استانا قالاسىنىڭ اكىمى جەڭىس قاسىمبەك قالا ەكونوميكالىق دامۋدىڭ جوعارى قارقىنىن ساقتاپ, ەلىمىزدىڭ جەتەكشى ىسكەرلىك ورتالىقتارىنىڭ ءبىرى رەتىندەگى ءرولىن نىعايتىپ وتىرعانىن باياندادى. بىلتىر جالپى وڭىرلىك ءونىم كولەمى 18,9 ترلن تەڭگەگە جەتتى. ەلوردا نەگىزگى كاپيتالعا تارتىلعان ينۆەستيتسيا كولەمى جاعىنان رەسپۋبليكادا ءبىرىنشى ورىندا تۇر. بيىلعى ءتورت ايدا 587 ملرد تەڭگە ينۆەستيتسيا تارتىلدى, ونىڭ شامامەن 80%-ىن جەكە ينۆەستيتسيالار قۇرادى. قازىر استانادا 246 مىڭ شاعىن جانە ورتا بيزنەس سۋبەكتىسى جۇمىس ىستەيدى. بۇل سەكتوردا شامامەن 560 مىڭ ادام جۇمىسپەن قامتىلعان. شوب-تىڭ قالا ەكونوميكاسىنا قوسقان ۇلەسى رەكوردتىق دەڭگەيگە – 66%-عا جەتتى. بيىل 26 ونەركاسىپتىك جوبانى ىسكە قوسۋ جوسپارلانعان. قازىردىڭ وزىندە قۇنى 32 ملرد تەڭگە بولاتىن 8 جوبا پايدالانۋعا بەرىلىپ, 500-گە جۋىق جۇمىس ورنى اشىلدى. سونداي-اق جىل سوڭىنا دەيىن قۇنى 36 ملرد تەڭگە بولاتىن 18 جوبانى ىسكە قوسىپ, مىڭعا جۋىق جۇمىس ورنىن اشۋ كوزدەلىپ وتىر.
پرەمەر-مينيسترگە «Technodom» كوتەرمە-بولشەك ساۋدا كاسىپورنى» اق زاماناۋي لوگيستيكالىق ورتالىعىندا كەشەننىڭ جۇمىسى مەن ەلوردانىڭ كولىك جانە قويما ينفراقۇرىلىمىن ودان ءارى دامىتۋ جوباسى تانىستىرىلدى.
اۋدانى 22 مىڭ شارشى مەتردەن اساتىن لوگيستيكالىق ورتالىق 11 مىڭ پاللەتتىك ورىنعا ەسەپتەلگەن. مۇندا جالپى اۋماعى 3,5 مىڭ شارشى مەتردى قۇرايتىن تەمپەراتۋرالىق رەجىمى بار ءۇي-جايلار قاراستىرىلعان. كاسىپورىن تاۋلىك بويى جۇمىس ىستەيدى ءارى تاۋارلاردى قابىلداۋ مەن ساقتاۋدان باستاپ, ولاردى جيناقتاۋ مەن جونەلتۋگە دەيىنگى قىزمەتتەردىڭ تولىق تسيكلىن قامتاماسىز ەتەدى. ورتالىق قويمانى باسقارۋدىڭ اۆتوماتتاندىرىلعان جۇيەلەرىمەن جانە تيىمدىلىكتى باقىلاۋ قۇرالدارىمەن جابدىقتالعان. بۇگىندە لوگيستيكالىق كەشەن جۇمىس اۋقىمىمەن 100% قامتىلعان. ورتالىقتىڭ قىزمەتىن «Wildberries», «Ascona», «Gold Service Logistic» جانە باسقا دا كومپانيالار پايدالانادى. نىساندا 200-دەن استام جۇمىس ورنى اشىلعان.
سونىمەن قاتار پرەمەر-مينيسترگە جەكە ينۆەستيتسيا كولەمى 300 ملننان اساتىن 223,1 گەكتار لوگيستيكالىق پارك جوباسى تانىستىرىلدى. الەۋەتتى قاتىسۋشىلار اراسىندا «YXE Trading Service Group», «S Sistem Lojistik Hizmetler», «قازپوشتا» جانە «Rhino Logistic» كومپانيالارى بار.
بۇدان بولەك ولجاس بەكتەنوۆ «Wildberries Kazakhstan» كومپانياسىنىڭ ءىرى لوگيستيكالىق حاب قۇرىلىسىنىڭ بارىسىمەن تانىستى. جالپى اۋماعى 160 مىڭ شارشى مەتردى قۇرايتىن جوبا اياسىندا 6 مىڭ جۇمىس ورنىن اشۋ كوزدەلگەن. نىساندى پايدالانۋعا بەرۋ 2027 جىلدىڭ ءى توقسانىنا جوسپارلانعان. جوبانىڭ ينۆەستيتسيا كولەمى – 47,7 ملرد تەڭگە.
ۇكىمەت باسشىسى لوگيستيكالىق ينفراقۇرىلىمدى دامىتۋ ەكونوميكانىڭ باسەكەگە قابىلەتتىلىگىن ارتتىرۋدىڭ جانە ەلىمىزدىڭ ترانزيتتىك الەۋەتىن ودان ءارى نىعايتۋدىڭ ماڭىزدى شارتى ەكەنىن اتاپ ءوتتى. پرەزيدەنت جاريالاعان تسيفرلاندىرۋ جانە جاساندى ينتەللەكت جىلىن ەسكەرە وتىرىپ, تسيفرلىق شەشىمدەردى ەنگىزۋ مەن ۇدەرىستەردى اۆتوماتتاندىرۋعا ەرەكشە نازار اۋدارۋ كەرەك.
«Heart Center Foundation» قق زاۋىتىندا ولجاس بەكتەنوۆ مەديتسينالىق ماقساتتاعى پلاستيكالىق بۇيىمدار ءوندىرىسىنىڭ ىسكە قوسىلۋىمەن جانە كاسىپورىننىڭ تەحنولوگيالىق جابدىقتالۋىمەن تانىستى. جوبانىڭ سوڭعى كەزەڭى جۇزەگە اسىرىلىپ جاتىر. زاۋىت بيىل مامىر ايىندا پايدالانۋعا بەرىلگەن. تامىزدا بارلىق جەلىدە ءونىم شىعارۋ باستالادى, ال بيىلعى قىركۇيەك ايىندا تولىق قۋاتىنا شىقپاق.
جوبا «قازاقمىس كورپوراتسياسى» جشس-نىڭ قولداۋىمەن №1 يندۋستريالىق پارك اۋماعىندا جۇزەگە اسىرىلىپ جاتىر. ينۆەستيتسيالاردىڭ جالپى كولەمى – شامامەن 5,1 ملرد تەڭگە. كاسىپورىننىڭ نەگىزگى ءونىمى – ALEM اتاۋىمەن قىسقارتىلعان «Astana life Ex-situ Machine» جوباسى. بۇل – وتاندىق ينجەنەرلەر مەن دارىگەرلەردىڭ دونورلىق اعزالاردى ساقتاۋ, قالپىنا كەلتىرۋ مەن تاسىمالداۋ ءۇشىن جاساپ شىعارعان بىرەگەي ازىرلەمەسى. تەحنولوگيا دونورلىق اعزانىڭ ساقتالۋ مەرزىمىن بىرنەشە ساعاتتان ءبىر تاۋلىككە دەيىن جانە ودان دا كوپ ۇزارتۋعا مۇمكىندىك بەرەدى. بۇل وتاندىق ترانسپلانتولوگياعا جاڭا مۇمكىندىكتەر اشادى. وندىرىستە وتاندىق شيكىزاتتى – اتىراۋ قالاسىنداعى KPI زاۋىتىنىڭ پلاستيكالىق تۇيىرشىكتەرىن پايدالانۋ جوسپارلانىپ وتىر. بۇل مەديتسينالىق بۇيىمدار ءوندىرىسىن لوكاليزاتسيالاۋ دەڭگەيىن ارتتىرۋعا مۇمكىندىك بەرەدى. زاۋىتتىڭ جوبالىق قۋاتى 15-20 بىرلىك ALEM جابدىعىن شىعارۋعا جەتەدى. ول دەگەنىمىز – جىلىنا بيوماتەريالدى ىرىكتەۋگە ارنالعان شامامەن 6 ملن كونتەينەر مەن 45 مىڭ درەناجدىق قۇرىلعى.
UMC قورىنىڭ باسقارما توراعاسى يۋري پيا جاڭا ءوندىرىس يمپورتتىق مەديتسينالىق شىعىنداۋعا ارنالعان ماتەريالدارعا تاۋەلدىلىكتى ازايتاتىنىن ايتتى. ونىڭ سوزىنشە, كارديولوگيا مەن كارديوحيرۋرگياعا قاجەتتى قۇرالداردىڭ باسىم بولىگى شەتەلدەن ساتىپ الىنادى. وسىعان بايلانىستى ەلدە مەديتسينالىق بۇيىمدار ءوندىرىسىن جولعا قويۋ تۋرالى شەشىم قابىلدانعان. قازىر دونورلىق ورگانداردى ساقتاۋعا ارنالعان اپپاراتتىڭ ءپروتوتيپى ازىرلەنىپ, جىل سوڭىنا دەيىن زاۋىتتا العاشقى ۇلگىسىن شىعارۋ كوزدەلىپ وتىر.
ولجاس بەكتەنوۆ عىلىمي ازىرلەمەلەر نەگىزىندە وتاندىق مەديتسينا ونەركاسىبىن دامىتۋ مەن ولاردى دەنساۋلىق ساقتاۋ سالاسىنا ءىس جۇزىندە ەنگىزۋدىڭ ماڭىزدىلىعىن اتاپ ءوتتى. قازىر ەلىمىز ءومىر ءسۇرۋ ۇزاقتىعى تۇرعىسىنان 76 جىلدىق كورسەتكىشكە جاقىندادى. زاماناۋي مەديتسينالىق كومەككە قول جەتىمدىلىكتى كەڭەيتە وتىرىپ, وسى قارقىندى جالعاستىرۋ ماڭىزدى.
«RnR Group» جشس-نىڭ نان-توقاش جانە ءسۇت ونىمدەرىن شىعارۋ زاۋىتتارىندا پرەمەر-مينيستر كاسىپورىنداردىڭ وندىرىستىك قۋاتتارى مەن جۇمىستى ۇيىمداستىرۋ جاعدايىن قاراپ شىقتى.
ۇكىمەت باسشىسىنا قايتا وڭدەۋدى دامىتۋعا, وتاندىق ازىق-ت ۇلىك ونىمدەرىن شىعارۋدى كەڭەيتۋگە, ەلوردانىڭ ازىق-ت ۇلىك قاۋىپسىزدىگىن نىعايتۋعا جالپى قۇنى 8,8 ملرد تەڭگە بولاتىن جوبالار باعىتتالعانى باياندالدى. وندىرىستەردىڭ قۋاتتىلىعى – تاۋلىگىنە 25 تونناعا دەيىن ۇن ونىمدەرى جانە 100 تونناعا دەيىن ءسۇت ونىمدەرى. كاسىپورىندار جەرگىلىكتى شيكىزات بازاسىن پايدالانادى. ونىمدەر ەلوردانىڭ ساۋدا نۇكتەلەرىنە, الەۋمەتتىك نىساندارى مەن جەلىلەرىنە جەتكىزىلەدى.
2025–2026 جىلدارى استانادا سىيىمدىلىعى 12 مىڭ توننا بولاتىن ەكى كوكونىس قويماسى مەن جىلىنا 53 مىڭ توننا ءونىم وڭدەۋگە قاۋقارلى ءۇش قايتا وڭدەۋ زاۋىتى ىسكە قوسىلدى. 18 مىڭ توننا كوكونىس جەتكىزۋ كەلىسىمشارتتارى جاسالدى. الداعى ەكى جىلدا اگروونەركاسىپتىك كەشەن سالاسىندا جالپى قۇنى 180 ملرد تەڭگەنى قۇرايتىن 7 ينۆەستيتسيالىق جوبانى ىسكە قوسۋ جوسپارلانىپ وتىر. ناتيجەسىندە, 1,6 مىڭ جاڭا جۇمىس ورنى اشىلادى.
پرەمەر-مينيستر ولجاس بەكتەنوۆ «استانا ەتكوم» جشس ەت وڭدەۋ زاۋىتىنىڭ الاڭىندا بولىپ, ءوندىرىستىڭ تەحنولوگيالىق ۇدەرىسىمەن جانە شىعارىلاتىن ءونىم تۇرلەرىمەن تانىستى.
زاۋىت بيىلعى جىلدىڭ ەكىنشى توقسانىندا پايدالانۋعا بەرىلەتىنىن مالىمدەدى. جوبالىق قۋاتى تاۋلىگىنە 50 تونناعا دەيىن دايىن ءونىمدى, ياعني جىلىنا 18 مىڭ توننادان استام ءونىم شىعارۋعا جول اشادى. شيكىزاتتى وتاندىق وندىرۋشىلەردەن, سونىڭ ىشىندە «ايتاس» اق, «KazBeef» جشس جانە وڭىرلەردەگى شارۋا قوجالىقتارىنان ساتىپ الۋ جوسپارلانعان. العاشقى كەزەڭدە كاسىپورىندا 100-گە دەيىن جۇمىس ورنى اشىلسا, تولىق قۋاتقا شىققاندا 300-گە دەيىن جەتەدى. كادر دايارلاۋ ماقساتىندا كاسىپورىن كوللەدجدەر مەن باسقا دا وقۋ ورىندارىنىڭ ستۋدەنتتەرىن وقىتۋدى ۇيىمداستىردى. ولارعا كەيىننەن جۇمىسقا ورنالاسۋ مۇمكىندىگى قاراستىرىلعان.
ولجاس بەكتەنوۆ تەرەڭ وڭدەۋ اگروونەركاسىپتىك كەشەندى دامىتۋدىڭ نەگىزگى باعىتتارىنىڭ ءبىرى بولىپ قالا بەرەتىنىن اتاپ ءوتتى. پرەزيدەنتتىڭ تاپسىرماسىنا سايكەس ۇكىمەت اگرارلىق سەكتوردى قولداۋدى كۇشەيتىپ, ونىڭ ىشىندە بيولوگيالىق قاۋىپسىزدىكتىڭ نەگىزى سانالاتىن ۆەتەريناريا سالاسىن دامىتۋعا, ينفراقۇرىلىمدى جەتىلدىرۋگە, باقىلاۋ جۇيەسىن جاڭعىرتۋعا باسىمدىق بەرىپ وتىر. ەلىمىزدىڭ اۋسىلدان تازا ەل مارتەبەسىن الۋى مال شارۋاشىلىعىن دامىتۋعا ءارى ەكسپورتتىق مۇمكىندىكتەردى كەڭەيتۋگە قوسىمشا جول اشادى. تۇراقتى شيكىزات بازاسى مەن كەيىنگى جىلدارداعى جوعارى ونىمدىلىك قايتا وڭدەۋ كولەمىن ارتتىرۋعا, دايىن ءونىم شىعارۋدى كوبەيتۋگە, وتاندىق تاۋارلاردى ىشكى ءارى سىرتقى نارىقتارعا ىلگەرىلەتۋگە قولايلى جاعداي قالىپتاستىرادى.
«پرەزيدەنت ەلورداعا ەرەكشە مىندەتتەر جۇكتەپ وتىر: استانا ءاردايىم اۋقىمدى باستامالاردىڭ الدىڭعى شەبىندە بولىپ, بارلىق وڭىرگە ۇلگى بولۋعا ءتيىس. ەلوردا ينفراقۇرىلىم, ونەركاسىپ, لوگيستيكا, تسيفرلىق شەشىمدەر جانە الەۋمەتتىك سالا باعىتتارىندا دامۋدىڭ جوعارى قارقىنىن قالىپتاستىرۋى قاجەت. ءاربىر جوبا قالانىڭ ەكونوميكاسىن نىعايتىپ, جۇمىس ورىندارىن اشىپ, ازاماتتاردىڭ ءومىر ءسۇرۋ ساپاسىن ارتتىرىپ, بيزنەس ءۇشىن جاڭا مۇمكىندىكتەرگە جول اشۋى ماڭىزدى. سوندىقتان اكىمدىك پەن سالالىق مينيسترلىكتەردىڭ مىندەتى – جوبالاردى سۇيەمەلدەۋدى قامتاماسىز ەتۋ, كاسىپورىنداردى ۋاقتىلى ىسكە قوسۋ جانە وندىرىستەردىڭ تۇراقتى جۇكتەلۋىنە جاعداي جاساۋ», دەدى ۇكىمەت باسشىسى.
