۇرپاق ويلى ۇرپاق بولسا عانا وسى پاتريوتتىق مارەگە جەتىپ, ەلى مەن جەرىنە ادال قىزمەت جاساي الادى.
ءيا, تاعدىر دەگەن سول, ءوزىمنىڭ جاستىق شاعىم وتكەن قالاعا جاقىن قوستانايدى تاعى ءبىر كەلىپ كورگەنىمە قۋاندىم. ارينە, وسى جەردە, وسى ەلدە تۋىپ-وسكەن سوڭ ەشتەڭەدەن تىس قالىپ ءومىر سۇرە المايسىڭ. فورۋمدا باس قوسقان قاۋىمدى كورىپ, ەلىنىڭ بولاشاعى ءۇشىن قىزمەت ەتىپ, جالىنداپ جۇرگەن مىناداي جاستار باردا ەلىمىزدىڭ تىرەگى مىقتى دەپ ويلادىم.
ءبىزدىڭ اۋىل شالعايدا قالىڭ ورمان شەتىندە ورنالاسقان. بىلتىر توسىننان كەلگەن اپات – ءورت كەزىندە قيىندىقتار كوردىك. جالعىز مەن عانا ەمەس, باسقا دا اۋىل ادامدارى وبلىس ورتالىعىنان كومەك كەلىپ جەتكەنشە ءتىلسىز جاۋمەن الىستىق. جىلاعان بالا, ۇيلەرىنەن قاشقان اۋىل تۇرعىندارى, جالاڭداعان ءورت, كوز الدىڭىزعا ەلەستەتىپ كورىڭىزشى, قازىر ويلاسام, قورقىنىشتى, ال ول كەزدە بىزدە ويلانۋعا مۇرسات بولعان جوق, اۋىلدى, جۇرتتى اپاتتان ساقتاپ قالۋعا جان سالدىق.
ارينە, مەن دارىگەر بولعان سوڭ, باستى مىندەتىم – ادامداردى اجالدان اراشالاپ, دەر كەزىندە كومەككە كەلۋ. ءورت كەزىندە دە وسى مىندەتىمە ادال بولۋعا بار كۇش-جىگەرىمدى جۇمسادىم.
ءوزىم ءۇش بالا تاربيەلەپ, ءوسىرىپ وتىرمىن. وتانعا, تۋعان اۋىلعا, ەلگە دەگەن ماحاببات, پاتريوتتىق سەزىم وتباسىنان باستالادى, جۇبايىم ەكەۋمىز بالالارىمىزدىڭ دا وسى جولدا, وسى ماقساتتا تاربيەلەنىپ, ەلىمىزدىڭ جاقسى ازاماتتارى بولۋىنا ۇلەس قوسساق دەيمىز.
پاۆلودار وبلىسى, لەبياجى اۋدانى.