قازاقستان تاۋەلسىزدىگىنىڭ 25 جىلدىعى مەن حالىقارالىق ەكسپو-2017 كورمەسى قارساڭىندا ۇيىمداستىرىلعان فەستيۆالدىڭ «جەلتاۋدىڭ جەلماياسى» اتانۋى ەلەڭ ەتكىزگەن. جەلمايانى حالقىمىزعا جايلى قونىس ىزدەگەن اسان قايعى بابامىزبەن بايلانىستىرامىز. دانىشپاننىڭ جەلىپ ءجۇرىپ كوز جەتكىزگەنى – قازاق دالاسىنىڭ بارلىق پۇشپاعى جۇماق ەكەندىگى. جەلتاۋدى ابىلايدى حان كوتەرگەن قاناي بي قۇتتىمبەت ۇلى تاڭداعان ەكەن. ال ابىلايدىڭ اق تۇيەسى حان جورىقتارىنىڭ ساتتىلىك سيمۆولى رەتىندە قاستەرلەنەدى. كەيىنىرەك جەلتاۋدى جاعالاي قاناي ءبيدىڭ التى اۋىلى قونىس تەپكەن. بۇگىنگى تانىمدىق شارا بي ۇرپاعى كەڭەس وداعىنىڭ باتىرى, اكادەميك مالىك عابدۋللليننىڭ اۋىلى قويسالعاندا وتۋدە.
وبلىستىق مادەنيەت باسقارماسىنىڭ قولداۋىمەن مالىك عابدۋللين مۋزەيى ۇيىمداستىرعان تاريحي ەتنو-مادەني فەستيۆال قازاق حالقىنىڭ تۇرمىس-تىرشىلىگى مەن سالت-ءداستۇرىن مولىنان قامتىعان اۋقىمدى شارا بولدى.
جاڭبىرلى جاز عوي. الىستان مۇنارتىپ كوش-كەرۋەن كورىندى. مەرەكەسى مەن بەرەكەسى شالقىعان كوڭىلدى كوش. اۋا رايىنىڭ كەز كەلگەن ۋاقىتىنداعى كوشپەلى ومىرگە داعدىلانعان توپتى قويسالعان اۋىلى قۋانىشپەن قارسى الدى. ارنايى كيىز ءۇي تىگىلىپ, ىرگەسىنە جەلمايا شوكتىرىلدى. ءانشى اسلان مۇحامەدياردىڭ ورىنداۋىنداعى قۇدايبەرلى مىرزابەكتىڭ قازاق كوشىن كەيىپتەگەن ءانى جۇرتشىلىقتى تولقىتىپ جىبەردى.
ەل دۋمانىنا جينالعان قالىڭ كوپشىلىكتى زەرەندى اۋدانىنىڭ اكىمى اسقار مۇرات ۇلى, وبلىستىق ىشكى ساياات جانە مادەنيەت باسقارمالارىنىڭ باسشىلارى اينا ءمىسرالىموۆا مەن ساۋلە بورىباەۆا, قوعام قايراتكەرى امانكەلدى سادىربەكوۆ, قازاقستاننىڭ كينولوگتار فەدەراتسياسىنىڭ پرەزيدەنتى ورالبەك كايسانوۆ, ۇلتتىق سپورت ءتۇرلەرىنەن مەملەكەتتىك باپكەر رامازان ساتىباەۆ, كوكشەتاۋداعى م.عابدۋللين مۋزەيىنىڭ ديرەكتورى, اقىن قۇدايبەرلى مىرزابەكوۆ قۇتتىقتادى.
بۇدان سوڭ قۇرمانعازىنىڭ «كوڭىلاشار» كۇيى وينالىپ, كورەرمەن الدىنان مەملەكەتتىك تۋىمىزدى كوتەرىپ, اقبوز ات مىنگەن م.عابدۋللين بەينەسىندەگى وفيتسەر سوڭىنا ەكى ساربازىن ەرتىپ شاۋىپ ءوتتى. ەلىمىزدىڭ ءانۇرانى قالىقتاپ, كوك بايراعى جەلبىرەگەندە رۋحتانىپ, ارقالانباعان ادام قالمادى. ەندى ءبىر ءسات كوپشىلىكتىڭ نازارى تويدىڭ باستالعانىن حابارلاپ, ات ۇستىندە دومبىراسىن دۇبىرلەتكەن جارشى سارسەنباي حاسەنوۆكە اۋدى. «بازارىڭ تارقاماسىن, ارداقتى ەلىم» دەپ القالى توپتىڭ الدىندا ابدىسالىق سالىق كەتتى اۋەلەتىپ.
فەستيۆال اياسىندا كيىز ۇيلەر, ۇلتتىق تاعامدار, قىمىزمۇرىندىق, ونەرتاپقىشتار, ۇلتتىق قولونەرشىلەر بايقاۋلارى مەن تاباق تارتۋ, ساعىز قايناتۋ سياقتى ۇلتتىق داستۇرىمىزدەن كورىنىستەر ۇيىمداستىرىلدى. وبلىستىق ۇلتتىق سپورت مەكتەبى شاكىرتتەرىنىڭ قاتىسۋىمەن قاۋىم الدىندا اۋدارىسپاق, كوكپار, جامبى اتۋ, تەڭگە ءىلۋ, قىز قۋ سياقتى ۇلتتىق ويىندار وينالىپ, تازى مەن توبەت سياقتى قازاقتىڭ تەكتى يتتەرىنىڭ كورمەسى دە قىزىقتىردى.
التى اۋىل جۇيرىكتەرىن ورتاعا شىعارىپ, ءوزارا باق سىناسقان بايگەدە قويسالعان اۋىلىنىڭ تۇرعىنى الماس باشيروۆتىڭ اتى ءبىرىنشى كەلسە, سارىوزەك وكىلى ءادىل ءسالىمجان ەكىنشى ورىندى يەلەندى. ءۇشىنشى ورىندى دارحان زيناتولوۆتىڭ جۇيرىگى الدى. بۇدان سوڭ ورتاعا بالۋاندار شىعىپ, بوز كىلەم ۇستىندە بەلدەستى. قازاق كۇرەسىنەن ءۇشىنشى ورىندى ساكەن سەيفۋللين اۋىلىنىڭ بالۋانى راسۋل ءجۇسىپالين يەلەنىپ, ەكىنشى ورىن بىرلەستىك اۋىلىنىڭ تۇرعىنى قايىرجان ساعىندىقوۆقا بۇيىردى. ءبىرىنشى ورىندى يگىلىك اۋىلىنىڭ بالۋانى نۇرلىبەك قابدولوۆ جەڭىپ الدى. ال قاناي اۋىلىنىڭ تۇرعىنى ابىلاي ءبايادىلوۆ «جەلتاۋدىڭ جەلماياسىنىڭ» تۇيە بالۋانى اتاندى.
جيىن بارىسىندا اقىندار ايتىسى, ءداستۇرلى انشىلەر بايقاۋى وتكىزىلىپ, وبلىستىق انالار ۇيىمىنىڭ مۇشەسى راۋزا بايكەنوۆا گۇلشات جولدىوڭعار ەسىمدى نارەستەنى بەسىككە بولەدى. سونداي-اق, بەس نارەستەنىڭ تۇساۋى كەسىلىپ, جاقىندا سۇندەتتەلگەن دانيال سارسەنباەۆقا باسىرە تايى مىنگىزىلدى.
دالالىق كورمە الاڭىندا «Kazakhstan Innovations» قوعامدىق قورىنىڭ ءتورايىمى ءماريام ابىشەۆا ينننوۆاتسيالىق جوبا تانىستىرىلىمىن وتكىزسە, جەرگىلىكتى قولونەر شەبەرلەرى كەنجەباي سماعۇلقىزى, رۋستام ياكوۆلەۆ, ەرمۇحامەد قازيحانوۆ ءوز قولىمەن دايىنداعان ۇلتتىق بۇيىمداردى كوپشىلىك نازارىنا ۇسىندى.
باقبەرگەن امالبەك,
«ەگەمەن قازاقستان»
اقمولا وبلىسى,
زەرەندى اۋدانى
سۋرەتتەردى تۇسىرگەن
ەرمۇرات دوسىموۆ