27 قازان، 2010

ءتارتىپ ورناماي، ىستە بەرەكە بولمايدى

346 رەت كورسەتىلدى
كەمشىلىكتەرگە جول بەرگەندەر مەن قارجىنى تالان-تاراجعا سالعاندار ءتيىستى جازالارىن الۋلارى كەرەك كەشە استانادا ادىلەت مينيسترلىگىنىڭ عيماراتىندا بەينەكونفەرەنتسيا رەجىمىندە “الەۋمەتتىك ماڭىزدى مەملەكەتتىك باعدارلامالاردىڭ ىسكە اسىرىلۋ بارىسىنا پارتيالىق باقىلاۋ ۇيىمداستىرۋ بويىنشا “نۇر وتان” حدپ فيليالدارىنىڭ قىزمەتى تۋرالى” ماسەلەنى قاراستىرعان پارتيالىق باقىلاۋ كوميتەتىنىڭ كەزەكتى وتىرىسى بولىپ ءوتتى. اتالعان كوميتەتتىڭ مىندەتى – پارتيا توراعاسى ن.ءا.نازارباەۆ­تىڭ تاپسىرماسى بويىنشا جۇزەگە اسىرىلىپ جاتقان “جول كارتاسى – 2010”، “100 مەكتەپ، 100 اۋرۋ­حانا”، “اۋىز سۋ”، “ۇدەمەلى ين­دۋس­تريالىق-ين­نوۆاتسيالىق دامۋ”، “باتىس ەۋ­روپا – باتىس قىتاي حا­لىقارالىق ترانزيتتىك ءدالىزى”، “تۇرعىن ءۇي قۇرىلىسىن دامىتۋ”، “بىرىڭعاي دەنساۋلىق ساقتاۋ جۇيە­سى”، “نۇرلى كوش”، “بالاپان” جانە “ازيادا – 2011” سياقتى الەۋمەتتىك ماڭىزدى مەملەكەتتىك باع­دارلامالاردىڭ ورىندالۋىنا باقىلاۋ جۇرگىزۋ. وسى ماقساتتا 4139 پارتيا باقىلاۋ بەكەتى قۇ­رىلسا، نىسانداردىڭ قولدانىسقا بەرىلۋىنە بايلانىستى سونىڭ 2020-سى ءوز جۇمىستارىن توقتاتىپ وتىر. سونداي-اق وڭىرلەردە حالىققا قىزمەت كورسەتۋ ورتالىقتارىندا، جول پوليتسياسى بولىمدەرىندە جانە جەرگىلىكتى جول جوندەۋ ۋچاس­كە­لەرىندە جىلجىمالى پارتيالىق باقىلاۋ بەكەتتەرى قۇرىلعان. “نۇر وتان” حدپ پارتيالىق باقىلاۋ كو­ميتە­تىنىڭ توراعاسى بوران را­حىمبەكوۆ باقىلاۋ بەكەتتەرىنىڭ پارتيالىق با­قى­لاۋدىڭ ءتيىمدى تەتىكتەرىنىڭ ءبىرى ەكەن­دىگىن  ەرەكشە اتاپ ءوتتى. ايتسە دە كەمشىلىكتەر دە جوق ەمەس. ول ءجو­نىندە كوميتەت ءتور­اعاسىنىڭ ورىن­با­سا­رى وڭال­بەك ساپيەۆ مالىمدەپ بەردى. كوميتەت توراعاسى ورىنبا­سا­رى­نىڭ كەلتىرگەن مالىمەتتەرىنە قاراعاندا، مەمساتىپ الۋ كونكۋرس­تارىن وتكىزۋ كەزىندە، نىساندار قۇرىلىسىن جۇرگىزۋگە جاعداي جاساۋ مەن ەڭبەكاقى تولەۋ جانە مەردىگەر ۇيىمداردىڭ ءوز مىندەت­تە­مە­لەرىن ورىنداۋ بارىسىندا ءبىر­قاتار كەمشىلىكتەر ورىن العان. باقىلاۋ بەكەتتەرى باسشىلارىنىڭ جىل باسىنان تەندەرلەر مەن وزگە دە پروتسەدۋرالارعا قاتىسۋى تۋرالى ۇسىنىس ءالى دە اياقسىز قالىپ كەلەدى. سونىڭ سالدارىنان كەيبىر كوم­پا­نيالار وڭىرلەردە قاجەتتى كۇشى جەتپەسە دە كوپتەگەن قوسىمشا مەر­دىگەرلەردى جۇمىسقا تارتۋدا. ماسەلەن، بار جوعى 292 شا­قى­رىمعا سوزىلعان “جەتىگەن – قور­عاس” تەمىر جول جەلىسىن سالۋدا 3 مىڭ باس مەردىگەر جانە 40 قو­سىمشا مەر­دىگەر تەر توككەن. ال جامبىل وبلى­سىن­دا 17 تەندەردىڭ جەڭىمپازى بو­لىپ تانىلعان “ارمستروي” جشس جول سالۋدا ول­قىلىققا جول بەرگەن. سول سياق­تى قىزىلوردا وبلىسىندا 14 لوتتىڭ جەڭىمپازى دەپ تانىلعان “رەال پليۋس” جشس جۇمىسىنىڭ سا­پاسىزدىعى انىقتالعان. قوس­تا­ناي وبلىسىندا “جاياۋ جۇرگىنشى جولىن جوندەۋ” جوباسى بويىنشا مەم­لە­كەت­تىك ساتىپ الۋدا 52 ميل­ليون تەڭ­گە­نىڭ دۇرىس جۇمسالما­عانى بەلگىلى بولىپ وتىر ەكەن. وسى وڭىردە وب­لىس­تىق اكىمدىكتىڭ قۇرىلىس باسقار­ما­سى تاراپىنان كوپسالالى اۋرۋحا­نا سالۋدا ورىن­سىز جۇمسالعان قار­جى­نى جابا سالعانى دا ايتىلماي قالمادى. ول ول ما، ءتىپتى پايدالانۋعا بەرىلگەن نىسانداردىڭ جارامسىز قالىپ  جاتاتىندارى دا از ەمەس ەكەن. ماسەلەن، “اۋىز سۋ” باع­دارلاماسى شەڭبەرىندە سالىنعان سولتۇستىك قازاقستان وبلىسىنىڭ سميرنوۆو اۋدانى ورتالىعىنداعى سۋ ايداعىش مۇنارا اراعا بىرنەشە اي سالىپ قۇلاپ ءتۇسىپتى. شىم­كەنت­تە جاڭادان سالىنعان سۋ قۇبىرى جەلىسى جارىلسا، مەملەكەت تارا­پى­نان وعان جۇمسالعان قارجى كولەمى 700 ميلليون تەڭگەنى قۇراپتى. اقتوبە وبلىسىنىڭ شالقار اۋدا­نى ورتالىعىندا قۇرىلىس سالىن­عان جەر  ساپاسىز بولىپ شىققان. سونىمەن قاتار، مەملەكەتتىك سا­تىپ الۋ، جوبا-سمەتالىق قۇجات­تار­دى دايىنداۋ بارىسىندا كوپتەگەن قاتەلىكتەرگە جول بەرىلگەن. سور­اقى­سى سول، مىسالى، پاۆلودار وب­لىسىندا ايماقتىق كارديوحير­ۋر­گيالىق ورتالىق 4 قاباتتى بولۋى ءتيىس بولسا، ونىڭ ورنىنا 3 قا­باتتى عيمارات سالىنعان. مۇنداي كەمشىلىكتەر وزگە دە وڭىرلەردە بارشىلىق كورىنەدى. پارتيا مەن قارجى پوليتسياسى بىرلەسە جۇرگىزگەن اكتسيا بارى­سىندا كوپتەگەن كەمشىلىكتەر انىق­تالىپ، اقمولا وبلىسىندا ون قىلمىستىق ءىس قوزعالسا، قوستاناي جانە وڭتۇستىك قازاقستان وبلىس­تارىندا – ءتورت، ال ماڭعىستاۋ وب­لىسىندا ەكى جەرگىلىكتى اتقارۋ­شى ورگان باسشىسىنا قاتىستى ەكى قىلمىستىق ءىس قوزعالىپتى. باتىس قازاقستان وبلىسىندا تاعى بەس لاۋازىم يەسىنە قىلمىستىق ءىس قوزعالعان. قىزىلوردا وبلىسىندا ء“ناسىپ سەرۆيس-مپ” جشس ديرەكتورى قۇنى 835 مىڭ تەڭگەلىك مەديتسينالىق قۇرال-جابدىقتاردى وتىرىك ورىندالدى دەپ اتقارىلعان جۇمىس اكتىسىنە قوسقانى ءۇشىن دە ۇستىنەن قىلمىستىق ءىس قوزعالعانى بەلگىلى بولىپ وتىر. وتىرىستا بۇدان باسقا ايماقتىق پارتيا فيليالدارىنىڭ قىزمەتى تال­دا­نىپ، جەرگىلىكتى اتقارۋ ور­گان­دا­رى­مەن ءوز­ارا ءىس-ارەكەت ەتۋ ماسە­لە­لەرى تال­قى­لان­دى. وڭىرلەر جەم­قور­­لىق­قا قار­سى مەديا ورتالىعى جۋرناليستىك زەرت­تەۋلەرىمەن تانى­سۋ­عا مۇمكىندىك الدى. جۇمىس ءنا­تيجەسىنە بايلا­نىس­تى ازىرلەنگەن ۇسىنىمدار ەندى ۇكى­مەت­كە، وبلىس­تاردىڭ، استانا جانە الماتى قالالارىنىڭ، ايماقتىق پار­تيا فيليالدارىنىڭ باسشى­لارىنا جولداناتىن بولادى. اسقار تۇراپباي ۇلى.
سوڭعى جاڭالىقتار

قاراتورعاي

ادەبيەت • بۇگىن، 21:00

كۇيدەن تۋعان ولەڭ

رۋحانيات • بۇگىن، 20:50

گوشە رەاكتسياسى

قوعام • بۇگىن، 20:48

سۋ تاسقىنىنىڭ الدىن الۋ جۇمىستارى

توتەنشە جاعداي • بۇگىن، 20:40

افريكاداعى قازاق كينوسى

كينو • بۇگىن، 20:34

تارازى باسى تەڭ

سپورت • بۇگىن، 20:30

العاشقى كۇنى – ەكى قولا

سپورت • بۇگىن، 20:25

التىننان القا تاقتى

سپورت • بۇگىن، 20:25

ۇقساس جاڭالىقتار