سپورتشىلاردى ءدۇبىرلى دودانىڭ اياقتالۋىمەن قۇتتىقتاعان ماۋلەن اشىمباەۆ مەملەكەت باسشىسى قاسىم-جومارت توقاەۆتىڭ ينكليۋزيۆتى قوعام قالىپتاستىرۋعا ارنالعان باستاماسىنىڭ ارقاسىندا ەلىمىزدە پاراسپورت قارقىندى دامىپ كەلە جاتقانىن اتاپ ءوتتى. سونداي-اق ول بوچچادان الەم كۋبوگىنىڭ قازاقستاندا ءوتۋى وسى باعىتتاعى جۇيەلى جۇمىستىڭ ناقتى ناتيجەسى ەكەنىن ايتتى.
«كەيىنگى جىلدارى پرەزيدەنت قاسىم-جومارت توقاەۆتىڭ باستاماسىمەن قازاقستاندا ينكليۋزيۆتى قوعام قالىپتاستىرۋ جولىندا ماڭىزدى جوبالار جۇزەگە اسىرىلىپ كەلەدى. سونىڭ ناتيجەسىندە ەلىمىزدە پاراسپورت قارقىندى دامىپ, قازاقستاندىق پارااتلەتتەر حالىقارالىق ارەنادا جوعارى ناتيجەلەرگە قول جەتكىزۋدە. سونىمەن قاتار قازاقستاندا بوچچادان الەم كۋبوگى سياقتى حالىقارالىق دەڭگەيدەگى جارىستار دا ۇيىمداستىرىلىپ جاتىر. وسى سايىستا بارلىق سپورتشى چەمپيونعا ءتان جوعارى شەبەرلىك پەن كاسىبيلىكتىڭ بيىگىنەن كورىنە ءبىلدى», دەدى ماۋلەن اشىمباەۆ.
سونىمەن قاتار قازاقستان بوچچا فەدەراتسياسىنىڭ پرەزيدەنتى الەم كۋبوگىنىڭ باستى جەتىستىگى جۇلدە عانا ەمەس, جاڭا دوستار تابۋ جانە ينكليۋزيا مادەنيەتى مەن سپورتتىڭ ادامداردى بىرىكتىرەتىن قاسيەتىن دارىپتەۋ ەكەنىن اتاپ ءوتتى. ول فەدەراتسيا اتىنان ءتۋرنيردىڭ جوعارى دەڭگەيدە وتۋىنە ۇلەس قوسقان ۇيىمداستىرۋشىلارعا, ەرىكتىلەرگە, تورەشىلەرگە جانە World Boccia كومانداسىنا العىس ءبىلدىردى.
«بوچچادان الەم كۋبوگىنىڭ نەگىزگى قۇندىلىعى جۇلدەلەر مەن ناتيجەلەردەن الدەقايدا اۋقىمدى. بۇل جارىس دوستىقتىڭ, ءوزارا قۇرمەتتىڭ جانە سپورتتىڭ ءارتۇرلى ەلدەر مەن مادەنيەتتەر وكىلدەرىن بىرىكتىرەتىن كۇشىنىڭ جارقىن سيمۆولىنا اينالدى. تۋرنير بوچچانىڭ جاي عانا سپورت ەمەس ەكەنىن تاعى ءبىر مارتە دالەلدەدى. بۇل – اسقاق رۋحتىڭ, تەڭ مۇمكىندىكتەردىڭ جانە جەڭىس جولىنداعى ەرىك-جىگەردىڭ وزىق ۇلگىسى. كوماندالار, سپورتشىلار مەن جاتتىقتىرۋشىلار اراسىندا ورناعان دوستىق ۇزاق جىلدارعا جالعاسىپ, جارىسقا قاتىسۋشىلاردىڭ جۇرەگىندە قازاقستان تۋرالى ەڭ جىلى ەستەلىكتەر ساقتالادى دەپ سەنەمىن», دەدى ماۋلەن اشىمباەۆ.
جارىس قورىتىندىسى بويىنشا كوماندالىق سايىستا ۆس1 ساناتىندا يندونەزيا قۇراماسى جەڭىمپاز اتاندى. ەكىنشى جانە ءۇشىنشى ورىنداردى تيىسىنشە پورتۋگاليا مەن كورەيا قۇرامالارى ءوزارا ءبولىستى. ۆس3 ساناتىندا فرانتسيا قۇراماسى التىن مەدال جەڭىپ الدى. كۇمىس جۇلدەگە يتاليا سپورتشىلارى يە بولسا, سينگاپۋر قۇراماسى ۇزدىك ۇشتىكتى تۇيىندەدى. ال ۆس4 ساناتىندا ۇلىبريتانيا قۇراماسى بوچچادان الەم كۋبوگىنىڭ جەڭىمپازى اتاندى. ەكىنشى ورىندى قىتاي حالىق رەسپۋبليكاسىنىڭ گونكونگ ارنايى اكىمشىلىك اۋدانى يەلەنسە, ءۇشىنشى ورىن قىتاي حالىق رەسپۋبليكاسىنىڭ قۇراماسىنا بۇيىردى.
ايتا كەتەيىك, Astana 2026 World Boccia Cup سايىسى 1 ماۋسىمدا باستالدى. بۇل حالىقارالىق تۋرنير رەسمي رەيتينگتىك جارىستار جۇيەسىنىڭ قاتارىندا جانە الداعى پاراليمپيادا ويىندارىنا جولداما بەرەتىن ماڭىزدى ىرىكتەۋ كەزەڭدەرىنىڭ ءبىرى سانالادى. ءدۇبىرلى دوداعا برازيليا, كانادا, قىتاي, ۇلىبريتانيا, وڭتۇستىك كورەيا, فرانتسيا جانە پورتۋگاليا باستاعان كوپتەگەن ەلدىڭ سپورتشىلارى قاتىستى. بۇگىندە بوچچادان قازاقستان ۇلتتىق قۇراماسىنىڭ ساپىندا 50-گە جۋىق پاراسپورتشى بار ەكەنىن دە اتاپ وتكەن ءجون.
