نەمەسە گولليۆۋد كينوسىنداعى اقشاڭقان ۇيلەردى كورگەن سوڭ تۋعان وي
اعىلشىن جازۋشىسى حەلەن فيلدينگتىڭ الەمگە ايگىلى كىتابىنىڭ جەلىسى بويىنشا لوندوندا ءتۇسىرىلىپ, جۋىردا قازاقستان كينوتەاترلارىندا كورسەتىلە باستاعان «بريدجيت دجونستىڭ بالاسى» فيلمىنەن قاز-قاتار تىگىلىپ تۇرعان كيىز ۇيلەردى كورىپ, ەرىكسىز قايران قالدىق. كادىمگى ءبىزدىڭ قازاقتىڭ كيىز ۇيلەرى. ويۋ-ورنەگى, ۋىق, كەرەگەسى, ءبارى-ءبارى اينا-قاتەسىز سول قالپىندا تۇر.
وسىعان وراي, «كوشپەلىلەردىڭ كيىز ءۇيى شەتەلدىك تانىمال فيلمدەرىنىڭ سيۋجەتتەرىندە وسىلاي تۇسىرىلە بەرەتىن بولسا, ەرتەڭگى كۇنى ءبىر كينوستۋديانىڭ ونى مەنشىكتەپ پاتەنتتەپ الماستارىنا كىم كەپىل؟» دەگەن وي ەرىكسىز قىلاڭ بەردى.
«كوشپەندىلەردىڭ كيىز ءۇيى», «قازاق كيىز ءۇيى» دەگەن سوزدەر ءبىزدىڭ جادىمىزدا تۇراقتى تىركەس ىسپەتتى ساقتالىپ قالعان. سوناۋ عاسىردان بەرى كوشپەلى تۇرمىس تاجىريبەسىنەن تۋعان قازاقتىڭ كيىز ءۇيى – كۇننىڭ اپتابى مەن ءتۇننىڭ دىم-سىزىنان, جاۋىن-شاشىن مەن اڭىزاقتان, بوراننان ساقتانۋعا ىڭعايلى, ءارى اۋالى, ءارى جارىق بولۋدىڭ ۇستىنە كوشى-قونعا قولايلى, ونى جارتى ساعات ىشىندە جىعىپ-ارتۋعا دا, جارتى ساعات ىشىندە كولىكتەن ءتۇسىرىپ, تىگىپ الۋعا دا بولادى. وسىنداي تۇرمىسقا ىڭعايلى ەرەكشەلىكتەرى ارقىلى «كيىز ءۇيىمىز» سۇرانىسقا يە بولىپ تۇر عوي. الايدا, كيىز ءۇيدىڭ ءاۋ باستان-اق كوشپەلىلەردىكى ەكەنى وزىمىزگە عانا ايان سياقتى. ەندەشە, وسىنداي ۇلتتىق قۇندىلىقتارىمىزدى قولدان شىعارىپ الماي تۇرىپ نەگە پاتەنتتەپ المايمىز؟
قىمىزىمىزدى پاتەنتتەپ الايىق دەپ جار سالىپ جۇرگەندە, نەمىس حالقى «جىلقى سۇتىنەن الىناتىن قىشقىل ءسۇت ءونىمى» دەپ پاتەنتتەپ الدى ەمەس پە؟ تاعى ءبىر ۇلتتىق قۇندىلىعىمىزدى دارىپتەيتىن «كوكپار» ويىنىن قىرعىزدار وزدەرىنە مەنشىكتەپ كەتتى. وسى سەكىلدى اتتەگەن-ايلاپ جۇرمەيمىز بە؟
ال, كينوداعى كورىنىسكە قايتا ءبىر سوعار بولساق, قازاق كيىز ءۇيىن گولليۆۋد كينوگەرلەرى قانشالىقتى زاڭدى پايدالانىپ ءجۇر؟ مادەني قۇندىلىعىمىز عوي ول ءبىزدىڭ. حالىقارالىق نورمالار بۇعان نە دەيدى؟ بىلىكتى زاڭگەرلەردىڭ وي تارازىسىنا سالاتىن سۇراق ەكەنى ءسوزسىز.
ايتپاقشى, حەلەن فيلدينگتىڭ كىتابىنىڭ «بريدجيت دجونستىڭ كۇندەلىگى» اتتى ءبىرىنشى ءبولىمىنىڭ ءوزى 15 000 000 دانامەن ساتىلعان ەدى.
فاريزا باۋىرجانقىزى