كەشە ورتالىق سايلاۋ كوميسسياسىندا وتكەن كەزەكتى وتىرىستا ءۇش ماسەلە قارالدى.
ونىڭ ءبىرىنشىسى – قازاقستان رەسپۋبليكاسىنىڭ كەزەكتەن تىس پرەزيدەنتتىك سايلاۋىنا شەت ەلدەر مەن حالىقارالىق ۇيىمداردان كەلگەن بايقاۋشىلاردى تىركەۋ, وسك-ءنىڭ ساياسي پارتيا وكىلدەرىنە كەڭەس بەرۋ قۇقىعىن جان-جاقتى تۇسىندىرەتىن ارنايى حاتىن دايىنداۋ جانە ءۇشىنشىسى – «ازات» جالپىۇلتتىق سوتسيال-دەموكراتيالىق پارتياسىنىڭ وكىلى پەتر سۆويكتىڭ ورتالىق سايلاۋ كوميسسياسىنا جىبەرگەن ءوتىنىشىن قابىلداۋدان باس تارتۋ ماسەلەسى.
ءبىرىنشى ماسەلە بويىنشا كوميسسيا مۇشەسى تاتيانا وحلوپكوۆا وسك-عا پرەزيدەنتتىك سايلاۋعا تاعى 61 شەتەلدىك بايقاۋشىنىڭ ءتىركەلگەنىن ايتتى. ونىڭ ىشىندە سىرتقى ىستەر مينيسترلىگىنىڭ ۇسىنىسىمەن تىركەلگەن ەقىۇ دەموكراتيالىق ينستيتۋتتار مەن ادام قۇقىقتارى جونىندەگى بيۋروسى ميسسياسىنان 6 ادام, تمد ەلدەرىنەن 25 بايقاۋشى بار. سونىمەن بىرگە, ول شىۇ-دان – 3, حالىقارالىق ۇيىمداردان – 7, شەتەلدەردەن 20 ادامنىڭ تىركەلگەنىن, ءسويتىپ, وسى كەزگە دەيىن ەلىمىزدە بارلىعى 152 بايقاۋشى تىركەۋدەن وتكەنىن اتاپ ءوتتى. وتىرىسقا قاتىسۋشىلار وسى مالىمەتتەرگە قاتىستى ءوز پىكىرلەرىن ءبىلدىردى. ولار كوبىنە نەعۇرلىم بايقاۋشى كوپ بولسا, سوعۇرلىم سايلاۋدىڭ ءادىل جانە اشىق وتۋىنە مۇمكىندىك بولاتىنىن ايتتى.
ەكىنشى ماسەلە جونىندە وسك توراعاسىنىڭ ورىنباسارى ۆلاديمير فووس ءسوز الىپ, 21 اقپان كۇنى ورتالىق سايلاۋ كوميسسياسى ايماقتىق سايلاۋ كوميسسيالارىمەن جانە سايلاۋ شارالارىنا قاتىساتىن مەملەكەتتىك ورگان وكىلدەرىمەن ارنايى سەمينار ۇيىمداستىرعانىن, وسى كەزدەسۋدە «ازات» جسدپ وكىلى پەتر سۆويك داۋىس بەرۋ قۇقى بار ساياسي پارتيا وكىلدەرىنىڭ قىزمەتىنە قاتىستى ءتيىستى كەڭەس بەرۋشى حات دايىنداۋدى ۇسىنعانىن جەتكىزدى. وسى ماسەلەگە بايلانىستى وسك مۇشەلەرى حاتتاما جاساپ, ونى تياناقتى تۇردە قاراۋ كەرەكتىگىنە كەلىستى.
ال ءۇشىنشى ماسەلە بويىنشا وسك حاتشىسى باقىت مەلدەشوۆ تاعى دا سول «ازات» جسدپ وكىلى پەتر سۆويكتىڭ ورتالىق سايلاۋ كوميسسياسىنا جىبەرگەن ءوتىنىشىن قابىلداۋدان باس تارتىلاتىنىن مالىمدەدى. ونىڭ ايتۋىنشا, وسك قۇرامىن بەكىتۋ ءتارتىبى ەلىمىزدىڭ كونستيتۋتسياسى مەن «سايلاۋ تۋرالى» زاڭىندا كورسەتىلگەن. وسى زاڭنىڭ 10-بابىنا سايكەس ورتالىق سايلاۋ كوميسسياسىندا ارنايى وكىلدەرى جوق ساياسي پارتيالار ءوز ادامدارىن سايلاۋ كوميسسيالارىنىڭ قۇرامىنا ۇسىنۋعا قۇقىلى بولعانىمەن, ولار تەك ايماقتىق جانە ۋچاسكەلىك سايلاۋ كوميسسيالارىنا عانا مۇشە بولا الادى. سولاي دەگەنمەن, ول «ازات» جسدپ-نىڭ ۇسىنىسى باس پروكۋراتۋراعا جىبەرىلگەنىن, قۇزىرلى ورگان كونستيتۋتسياعا سايكەس, وسك قۇرامىندا مۇشەسى جوق پارتيالاردىڭ وكىلدەرى تەك ايماقتىق جانە ۋچاسكەلىك كوميسسياسىنىڭ جۇمىسىنا عانا قاتىسا الاتىنىن مالىمدەدى.
داستان كەنجالين.