اتىراۋداعى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ 8-سىنىپ وقۋشىسى بەكتايىر تولەشوۆ وسىنداي جاڭالىق ويلاپ تاپتى. حالىقارالىق «جاسىل كوپىر» ەكولوگيالىق فورۋمىنىڭ قازىلار القاسى بەكتايىردىڭ جۇمىسىن جوعارى باعالاپ, ءبىرىنشى ورىنمەن ماراپاتتادى. عىلىمي-زەرتتەۋ سايىسىندا جەڭىمپاز اتانعان وقۋشى مەكتەپتەگى روبوتوتەحنيكا ۇيىرمەسىنە قاتىسادى. «ينفورماتيكا مەن حيميانى كىرىكتىرۋ ارقىلى ورتاق دۇنيە جاساپ شىعارۋعا بولادى, ويتكەنى تابيعاتتاعى جانە فيزيكاداعى كەيبىر قۇبىلىستاردى بولەك ءپان رەتىندە قاراستىرۋ قيىن», - دەيدى جوبانىڭ عىلىمي جەتەكشىسى راقىمجان قوسانوۆ.
قازىرگى ءبىلىم بەرۋ ساياساتىنىڭ نەگىزگى باعىتى - STEM قاعيدالارى ارقىلى ءبىر مەزگىلدە بىرنەشە ءپاندى كىرىكتىرە وقىتۋ. سول ارقىلى عىلىم, تەحنولوگيا, ينجينيرينگ جانە ماتەماتيكانى ءوزارا ساباقتاستىرۋ جولىمەن عىلىمي پروگرەسسكە تەز جەتۋگە بولادى. اتىراۋداعى نازارباەۆ زياتكەرلىك مەكتەبى بۇل باعىتتا بيىكتەردەن كورىنىپ ءجۇر.
وسى ءبىلىم ورداسىنىڭ تاعى ءبىر تالاپتى شاكىرتى – جانىبەك مۋبينوۆ رەسەيدىڭ كورولەۆ قالاسىندا وتكەن وليمپياداعا فيزيكا پانىنەن قاتىسىپ, ءبىرىنشى ورىندى جەڭىپ الدى. جانىبەك قازاقستاندىق KAZSAT-3 جاساندى جەرسەرىگىن مودەلدەۋ بويىنشا جوباسىن قورعادى. «زىمىراندى ۇشىرعان سوڭ ونى عارىش كەڭىستىگىندە باقىلاۋ قيىن. جەردەگى ماماندار بۇل باعىتتا ءتۇرلى جەتىستىكتەرگە جانە جاڭاشىل مۇمكىندىكتەرگە قول جەتكىزسە دە, ءالى دە جەرسەرىكتەرىن تياناقتى ءارى تۇراقتى باقىلاپ وتىرۋعا مۇمكىندىك بەرەتىن امالدار ويلاپ تابىلعان جوق» - دەيدى جانىبەك. عىلىمي جوباسىندا جەرسەرىكتەردىڭ عارىش الەمىندەگى جۇمىسىن جان-جاقتى سيپاتتاپ بەرگەن. 200-دەن استام دارىندى بالا قاتىسقان حالىقارالىق سايىستا اتىراۋلىق وقۋشىنىڭ مەرەيى ۇستەم بولدى.
باقىتگۇل باباش,
«ەگەمەن قازاقستان»
اتىراۋ