11 جەلتوقسان، 2010

بىرلىك بار جەردە تىرلىك بار

366 رەت كورسەتىلدى
وسىدان ءتورت جىل بۇرىن سەمەيدە «سەماز» دەپ اتالاتىن جاۋاپكەرشىلىگى شەكتەۋلى سەرىكتەكتىك اشىل­دى. ونىڭ قۇرىلتايشىسى ەسى­مى ەلىمىزگە بەلگىلى ازامات ءداۋ­لەت تۇرلىحانوۆ بولسا، باس دي­رەك­تور­لى­عىنا وسىنداعى مىقتى كا­سىپ­كەر­لەردىڭ ءبىرى اسەمحان دوس­قو­جانوۆ تاعايىندالعان. ال «سەم­از»-ىڭىز سەمەي اۆتوبۋس زاۋىتى دەگەن ءسوزدىڭ قىسقارتىلعان ءتۇرى عوي. ءسويتىپ، وڭتۇستىك كورەيالىق­تار­مەن بىرلەسكەن كاسىپورنى كەلەر جىلدان باستاپ اۆتوبۋس شىعارۋعا كىرىسىپ كەتكەن. جاڭا كاسىپورىن­نىڭ جىلدىق قۋاتى 1200 اۆتوبۋس شىعارۋعا قاپتالىمەن جەتەتىن. ءبى­راق، وكىنىشكە قاراي، قىرسىق­قان­دا قىمىران ءىريدى دەمەكشى ءال­ەمدىك داعدارىس سالقىنى بۇلار­دى دا اينالىپ وتپەگەن. سولايشا با­سىندا جاقسى باستالعان يگى باستاما بىرتىندەپ توقىراپ، اقىرى توق­تاپ تىنعان. سولاي دەي تۇرعانمەن، بۇگىندە «سەماز»-دىڭ اۆتوبۋستا­رى استانا تورىندە جۇيتكىپ ءجۇر. ياعني، 1997 جىلى استانانىڭ ون جىلدىق مەرەكەسىنە وراي ارقادا­عى ساۋلەتتى قالاعا شىعىس قازاق­ستان وبلىسى اتىنان 20 اۆتوبۋس سىيعا جونەلتىلگەن بولاتىن. ايتەۋىر ابىروي بولعاندا ءاس­ەم­حان سەرىكحان ۇلى باستاعان جەرگىلىكتى ىسكەر جىگىتتەر وسىدان كەيىن داعدارىپ، قول قۋسىرىپ وتىرىپ قالماعان. ءسويتىپ، مينسك تراكتور زاۋىتىمەن كەلىسىمشارتقا وتى­رىپ، تەزدەتىپ بيزنەس-جوسپار جا­سا­عان. وسى كەلىسىم بويىنشا اتال­عان زاۋىت قاجەتتى قوسالقى قۇرال جابدىقتاردى بۇلارعا جولداسا، ونى قۇراستىرىپ شىعارۋدى سەمەيلىكتەر ءوز موينىنا الادى. ال­عاشقى ءتورت دوڭگەلەكتى «بەلارۋس» ماركىلى تراكتورى وتكەن جىلدىڭ ناۋرىز ايىنىڭ سوڭىندا ساپقا قويىلىپ ۇلگەرىلەدى. ال ودان كەيىنگى جەردە ايىنا 80-90 تراكتور شىعارىلا باستايدى. جالپى،  جا­ڭا زاۋىتتىڭ جىلدىق قۋاتى 1،5 مىڭ تراكتور بولاتىن. راس، وتكەن جىلى نەگىزگى جۇمىس ءساۋىر ايىندا باستالعاندىقتان زاۋىت بۇل مەجەگە جەتە الماعان. دەسە دە، سول مەرزىم ىشىندە بۇلاردىڭ ءونىمى ەلى­مىزدىڭ بىرقاتار ايماقتارىنا جول تارتقان. جاڭا كاسىپورىننىڭ دا نەگىزگى مىندەتى ەلىمىزدىڭ اۋىل­شا­رۋا­شىلىعى سالاسىن قاجەتتى تەحنيكامەن قامتاماسىز ەتۋ بولاتىن. وتكەن جىلدىڭ ماۋسىم ايى­نىڭ ەكىنشى ونكۇندىگىنىڭ سوڭىندا سەمەيگە قازاقستان رەسپۋبليكا­سى­نىڭ پرەزيدەنتى نۇرسۇلتان نازارباەۆ كەلىپ وسىنداعى ەرتىس وزە­نى ايرىعىنداعى ارالدا يادرولىق سىناق قۇرباندارىنا ارناپ ور­ناتىلعان «ولىمنەن دە كۇشتى» مونۋمەنتى باسىندا سان مىڭداعان ادام قاتىسقان ميتينگ وتكىزىلىپ، ەلباسىمىزدىڭ العاشقى جارلىق­تارىنىڭ بىرىمەن سەمەي اتوم پو­ليگونىنىڭ جابىلعان كۇنى – 29 تامىزدى يادرولىق سىناقتارعا قار­سى حالىقارالىق ءىس-قيمىل كۇنى دەپ جاريالاۋ تۋرالى بىرىككەن ۇلت­تار ۇيىمىنا ۇسىنىس جاسال­عانى، سول تىڭ باستامانىڭ اقىر سوڭى مارتەبەلى ۇيىم تاراپىنان قولداۋ تاپقانى بارشامىزعا ءما­لىم. بۇل ارادا ايتايىق دەگەنىمىز ەلباسى وسى ساپارىندا جاڭا كا­سىپ­ورىنعا اتباسىن تىرەۋگە ۋاقىت تابا بىلگەن. جانە ءوز قولىمەن جا­ڭادان شىق­قان ون تراكتوردى شى­عىس قازاق­ستان وبلىسىنىڭ كوپ بالالى فەرمەرلەرىنە تابىستاعان. راس، ولار­دىڭ ىشىندە ءبىر ورالمان دا بولدى. «سەماز» زاۋىتى تۋرالى بۇ­رىن دا، ودان كەيىن دە جازعانبىز. جۋىردا ەندى اتالعان كاسىپورنىنا كىرىپ شىعۋ تۋرالى «قازاگرو­قار­جى» اكتسيونەرلىك قوعامىنىڭ شى­­عىس قازاقستان وبلىستىق ءبو­لىم­شەسىنىڭ ديرەكتورى تيمۋر سا­پارعاليۆتىڭ تاراپىنان ۇسىنىس جا­سالعان-دى. سويتسەك، مۇنىڭ دا سەبەبى جوق ەمەس ەكەن. ياعني، بۇ­لاردىڭ اراسىندا تىعىز بايلانىس بار كورىنەدى. رەسپۋبليكامىزدىڭ اۋىل شارۋاشىلىعىن قاجەتتى تراك­تورمەن قامتاماسىز ەتۋ ءجو­نىن­دەگى ءبىزدىڭ جوبامىزعا ەلىمىز­دىڭ تۇكپىر-تۇكپىرىنەن ۇسىنىستار كوپتەپ ءتۇستى. سول ۇسىنىستار قا­تاڭ تۇردە سۇرىپتالعاندا «سەم­از» زاۋىتى تالاپتان شىعىپ، جە­ڭىمپاز اتاندى دەيدى تيمۋر نۇر­عازى ۇلى. ويتكەنى، بۇلاردىڭ تراك­تور­لارىنىڭ دۆيگاتەلى قۋاتتى كو­رىنەدى. جالپى العاندا دا ساپا­سى جامان ەمەس. سونىڭ ايعاعىن­داي، بيىلعى جىلى وتكىزىلگەن «قا­را­وتكەل» جارمەڭكەسىندە بۇ­لار­دىڭ ءونىمى ۇزدىك دەپ تانىلىپ، رەسپۋبليكا اۋىل شارۋاشىلىعى مي­نيستر­لىگىنىڭ «ەڭ ۇزدىك وتاندىق اۋىل شارۋاشىلىعى تەحنيكاسىن وندىرۋشىگە» ارنالعان ديپلومى مەن ارنايى مەدالى تابىس ەتىلىپتى. وسكەمەننەن كەلگەن قوناق سولاي دەسە، ءوز كەزەگىندە اسەمحان سە­رىكحان ۇلى دا ارىپتەسىنە ريزا­شى­لىعىن ءبىلدىرىپ جاتتى. مۇنى جانە ولاردىڭ ءبىر-بىرىنە دەگەن شىن ىقىلاسى ما دەدىك. ايتتى ايت­پادى، «قازاگروقارجى» قوعامى اتالعان زاۋىتتىڭ ەڭ بەلسەندى تۇ­تىنۋشىسى كورىنەدى. ايتالىق، ءۇس­تىمىزدەگى جىلدىڭ ون ايىنا جەتەر جەتپەس ۋاقىت ىشىندە قوعام  بۇ­لار­دان ءۇش ءتۇرلى «بەلارۋس» تراك­تورىنىڭ 270-ءسىن العان. بۇل جال­پى شىعارىلعان تراكتوردىڭ جار­تىسىنان استامى دەگەن ءسوز. ونىڭ العاشقى ەكى ءتۇرىنىڭ باعاسى ورتا ەسەپپەن 2،5 ميلليون تەڭگە ءمول­شە­رىندە بولسا، ال «بەلارۋس» 1221.1 ماركىلى تراكتورىنىڭ باعاسى 5،5 ميلليون تەڭگەگە جەتىپ جىعىلادى. مۇنى ءبىر دەسەڭىز، ەكىنشىدەن زاۋىتتى قارجىلاندىرىپ وتىر­عان دا وسى «قازاگروقارجى» اكتسيونەرلىك قوعامى. بىلتىرعى جى­لى قوعام تاراپىنان زاۋىتقا 522 ميل­ليون تەڭگەدەن استام، ال بي­ىلعى جىلى 300 ميلليون تەڭگە قارجى اۋدارىلعان. رەسپۋبليكا بوي­ىنشا 9 مىڭ تراكتور قاجەت كو­رىنەدى. ال بۇل دەگەنىڭىز ءبىر-ەكى جىل­دىڭ شارۋاسى ەمەس. سوندىق­تان زاۋىتقا جۇمىس جەتىپ جاتىر. بۇگىنگى كۇنى ءجۇز شاقتى كىسىنى جۇ­مىسپەن قامتاماسىز ەتىپ وتىرعان بۇل كاسىپورىننىڭ بولاشاعى زور. ءيا، بىرلىك بار جەردە تىرلىك بار. داۋلەت سەيسەن ۇلى. سەمەي.
سوڭعى جاڭالىقتار

قىزىلجارداعى ماعجان كورمەسى

رۋحانيات • بۇگىن، 21:02

قاراتورعاي

ادەبيەت • بۇگىن، 21:00

كۇيدەن تۋعان ولەڭ

رۋحانيات • بۇگىن، 20:50

گوشە رەاكتسياسى

قوعام • بۇگىن، 20:48

سۋ تاسقىنىنىڭ الدىن الۋ جۇمىستارى

توتەنشە جاعداي • بۇگىن، 20:40

افريكاداعى قازاق كينوسى

كينو • بۇگىن، 20:34

تارازى باسى تەڭ

سپورت • بۇگىن، 20:30

العاشقى كۇنى – ەكى قولا

سپورت • بۇگىن، 20:25

التىننان القا تاقتى

سپورت • بۇگىن، 20:25

ۇقساس جاڭالىقتار