وسكەمەندە قۇس وسىرۋشىلەردىڭ V حالىقارالىق فورۋمى ءوتتى
قۇس ءوندىرىسى – حالىقتىق ازىق-ت ۇلىكتىڭ الەۋمەتتىك تۇرىنە اينالعان سۇرانىسقا يە سالا. سوندىقتان, كەيىنگى جىلدارى ەلىمىزدە قۇس ەتى مەن جۇمىرتقاسىن ءوندىرۋ ايرىقشا قارقىن الدى دەۋگە بولادى. الايدا, سىرتتان كەلەتىن يمپورت ۇلەسى دە از ەمەس. وسكەمەندە وتكەن قۇس وسىرۋشىلەردىڭ V حالىقارالىق فورۋمىندا قاناتتى شارۋاشىلىققا قانات ءبىتىرۋدىڭ جولدارى قاراستىرىلدى.
فورۋم جۇمىسىنا ءوڭىر باسشىسىنىڭ ورىنباسارى دۇيسەنعازى مۋسين, قازاقستان قۇس وسىرۋشىلەر وداعىنىڭ توراعاسى رۋسلان ءشارىپوۆ جانە گەرمانيا, پولشا, بەلگيا, تۇركيا, قىتاي ەلدەرىنەن كەلگەن سالا وكىلدەرى مەن وتاندىق عىلىمي-زەرتتەۋ ينستيتۋتتارىنىڭ قىزمەتكەرلەرى قاتىستى.
قازىر ەلىمىزدە جۇمىرتقا وندىرەتىن 30, تاۋىق ەتىن وندىرەتىن 17 كاسىپورىن, اسىل تۇقىمدى 8 قۇس شارۋاشىلىعى بار. الداعى جىلدارى شىعىس قازاقستان, جامبىل, قىزىلوردا جانە اقمولا وبلىستارىندا قۇس ەتى مەن جۇمىرتقاسىن وندىرەتىن بىرنەشە ءىرى كاسىپورىن اشىلۋ جوسپارلانعان. قازاقستان قۇس وسىرۋشىلەر وداعىنىڭ توراعاسى رۋسلان ءشارىپوۆتىڭ ايتۋىنشا, بيىل ەلىمىزدە جۇمىرتقا ءوندىرىسى 5 ميلليارد داناعا, قۇس ەتى 182 مىڭ تونناعا, قۇس سانى 38 ميلليون باسقا جەتكىزىلمەك. قۇس شارۋاشىلىعىن دامىتۋعا مەملەكەتتەن قاجەتتى سۋبسيديا ءبولۋدىڭ ناتيجەسىندە قازاقستاندىق كاسىپورىنداردىڭ ونىمدەرى رەسەي, قىرعىزستان, تاجىكستان, وزبەكستان, موڭعوليا, اۋعانستان, ءباا ەلدەرىنە شىعارىلىپ جاتىر. الداعى ۋاقىتتا ۇلكەن نارىقتاردىڭ بىرىنەن سانالاتىن قىتايعا دا شىعارۋعا كەلىسىمدەر جۇرگىزىلۋدە.
جيىندا شارۋاشىلىقتى دامىتۋدىڭ وزەكتى ماسەلەلەرىنە نازار اۋدارىلدى. ايتالىق, وتاندىق قۇس شارۋاشىلىعى ونەركاسىبىنە قاجەتتى ءونىم, قىزمەت كورسەتۋ سالاسى تۇگەلدەي شەتەلدىك ونىمدەرگە تاۋەلدى. قۇسقا قاجەتتى جەم قۇرامىنداعى قوسىمشا مينەرال, ينكۋباتور, قۇس ەتى مەن جۇمىرتقا ءوندىرىسىنىڭ تەحنولوگيالىق قۇرالدارى, ۆاكتسينالار مەن ۆەتەرينارلىق ءدارى-دارمەكتەر تۇگەل دەرلىك شەتەلدەردەن كەلەدى. اسىل تۇقىمدى قۇستار دا قۇرلىق اسىپ, مۇحيت كەشىپ جەتەدى. قۇس فابريكالارى جىل سايىن اسىل تۇقىمدى قۇس ساتىپ الۋعا ميلليونداعان قارجى جۇمسايدى. وسى ارادا كوڭىل اۋداراتىن تاعى ءبىر ماسەلە, قازاقستاندىق اسىل تۇقىمدى قۇس شارۋاشىلىقتارى ونىمدەرى ساپاسىنىڭ تومەندىگى مەن وعان وڭدى كوزقاراس جوقتىقتان مەملەكەتتەن اتالعان ساناتتاعى شارۋاشىلىقتاردىڭ ونىمىنە سۇرانىس جوق. سونداي-اق, قۇس جەمىنىڭ تاپشىلىعى قالىپتاسىپ وتىر. قۇس ونىمدەرىنىڭ وزىندىك قۇنىن تومەندەتىپ, باسەكەگە قابىلەتتىلىگىن ارتتىرۋ ءۇشىن سالاعا قاجەتتى بيولوگيالىق ونەركاسىپتەر قۇرۋ, بيوقوسپالار شىعاراتىن زاۋىتتار سالۋ جانە مەملەكەت تاراپىنان ۆاكتسينالارمەن قامتۋ, اۋرۋلارعا قارسى دياگنوستيكالىق تالداۋلار جۇرگىزۋ, شارۋاشىلىق پەن وندىرىسكە قاجەتتى قۇرال-جابدىقتاردى ەلىمىزدە شىعارۋ سىندى كوپتەگەن كۇردەلى ءارى كەشەندى ماسەلەلەر شەشىمىن كۇتىپ تۇر.
«ايتاس» كومپانيالار توبىنا كىرەتىن «وسكەمەن قۇس فابريكاسى» اق وتكەن جىلدان بەرى اقمولا وبلىسىنىڭ بۇلاندى اۋدانىنداعى ماكينسك قالاشىعىندا قۇس فابريكاسىن سالۋدا. قۇستارعا قاجەتتى جەم دايىندايتىن تسەحىمەن بىرگە اشىلعالى وتىرعان كەشەندى فابريكادا جىلىنا 60 مىڭ توننا ءتىرى سالماقتاعى ەت ونىمدەرى وندىرىلمەك. قۇس فابريكاسىنىڭ باس ديرەكتورى سەرىك تولىقباەۆ الداعى ۋاقىتتا تاۆريا اۋىلىنان اسىل تۇقىمدى قۇس بالاپاندارى شارۋاشىلىعىن قۇرۋدى كوزدەپ وتىر. بۇل ءوڭىر تۇرعىندارىن ساپالى, ارزان وتاندىق قۇس ەتىمەن قامتيتىن بولادى. ايتا كەتەلىك, قازاقستاندىق قۇس وسىرۋشىلەردىڭ V حالىقارالىق فورۋمى اياسىندا 2010 جىلدان باستاپ ءوندىرىسى يننوۆاتسيالىق تەحنولوگيالاردى ەنگىزۋ ارقىلى قايتا قۇرىلىپ, از جىلدا بەلگىلى قۇس فابريكاسىنا اينالعان «وسكەمەن قۇس فابريكاسى» كاسىپورنىنىڭ 40 جىلدىق مەرەيتويى ۇيىمداستىرىلدى.
دۋمان اناش,
«ەگەمەن قازاقستان»
وسكەمەن