مەملەكەت باسشىسى نۇرسۇلتان نازارباەۆ ايگىلى ءانشى, كسرو جانە قازاقستاننىڭ حالىق ءارتىسى, حالىق قاھارمانى روزا باعلانوۆانىڭ ومىردەن وتۋىنە بايلانىستى مارقۇمنىڭ وتباسى مەن تۋعان-تۋىستارىنا كوڭىل ايتۋ جەدەلحاتىن جولدادى, دەپ حابارلادى قازاقستان رەسپۋبليكاسى پرەزيدەنتىنىڭ ءباسپاسوز قىزمەتى.
«روزا تاجىبايقىزى تابيعات بەرگەن تاڭعاجايىپ داۋىسىمەن, تاماشا ورىنداۋشىلىق شەبەرلىگىمەن, ازاماتتىق جانە وتانسۇيگىشتىك اسىل قاسيەتتەرىمەن حالقىمىزدىڭ ەرەكشە قۇرمەتى مەن ماحابباتىنا ءبولەنگەن جان ەدى. ونىڭ ورىنداۋىندا كەز كەلگەن الەم حالىقتارىنىڭ اندەرى وزگەشە قۇلپىرىپ, تىڭداۋشىنىڭ قۇلاق قۇرىشىن قاندىراتىن. ۇلى وتان سوعىسى جىلدارىندا ول مايدان دالاسىن ارالاي ءجۇرىپ ءان شىرقاپ, جاۋىنگەرلەردى ەرلىككە جىگەرلەندىردى. ءوزى ومىردەن وزعانىمەن, ول كىسىنىڭ مول ءان مۇراسى عاسىرلار بويى حالقىمىزدىڭ جۇرەگىن باۋراپ, جانىنا نۇرلى شۋاق سىيلاي بەرەدى دەپ سەنەمىن», دەلىنگەن جەدەلحاتتا.