الماتىداعى «جايلاۋ» گولف كلۋبىندا «Kazakhstan Open - 2016» حالىقارالىق ءتۋرنيرىنىڭ اشىلۋ قۇرمەتىنە وراي وتەتىن Pro-Am ءتۋرنيرى باستالدى.
بۇل تۋرنير ەرتەڭگى ۇلكەن ويىن الدىنداعى سوڭعى تياناقتى دايىندىق سياقتى ءارى قاتىسۋشىلاردىڭ ءوزارا تانىسىپ, ءتىل تابىسۋىنا سەبەپ بولاتىن شارا. Pro-Am ويىندارىنا دا قوماقتى جۇلدە قورى تىگىلەدى. بيىلعى جەڭىمپازدارعا مالديۆ جاعاجايىنا جولداما بەرىلمەك.
ايتپاقشى, ەرتەڭگى «Kazakhstan Open - 2016» حالىقارالىق تۋرنيرىنە ەۋروپا ويىنشىلارىنىڭ رەيتينگىندە 3-ورىندا تۇرعان رومان لانگاسك قاتىسپاقشى. فرانتسيا ازاماتىنىڭ الماتىعا العاش رەت كەلۋى. جالپى, قازاق ەلى تۋرالى جاڭالىقتاردان ەستىپ, ءبىلىپ جۇرەدى ەكەن. «الماتىنىڭ اۋا-رايى ۇنادى! ادەمى...» دەيدى ول. الماتىداعى تۋرنيرگە قاتىسۋعا ءوزى ىقىلاس تانىتقان. فرانتسۋز ويىنشىسى بۇل ويىنداعى قوماقتى جۇلدە قورى قىزىقتىرعانىن جاسىرمادى.
ەۋروپالىق تۋر – الەمدىك دەڭگەيدەگى گولف الپاۋىتتارىنىڭ ۇزدىگىن انىقتايتىن تۋرنير. وعان دەيىن بىرنەشە دەڭگەيدەن تۇراتىن حالىقارالىق جارىستار وتەدى. سونىڭ ءبىرى - Kazakhstan Open!
قالماحانبەت مۇحامەتقالي, الماتى.