فوتو: اشىق دەرەككوز
تۋريستەر اعىنىنىڭ ءوسىمى مەن زاڭنامالىق وزگەرىستەر
ءمينيستردىڭ ايتۋىنشا, ەكوتۋريزمدى دامىتۋ – ۆەدومستۆو جۇمىسىنىڭ ەڭ ماڭىزدى باعىتتارىنىڭ ءبىرى. سوڭعى جىلدارى ەلىمىزدىڭ تابيعي اۋماقتارىنا كەلۋشىلەر سانى ايتارلىقتاي ارتقان.
«ەگەر 2024 جىلى ەرەكشە قورعالاتىن تابيعي اۋماقتارعا 2,8 ملن ادام كەلسە, 2025 جىلى بۇل كورسەتكىش 3,7 ملن ادامدى قۇرادى. ءوسىم شامامەن 900 مىڭ كەلۋشىگە جەتتى», دەدى ۆەدومستۆو باسشىسى.
ءمينيستردىڭ ايتۋىنشا, بۇل كورسەتكىشتەر حالىقتىڭ تابيعات اياسىنداعى دەمالىستى, جاياۋ مارشرۋتتار مەن ەتنوتۋريزمدى ءجيى تاڭداي باستاعانىن ايعاقتايدى. بۇگىندە ۇلتتىق پاركتەر اۋماعىندا 179 تۋريستىك مارشرۋت پەن 42 ەكولوگيالىق سوقپاق جۇمىس ىستەپ تۇر.
سالانى دامىتۋ ماقساتىندا زاڭناماعا دا ماڭىزدى وزگەرىستەر ەنگىزىلگەن.
«اتالعان اۋماقتاردىڭ جەرلەرىن تۋريستىك وبەكتىلەرگە ينجەنەرلىك ينفراقۇرىلىمدى جوبالاۋ, سالۋ جانە قىزمەت كورسەتۋ ءۇشىن, ولاردى بوسالقى جەرلەرگە اۋىستىرماي, بەرۋگە مۇمكىندىك بەرەتىن نورما 2025 جىلعى 26 ماۋسىمنان باستاپ قولدانىسقا ەنگىزىلدى», دەدى ە. نىسانباەۆ.
سونداي-اق بيىلعى جىلدىڭ اقپان ايىندا ۋچاسكەلەردى ۇزاق مەرزىمدى پايدالانۋعا بەرۋدىڭ ۇلگىلىك شارتى بەكىتىلىپ, بارلىق 13 ۇلتتىق پارك بويىنشا ەكوتۋريزمدى دامىتۋ تۇجىرىمدامالارى ازىرلەنگەن.
تسيفرلاندىرۋ جانە «تازا تۋريزم» باعدارلاماسى
ءمينيستردىڭ ايتۋىنشا, جۇمىستىڭ اشىقتىعىن ارتتىرۋ ماقساتىندا سالانى تسيفرلاندىرۋ شارالارى بەلسەندى ءجۇرىپ جاتىر. قازىر 6 ۇلتتىق پاركتە 14 باقىلاۋ-وتكىزۋ پۋنكتى اۆتوماتتاندىرىلسا, اعىمداعى جىلى تاعى 11 پۋنكت بويىنشا جۇمىستار جالعاسىپ وتىر. بۇعان قوسا, بارلىق ۇلتتىق پاركتەر بانك سەرۆيستەرى ارقىلى ونلاين تولەم جۇيەسىنە قوسىلىپ, سايتتارعا ارنايى QR كودتار ورنالاستىرىلعان.
مەملەكەت باسشىسىنىڭ «تازا قازاقستان» باستاماسى اياسىندا «جاسىل دامۋ» اق-مەن بىرلەسىپ «تازا تۋريزم» باعدارلاماسى قولعا الىندى.
«ونىڭ ماقساتى – كەلۋشىلەردە تابيعاتقا ۇقىپتى قاراۋ جانە قالدىقتارمەن دۇرىس جۇمىس ىستەۋ مادەنيەتىن قالىپتاستىرۋ», دەدى مينيستر.
ءمينيستردىڭ ايتۋىنشا, شارىن جانە كولساي كولدەرىندەگى ءساتتى پيلوتتىق جوبادان كەيىن بۇل باعدارلاما ىلە-الاتاۋ, التىن-ەمەل, قارقارالى, سايرام-وگەم, كوكشەتاۋ, باياناۋىل جانە بۋراباي پاركتەرىنە كەڭەيتىلگەن. باعدارلاما اياسىندا كونتەينەرلەر, قوقىس جاشىكتەرى, اقپاراتتىق باننەرلەر مەن فاندوماتتار ورناتىلىپ, كەلۋشىلەرگە بيوىدىرايتىن پاكەتتەر تاراتىلىپ جاتىر. بيىل بۇل جۇمىستار قاتون-قاراعاي, بۇيراتاۋ, ۇلىتاۋ, جوڭعار-الاتاۋ جانە تارباعاتاي پاركتەرىندە جالعاسىن تابادى.
وڭىرلەردەگى ينفراقۇرىلىمدىق جوبالار
ءمينيستردىڭ ايتۋىنشا, جەرگىلىكتى اكىمدىكتەرمەن بىرلەسىپ بىرنەشە ءىرى ينفراقۇرىلىمدىق نىساندار ىسكە اسىرىلىپ جاتىر:
-
شىعىس قازاقستان وبلىسى: قاتون-قاراعاي ۇلتتىق پاركىندەگى داربى وزەنى ارقىلى وتەتىن كوپىر جوندەلدى. «ستارو-اۆستريسكايا» جولىنىڭ 45 شاقىرىمدىق بولىگىنىڭ 32,1 شاقىرىمىنا اعىمداعى جوندەۋ جۇرگىزۋ ءۇشىن جىل سايىن 200 ملن تەڭگەگە شارت جاسالدى.
-
سولتۇستىك قازاقستان وبلىسى: يمانتاۋ-شالقار كۋرورتتىق اۋماعىنا اپاراتىن 17,5 كم اۆتوجول رەكونسترۋكتسيالاندى. «كوكشەتاۋ» پاركىندە جاياۋ جۇرگىنشىلەر مەن ۆەلوسيپەد جولدارىن سالۋ جوسپارلانىپ وتىر.
-
الماتى وبلىسى: كولساي كولىنىڭ جاعالاۋ جەلىسى 130 ملن تەڭگەگە اباتتاندىرىلدى. ساتى اۋىلىنان قايىڭدى كولىنە دەيىنگى 12 كم اۆتوجولدىڭ قۇرىلىسى ءجۇرىپ جاتىر.
ينۆەستيتسيالىق جوبالار پورتفەلى جانە وزەكتى ماسەلەلەر
ءمينيستردىڭ ايتۋىنشا, الماتى ۇلتتىق پاركتەر توبىنىڭ تابىستى تاجىريبەسى نەگىزىندە 10 وڭىردە ىسكە اسىرىلاتىن 23 باسىم ينۆەستيتسيالىق جوبادان تۇراتىن پورتفەل قالىپتاسقان. جالپى اۋماعى 108,6 گەكتاردى قۇرايتىن بۇل جوبالارعا تارتىلاتىن جەكە ينۆەستيتسيا كولەمى 31,6 ملرد تەڭگەگە باعالانىپ وتىر.
«جوبالار ساپالى تۋريستىك ينفراقۇرىلىمدى: مارشرۋتتار مەن ەكوسوقپاقتاردى, ۆيزيت-ورتالىقتاردى, ەكو-قوناقۇيلەردى, گلەمپينگتەردى, كەمپينگتەردى, قازاق اۋىلدارىن جانە كاراۆانينگ ورىندارىن قۇرۋعا باعىتتالعان», دەدى مينيستر.
ءىرى جوبالاردىڭ قاتارىندا تۇركىستان وبلىسى سايرام-وگەم ۇلتتىق پاركىندەگى قاسقاسۋ (5 ملرد تەڭگە) جانە سايرامسۋ (4 ملرد تەڭگە) شاتقالدارىندا ەكو-قوناقۇيلەر سالۋ, اقمولا وبلىسى زەرەندى مەن شالقار كولدەرىندە 8 ملرد تەڭگەگە 5 جوبانى ىسكە اسىرۋ, سونداي-اق قاتون-قاراعايدا 4 نىساننان تۇراتىن كلاستەردى ىسكە قوسۋ جوسپارلانعان. ءمينيستردىڭ ايتۋىنشا, بۇل جوبالار ءساتتى جۇزەگە اسقان جاعدايدا كەلۋشىلەر اعىنى تاۋلىگىنە 3 500 ادامعا دەيىن ارتادى.
«23 جوبانىڭ 8-ءى بويىنشا اكىمدىكتەردە جولدار مەن ەلەكتر بەرۋ جەلىلەرىن تارتۋعا قاراجات جوق», دەدى مينيستر
ينۆەستورلار دايىن بولعانىمەن, بازالىق ينفراقۇرىلىمنىڭ جوقتىعى جۇمىستى قيىنداتىپ وتىر. بۇل ماسەلە اسىرەسە «بۇيراتاۋ», «قاتون-قاراعاي» جانە «كوكشەتاۋ» ۇلتتىق پاركتەرىندە قاتتى بايقالادى.
جيىندى قورىتىندىلاي كەلە, مينيستر بۇل باعىتتاعى جۇمىستاردى جانداندىرۋ ءۇشىن ۇكىمەت باسشىسىنىڭ ءبىرىنشى ورىنباسارى نۇرلىبەك نالىباەۆتىڭ توراعالىعىمەن ارنايى كوشپەلى ءىس-شارالار ۇيىمداستىرۋ جوسپارلانعانىن جەتكىزدى.
