تاراپتار ونەركاسىپ, مۇناي-گاز, اگروونەركاسىپ سالالارىنداعى ىنتىماقتاستىقتى دامىتۋ جانە ينۆەستيتسيا تارتۋ ماسەلەسىن تالقىلادى. ناريمان تورەعاليەۆ اقجايىق وڭىرىندە ينۆەستيتسيالىق احۋال جاقسى ەكەنىن, قازىردىڭ وزىندە بىرنەشە قىتاي ينۆەستورىنىڭ قاتىسۋىمەن بىرقاتار ءىرى جوبا جۇزەگە اسىپ جاتقانىن جەتكىزدى.
اكىمنىڭ ايتۋىنشا, وبلىستا ينۆەستيتسيالىق جوبالاردى ىسكە اسىرۋ ءۇشىن قولايلى جاعداي قالىپتاسقان, شەتەلدىك ينۆەستورلارعا جان-جاقتى قولداۋ كورسەتىلەدى.
«پرەزيدەنت قاسىم-جومارت كەمەل ۇلى توقاەۆتىڭ تاپسىرماسىمەن ءبىز وڭىردەگى ينۆەستيتسيالىق احۋالدى ودان ءارى جاقسارتىپ, قىزىعۋشىلىق تانىتقان كومپانيالارعا جاڭا مۇمكىندىكتەر ۇسىنىپ وتىرمىز. قىتايلىق ينۆەستورلارمەن بىرلەسىپ, سۇيىق مەتانول, تسەمەنت زاۋىتتارى, گاز تۋربينالى جانە جەل ەلەكتر ستانسالارىن سالۋ جانە وزگە دە ماڭىزدى جوبالاردى ىسكە اسىرىپ جاتىرمىز. جۇمىس ورىندارىن اشامىن, ءوندىرىستى دامىتامىن دەگەن ينۆەستورلار ءۇشىن ارنايى ەكونوميكالىق ايماق بار», دەدى ناريمان تورەعاليەۆ.
ءوز كەزەگىندە ۆان سينۆەي دە قازاقستان مەن لياونين پروۆينتسياسى اراسىنداعى ءوزارا ءتيىمدى ارىپتەستىكتى ودان ءارى نىعايتۋعا دايىن ەكەنىن ايتتى. لياونين پروۆينتسياسىنىڭ گۋبەرناتورى قازاقستان مەن قىتاي اراسىنداعى ستراتەگيالىق ارىپتەستىك وڭىرارالىق بايلانىستىڭ دامۋىنا سەرپىن بەرىپ وتىرعانىن اتاپ ءوتتى.
«قحر توراعاسى سي تسزينپين ەكى ەل ءبىر-بىرىنە سەنىم ارتاتىن ستراتەگيالىق سەرىكتەس ەكەنىن ۇنەمى اتاپ وتەدى. كەيىنگى جىلدارى لياونين ولكەسى مەن قازاقستان اراسىنداعى بايلانىس بەكي ءتۇستى. بىلتىر ەكىجاقتى ساۋدا اينالىمى 2,7 ميلليارد يۋانعا جەتتى. سىزدەردىڭ حالىقارالىق باۋىرلاس قالالار فورۋمىنا كەلۋىڭىز ورتاق ماقسات جولىنداعى شىنايى ىقىلاستى بىلدىرەدى», دەدى ۆان سينۆەي.
ايتقانداي, باتىس قازاقستان وبلىسىنىڭ دەلەگاتسياسىنىڭ ساپارى حالىقارالىق باۋىرلاس قالالار فورۋمىمەن تۇسپا-تۇس كەلدى. دەلەگاتسيا قۇرامىندا مەملەكەتتىك ورگانداردىڭ, بيزنەس قاۋىمداستىقتاردىڭ, اۋىل شارۋاشىلىعى, قۇرىلىس جانە جول سالاسىنىڭ وكىلدەرى بار.
قازاقستاننىڭ جاڭا ينۆەستيتسيالىق تسيكلى: ەكونوميكالىق لوگيكا جانە جەكە كاپيتالدىڭ ءرولى
باتىس قازاقستان وبلىسىنىڭ كاسىپكەرلىك جانە يندۋستريالىق-يننوۆاتسيالىق دامۋ باسقارماسىنىڭ باسشىسى نۇرجان وتەپباەۆ بۇل فورۋم وڭىرارالىق سەرىكتەستىكتى نىعايتۋعا جانە جاڭا ينۆەستيتسيالىق مۇمكىندىكتەردى قاراستىرۋعا جول اشاتىنىن ايتتى.
ء«بىز لياونين باۋىرلاس جانە ىنتىماقتاس وڭىرىمەن سەرىكتەستىكتى تەرەڭدەتۋ ماقساتىندا وسى ءىرى فورۋمعا قاتىسىپ وتىرمىز. دەلەگاتسيا قۇرامىندا 24 ادام بار, ولاردىڭ ىشىندە ءىرى كاسىپكەرلەر, اۋىل شارۋاشىلىعى, قۇرىلىس, جول سالاسىنىڭ وكىلدەرى بار. سونداي-اق, اۋدان اكىمى, باسقارما باسشىلارى جانە اكىمنىڭ ورىنباسارلارى قاتىسىپ وتىر. ءبىزدىڭ باستى مىندەتىمىز – ينۆەستيتسيا تارتۋ, ەكى ءوڭىر اراسىنداعى ەكونوميكالىق كوپىردى نىعايتۋ. فورۋم اياسىندا ءبىز باۋىرلاستىق بايلانىستى كۇشەيتىپ, مەموراندۋمدارعا قول قويۋعا نيەتتىمىز. سونىمەن بىرگە, سينچجوۋ جانە ورال قالالارى اراسىندا جالپى ىنتىماقتاستىق باعىتىندا ساۋدا, مادەنيەت, سپورت, ءبىلىم جانە دەنساۋلىق ساقتاۋ باعىتىندا ماڭىزدى جوبالاردى ىسكە اسىرۋدى جوسپارلاپ وتىرمىز», دەدى نۇرجان وتەپباەۆ.
كەزدەسۋ قورىتىندىسىندا تاراپتار وندىرىستىك كووپەراتسيانى دامىتۋعا, ينۆەستيتسيالىق جوبالاردى بىرلەسىپ جۇزەگە اسىرۋعا جانە مادەني-گۋمانيتارلىق بايلانىستى كەڭەيتۋگە ءوزارا قىزىعۋشىلىق ءبىلدىردى.
