استانانىڭ تەمىرجول ۆوكزالىنا «تۇلپار-تالگو» پويىزىنىڭ ميلليونىنشى جولاۋشىسى كەلىپ ءتۇستى. ول اقتوبە قالاسىنان ءۇش بىردەي نەمەرەسىمەن ەلورداسىنا جول شەككەن قانىماي بەكباۋوۆا اجەي ەدى. ءوزىنىڭ باق قونعان بيلەتپەن كەلە جاتقانىنان مۇلدە بەيحابار اجەي گۇل شوقتارىن ۇسىنىپ, قۇتتىقتاپ جۇرگەن قاۋىمعا قايتا-قايتا العىس ايتۋمەن بولدى.
جاي عانا سىرعىپ كەلە جاتقان اسەم ۆاگونداردىڭ جاقتاۋىنا ەرىكسىز كوز ءتۇسىپ, جان-جۇرەگىڭدى قۋانىش كەرنەيدى. سەبەبى, بۇل جۇردەك پويىزدىڭ كوركەم ۆاگوندارىنىڭ ءبارى «قازاقستاندا جاسالعان» دەگەن تاڭبالارمەن ادىپتەلگەن. تاۋەلسىزدىكتىڭ شيرەك عاسىرداعى جەتىستىگى جونىندە الدەكىم سۇراي قالسا, مارقايعان كوڭىلمەن كورسەتۋگە بولاتىن وتاندىق تۋىندىنىڭ ءبىرى, وسى «تۇلپار-تالگو» ۆاگوندارى ەكەنىن ايتۋعا اۋىز بارادى.
ابىر-سابىردا قۋانىشتى حاباردى ارەڭ ۇققان اجەي بىردەن كوڭىلدەنىپ, اعىل-تەگىل قۋانىشىن جاسىرا الماي قالدى. رەسمي مەكەمە قىزمەتكەرلەرى ءبارىن دە الدىن الا بىلەتىن بولىپ شىقتى. تەك ونى ەلدەن جاسىرعان. اجەيدىڭ ءۇش نەمەرەسىنە ارنايى العان باعالى سىيلىقتارى دا بار ەكەن. سونىمەن بىرگە, ميلليونىنشى جولاۋشىعا ەل اۋماعىنداعى كەز-كەلگەن باعىتقا «تۇلپار-تالگو» جۇردەك پويىزىمەن 10 رەت تەگىن ءجۇرۋ سەرتيفيكاتى تابىس ەتىلدى. «قۇدايدىڭ بەرەرى كوپ! ميلليونىنشى جولاۋشى بولىپ, مىڭ-مىڭ قۋانىشقا تاپ بولعانىمدى قاراڭدارشى!», – دەيدى اق جارما كوڭىلى اعىتىلعان اجەي.
وتاعاسىمەن بەس بالا تاربيەلەپ وسىرگەن انا بۇگىندە توعىز نەمەرەسىنىڭ اراسىندا جول جالعاپ جۇرگەن كورىنەدى. «بەس بالامنىڭ ەكەۋى وسى استانادا تۇرادى. كوز دارىگەرى بولىپ جۇمىس ىستەيتىن جانار اتتى كەلىنىمنىڭ كوزى نۇرلى بولدى عوي, الىپ بەرگەن بيلەتى مەنى ميلليونىنشى جولاۋشى اتاندىردى», – دەگەن اجەي توپەلەگەن كوپ سۇراققا جوپەلدەمەدە جاۋاپ بەرىپ جاتىر.
وسى جەردە ءبىز «جولاۋشىلار تاسىمالى» اق قىزمەتكەرىن سوزگە تارتىپ, پويىزدىڭ ءجون-جوسىعى جونىندە سۇراپ بىلدىك. جالپى, جىل باسىنان بەرى وتاندىق پويىزدار 10 ميلليون ادام تاسىمالداپتى. ال «تۇلپار-تالگو» پويىزدارىن پايدالانعان ادامداردىڭ سانى بيىل كۇرت ءوسىپ, 1 ميلليوننان اسىپتى. بۇل 2015 جىلمەن سالىستىرعاندا, 2,1 ەسە ارتىق.
قازىر «تۇلپار-تالگو» پويىزدارىندا كوپ بالالى انالارعا, سوعىس ارداگەرلەرىنە, مۇمكىندىگى شەكتەۋلى جاندارعا, ستۋدەنت جاستارعا جەڭىلدىك بەرەتىن ديسكونتتىق كارتالار بار. دەمەك, جۇردەك پويىزدار ءارتۇرلى الەۋمەتتىك توپتار ءۇشىن قولجەتىمدى بولىپ وتىر.
نۇرباي ەلمۇراتوۆ
سۋرەت: ەرلان وماروۆ