ازامات قاسىم

سۇحبات • 30 ءساۋىر، 2020

ەرسىن ءجۇنىسوۆ: كوروناۆيرۋسقا قارسى ءتيىمدى ءادىس

– ەرسىن تۇرسىنحان ۇلى، ءوزىڭىز جەتەكشىلىك ەتەتىن سەمەي مەديتسينا ۋنيۆەرسيتەتىنىڭ عالىمدارى كۇللى الەمدى الاڭداتىپ وتىرعان كوروناۆيرۋس ينفەكتسياسىمەن كۇرەستە قولدانۋعا بولاتىن جاڭا قۇرىلعى ويلاپ تاپتى دەپ ەستىدىك. بۇل قانداي قۇرىلعى؟ – قىتايدىڭ ۋحان قالاسىندا جامان ىندەت شىققاننان كەيىن الەم ەلدەرى جۇقپالى دەرتتىڭ ەمىن ىزدەي باستادى. ەلىمىزدە دە دەر كەزىندە ءتيىستى شارالار قابىلداندى. مەملەكەت باسشىسى قاسىم-جومارت توقاەۆ وتاندىق مەديتسينا عىلىمىن دامىتۋدى تاپسىرعانى بەلگىلى. قازىر ءبىزدىڭ وقۋ ورنى دەنساۋلىق ساقتاۋ مينيسترلىگىنىڭ تاپسىرماسىمەن تالداۋ بويىنشا جۇمىس ىستەپ جاتىر. وبلىستىق دەنساۋلىق ساقتاۋ باسقارماسىمەن كەلىسە وتىرىپ، ۋنيۆەرسيتەت قابىرعاسىندا مەديتسينالىق شتاب قۇردىق. ينفەكتسيالىق، كارانتيندىك، پروۆيزورلىق اۋرۋحانالارعا تسيفرلى تەحنولوگيالارىمىزدى، تەلەمەديتسينانى، بەينەكامەرالارىمىزدى، پلانشەتتەرىمىزدى قويدىق. ايتا كەتۋ كەرەك، وسكەمەن جانە سەمەي قالاسىنداعى اۋرۋحانالارعا قوسىمشا 4G پلانشەتتەردى جەرگىلىكتى مەتسەناتتار مەن قالالىق جانە وبلىستىق ءماسليحات دەپۋتاتتارى، Nur Otan پارتياسىنىڭ مۇشەلەرى الىپ بەردى. عالىمدارىمىزدىڭ ويلاپ تاپقانى، قاراپايىم عانا قۇرىلعى. ناۋقاس وزدىگىنەن تىنىس الا الماي، اۋىر جاعدايدا بولعاندا ينتۋباتسيانى تەزىرەك قويۋ ءۇشىن قولدانۋعا بولادى. بۇل – ءبىر. ەكىنشىدەن، دارىگەرلەردىڭ ينفەكتسيا جۇقتىرۋ مۇمكىندىگىن تومەندەتەدى. ماسەلەن، وسى قۇرىلعىنى قولدانعان جاعدايدا ناركوز بەرەتىن انەستەزيولوگ ناۋقاستىڭ تۋرا ۇستىندە تۇرماي الىسىراق تۇرادى، سول كەزدە ينفەكتسيا جۇقتىرۋ دەڭگەيى تومەن بولادى.