فوتو: istockphoto.com
تەرگەۋ مالىمەتىنشە, الاكول اۋدانىنىڭ تۇرعىنى بىرنەشە اي بويى قىزدى اڭدىپ, سەزىمىن ءبىلدىرىپ قىر سوڭىنان قالماعان. بويجەتكەننىڭ قارسىلىعىنا قاراماستان الەۋمەتتىك جەلىلەر ارقىلى مازالاپ, تۇرمىسقا شىعۋعا ۇسىنىس جاساعان. سوت دەرەگىنە سايكەس, مۇنداي ارەكەتتەر جابىرلەنۋشىنىڭ بويىندا قورقىنىش پەن الاڭداۋشىلىق تۋدىرعان.
كەيىن جاعداي ۋشىعىپ, ەر ادام دۇكەندەردىڭ بىرىندە قىزعا ءتىل تيگىزگەن. وقيعاعا كۋا بولعان ازامات قىزعا اراشا تۇسكەن ساتتە ونى پىشاقپەن قورقىتقان. كوپ ۇزاماي ونى پوليتسيا قىزمەتكەرلەرى ۇستادى.
«كەشەندى پسيحياتريالىق ساراپتامانىڭ قورىتىندىسىنا سايكەس, ايىپتالۋشى «پارانويدتى شيزوفرەنيا» دياگنوزىمەن پسيحيكالىق اۋرۋعا شالدىققان. ساراپشىلار ونىڭ قوعامدىق قاۋىپتى ءىس-ارەكەتتەردى جاساعان كەزدە ءوز ارەكەتتەرىنىڭ ناقتى سيپاتى مەن قوعامدىق قاۋىپتىلىگىن ۇعىنا الماعانىن جانە ولاردى باسقارا الماعانىن انىقتاعان», دەلىنگەن سوت حابارلاماسىندا.
ناتيجەسىندە الاكول اۋداندىق سوتى ونى قىلمىستىق جاۋاپكەرشىلىكتەن بوساتىپ, جالپى ۇلگىدەگى پسيحياتريالىق ستاتسيونارعا ءماجبۇرلى ەمدەۋگە جىبەرۋ تۋرالى شەشىم قابىلدادى.
تەرەزەدەن سىعالاپ, مازاسىن العان: اتىراۋ وبلىسىندا ستالكينگ تۋرالى جاڭا باپ نەگىزىندە ۇكىم شىقتى
ەسكە سالا كەتەيىك, ەلىمىزدە ستالكينگ ءۇشىن 200 اەك-كە دەيىن (865 مىڭ تەڭگە) ايىپپۇل قاراستىرىلعان. بۇعان دەيىن ىشكى ىستەر ءمينيسترىنىڭ ورىنباسارى سانجار ءادىلوۆ قايتالانعان ستالكينگتىك ارەكەتتەر ءۇشىن باس بوستاندىعىنان ايىرۋ جازاسى ەنگىزىلەتىنىن مالىمدەدى.
