پسيحولوگ: ينتەرنەتكە تاۋەلدىلىك پەن لۋدومانيانىڭ ۇقساستىعى كوپ

DataReportal اناليتيكالىق پلاتفورماسىنىڭ دەرەگىنشە, ەلىمىزدە Instagram الەۋمەتتىك جەلىسىنىڭ 13,1 ملن, Facebook-ءتىڭ – 2,50 ملن, ال TikTok جەلىسىنىڭ 18 جاستان اسقان 16,9 ملن پايدالانۋشىسى بار. ميلليونداعان حالىق كۇنىگە سمارتفوننىڭ بەتىن سىرعىتىپ, شەگى مەن شەتى جوق جەلىنىڭ شىرماۋىندا وتىر. وسى ورايدا, بۇرىن Google كومپانياسىندا جۇمىس ىستەگەن, قازىر امەريكاندىق تەحنولوگيا ەتيكاسىنىڭ مامانى تريستان ءحارريستىڭ كەڭ تاراعان پىكىرى ەسكە تۇسەدى.

«الەۋمەتتىك جەلىلەر ءبىزدىڭ نازارىمىز ءۇشىن باسەكەلەسەدى. ولار پسيحولوگياداعى وسال تۇستاردى پايدالانىپ, ەكران الدىندا كوبىرەك ۋاقىت وتكىزۋگە يتەرمەلەيدى», دەگەن ەدى.

«كيبەر تۇمار»: ينتەرنەتكە تاۋەلدىلىكتىڭ الدىن الۋ

ول سونداي-اق شەكسىز لەنتا, لايك, حابارلاما سياقتى فۋنكتسيالار ادامنىڭ ميىنداعى ماراپاتتاۋ مەحانيزمىن ىسكە قوساتىنىن بىرنەشە رەت ايتقان.

Google كومپانياسىنىڭ اگەنتى نۇرجول تابيعات تا وسى پىكىرمەن كەلىسەدى. ونىڭ ايتۋىنشا, عالامتوردى سانالى تۇردە, ۋاقىتىمەن پايدالانۋ ءار ادامنىڭ وزىنە بايلانىستى.

«مەنىڭ ويىمشا, ينتەرنەتكە تاۋەلدىلىك كەزدەيسوق پايدا بولمايدى. قازىر بارلىق سايتتار مەن قوسىمشالار ادامنىڭ نازارىن مۇمكىندىگىنشە ۇزاق ۇستاپ تۇرۋ ءۇشىن ءوزارا باسەكەلەسەدى. ولار قولدانۋشىنىڭ ارەكەتتەرىن تالداپ, قىزىعۋشىلىعىنا ساي ءتۇرلى كونتەنت ۇسىنىپ وتىرادى, سوندىقتان ادام بايقاماي كوپ ۋاقىتىن جەلىدە وتكىزىپ قويۋى مۇمكىن. بىراق سوڭعى شەشىم ءبارىبىر ادامنىڭ وزىندە, سوندىقتان ينتەرنەتتى سانالى تۇردە پايدالانۋ ماڭىزدى», دەيدى نۇرجول تابيعات.

ادەتتە, تەلەفونعا تەلمىرىپ, ىشىندەگى جەلىلەردى اقتارىپ وتىرا بەرۋ جاي قىزىعۋشىلىق نەمەسە ۋاقىت وتكىزۋ بولىپ كورىنگەنىمەن ماماندار ونىڭ بىزگە بىلىنبەيتىن تاۋەلدىلىك ەكەنىن ايتادى. ماسەلەن شەكسىز جاڭالىقتار تاسپاسىن ويلاپ تاپقان باعدارلاماشىنىڭ ءبىرى ازا راسكيننىڭ ايتۋىنشا, بۇل – پسيحولوگيالىق مەحانيزم.

«ەگەر ءسىز ەكراندى تومەن سىرعىتا بەرسەڭىز, كەلەسىدە نە شىعاتىنىن بىلمەيسىز. بۇل كازينو اۆتوماتتارىنا ۇقساس پسيحولوگيالىق مەحانيزم», دەيدى ول.

بۇل پىكىردى پسيحولوگ انارگۇل يبرايىمبەكوۆا دا قۇپتايدى. مامان ينتەرنەتكە تاۋەلدىلىك پەن لۋدومانيانىڭ ۇقساستىعى كوپ ەكەنىن ايتادى. ماسەلەن, لۋدومان ۇتىس كۇتسە, ينتەرنەتكە تاۋەلدى ادام جاڭا ۆيدەو, حابارلاما نەمەسە جاڭا ويىن دەڭگەيىن كۇتەدى. ەكەۋىندە دە مي ۇنەمى جاڭا اسەر مەن ماراپات ىزدەيدى.

«لۋدومانيا اقشانى ۇرلايدى, ال ينتەرنەتكە تاۋەلدىلىك ۋاقىتتى, زەيىندى جانە شىنايى ءومىردى ۇرلايدى. بۇل – كوزگە كورىنبەيتىن تاۋەلدىلىك. ول الكوگول, تەمەكى نەمەسە لۋدومانيا سياقتى ادامنىڭ ميىنداعى ءلاززات الۋ جۇيەسىنە اسەر ەتەدى. ينتەرنەتكە تاۋەلدىلىك پەن لۋدومانيانىڭ ۇقساستىعى وتە كوپ, سەبەبى ەكەۋى دە ميدى ماراپاتتاۋ (دوفامين) جۇيەسىنە اسەر ەتەدى», دەيدى پسيحولوگ.

قازاقستانداعى لۋدومانيا مەن ويىن بيزنەسى: وتاندىق عالىمداردىڭ عىلىمي ەڭبەكتەرى تانىستىرىلدى

ونىڭ ايتۋىنشا, ەكەۋىندە توقتاتۋ قيىن.

«لۋدومان «سوڭعى رەت وينايمىن» دەيدى, بىراق قايتادان وينايدى. ينتەرنەتكە تاۋەلدى ادام «5 مينۋت قارايمىن» دەپ, بىرنەشە ساعاتىن وتكىزىپ الادى. دوفامينگە تاۋەلدىلىك جوعارى بولىپ كەلەدى. لۋدومانيادا ۇتىس ءۇمىتى دوفامين بولەدى. ال ينتەرنەتتە جاڭا ۆيدەو, لايك, حابارلاما نەمەسە ويىن جەتىستىگى بەرەدى. لۋدومان بۇرىنعىداي اسەر الۋ ءۇشىن كوبىرەك وينايدى. ينتەرنەتكە تاۋەلدى ادام بۇرىنعىدان ۇزاق ۋاقىت ەكران الدىندا وتىرادى. ەكەۋىندە دە ادام شىنايى ومىردەن قاشادى, كۇيزەلىس, جالعىزدىق نەمەسە پروبلەمالاردى ۇمىتۋ ءۇشىن تاۋەلدى ارەكەتكە جۇگىنەدى», دەيدى انارگۇل يبرايمبەكوۆا.

پسيحولوگتىڭ ايتۋىنشا, لۋدومان ۇتىلىستان مازاسىزدانسا, عالامتورعا بايلانعان جان تەلەفونى مەن ينتەرنەتى بولماعاندا اشۋعا بوي الدىرادى. جاقىن ادامدارىنا كوڭىل ءبولۋدى ازايتىپ, وتباسىلىق قارىم-قاتىناسى قيىنداي تۇسەدى.

«ينتەرنەتكە تاۋەلدىلىك – ول ادامنىڭ ميىن تەز ءارى وڭاي ءلاززات الۋعا ۇيرەتەدى. سونىڭ سالدارىنان ۇزاق كۇش سالۋدى قاجەت ەتەتىن ىستەر قىزىقسىز بولىپ كورىنە باستايدى, دەيدى ول.

قازىر تۋا سالىپ, تەلەفوننىڭ «قۇلاعىندا» وينايتىن بالا كوپ. ولار ينتەرنەت ارقىلى وينالاتىن ويىنداردى مەڭگەرىپ العانى سونشا, سول ويىننىڭ ىشىندە ءوزىن سۋدا ەركىن جۇزگەن بالىقتاي سەزىنەدى. الايدا تەلەفوننىڭ قۋاتى تاۋسىلىپ نەمەسە جەڭىلىس تاپسا, جان-جاعىنىڭ استاڭ-كەستەڭىن شىعارادى.

«بالالاردىڭ زەيىنى السىرەيدى, ءتىلى شىقپاي, قيالى مەن شىعارماشىلىق ويىنى ازايادى. قاتارلاستارىمەن قارىم-قاتىناس جاساۋ داعدىسى السىرەيدى. ساباقتا ۇزاق وتىرا الماي, نۇسقاۋدى سوڭىنا دەيىن تىڭدامايدى. سونىمەن قاتار ەموتسيانى باسقارا الماي, تەلەفوندى الىپ قويعاندا اشۋلانىپ, كۇتە المايدى. قالاۋى بىردەن ورىندالماعان جاعدايدا جىلايدى نەمەسە اگرەسسيا كورسەتەدى», دەپ ءتۇسىندىردى پسيحولوگ.

لۋدومانيا: زاڭنىڭ جاۋاپكەرشىلىگى بارىمىزگە ورتاق

سونداي-اق بالادا الەۋمەتتىك داعدىلاردىڭ دامۋى تەجەلۋى مۇمكىن:

• كوزبە-كوز سويلەسۋ قيىندايدى;
• ەمپاتيا (باسقانى ءتۇسىنۋ) ءالسىز داميدى;
• قاقتىعىستى شەشۋ داعدىلارى قالىپتاسپايدى.

ال ەرەسەكتەردە:

• اقپاراتتىق شارشاۋ;
• كۇنى بويى اقپارات قاراعان ادام ءوزىن دەمالعانداي سەزىنگەنىمەن, ميى شارشاپ تۇرادى;
• ۇيقى بۇزىلادى;
• كونتسەنتراتسيانىڭ تومەندەۋى;
• كىتاپ وقۋ, ەسەپ جازۋ, قۇجاتپەن جۇمىس ىستەۋ قيىندايدى;
• جالعىزدىق سەزىمى, الەۋمەتتىك جەلىدە كوپ ۋاقىت وتكىزۋ شىنايى قارىم-قاتىناستى الماستىرا المايدى.

لۋدومانيامەن كۇرەس: بىرىڭعاي ەسەپكە الۋ جۇيەسى دەگەن نە

ماماننان كەڭەس

پسيحولوگ ماماننىڭ ايتۋىنشا, ينتەرنەتكە تاۋەلدىلىك ول ادامنىڭ ىشكى قاجەتتىلگىن, ياعني, جالعىزدىق, سترەسس, مازاسىزدىق, ءوزىن باعالاۋدىڭ تومەندىگىن ۋاقىتشا باسۋدىڭ ءتاسىلى. سوندىقتان وزىمىزگە ۋاقىتشا قۋانىش سىيلايمىز دەپ ودان ءارى تۇڭعيىققا باتۋدىڭ كەرەگى جوق. كەرىسىنشە, تاۋەلدىلىكتەن ارىلاتىن جول ىزدەۋ قاجەت. ول ءۇشىن ەڭ الدىمەن تەلەفوننىڭ ىشىندەگى قاجەتسىز باعدارلامالاردى ءوشىرىپ, باسقالارىن ءبىر پاپكاعا جيناپ, ءار اپتا سايىن ەڭ از پايدالاناتىنىن وشىرگەن ابزال. سوندا وزىڭىزگە نە كەرەگىن ناقتى بىلەتىن بولاسىز. الايدا تاۋەلدىلىكتەن قۇتىلامىن دەپ, ءبارىن بىردەن تىيىپ تاستاماعان ءجون.