سۋرەت: gov.kz
پرەزيدەنت جۇكتەگەن مىندەتتەردىڭ سولتۇستىك قازاقستان وبلىسىنداعى ورىندالۋ بارىسى «اmanat» پارتياسىنىڭ وڭىرلىك فيليالى ۇيىمداستىرعان «تۇرعىندار اماناتى» اتتى رەسپۋبليكالىق جيىندا تالقىلاندى. القالى باسقوسۋعا وبلىس اكىمى عاۋەز نۇرمۇحامبەتوۆ, پارتيا بەلسەندىلەرى, سالالىق باسقارما وكىلدەرى, دەپۋتاتتار, سونداي-اق م ۇلىك يەلەرى بىرلەستىكتەرىنىڭ (ميب) جانە پاتەر يەلەرى كووپەراتيۆتەرىنىڭ (پيك) توراعالارى قاتىستى. ءوڭىر باسشىسى وبلىستا بۇل باعىتتا اۋقىمدى جۇمىس اتقارىلىپ جاتقانىن اتاپ ءوتتى.
«بۇگىندە وبلىستا 1 920 كوپقاباتتى تۇرعىن ءۇي بار. ولاردىڭ ىشىندە 511 ميب قۇرىلىپ, 946 كوندومينيۋم نىسانى تىركەلدى. بۇل – جەرگىلىكتى اتقارۋشى ورگاندار مەن ءوز ۇيلەرىنىڭ جاي-كۇيىنە بەيجاي قارامايتىن تۇرعىنداردىڭ ورتاق ەڭبەگىنىڭ ناتيجەسى. ەندىگى مىندەت – قول جەتكىزىلگەن ناتيجەمەن شەكتەلمەي, سالانى جۇيەلى تۇردە جاڭعىرتۋ, ينجەنەرلىك جەلىلەردىڭ سەنىمدىلىگىن ارتتىرۋ جانە حالىقپەن اشىق ديالوگ ورناتۋ», دەدى وبلىس اكىمى.
پارتيا ورتالىق اپپاراتىنىڭ حاتشىسى الەكساندر دانيلوۆ ميب پەن پيك جەتەكشىلەرىنىڭ حالىقپەن تىكەلەي بايلانىس ورناتۋداعى ءرولى زور ەكەنىن اتاپ ءوتىپ, ولاردىڭ كوتەرگەن ماسەلەلەرىن شەشۋ باعىتىندا پارتيا تاراپىنان ءتيىستى قولداۋ كورسەتىلەتىنىن جەتكىزدى.
جيىندا ءسوز العان «جاڭا ءۇي» ميب جەتەكشىسى ازامات قاسەنوۆ تۇرعىن ءۇيدى باسقارۋ سالاسى بۇگىندە ساپالىق تۇرعىدان جاڭا دەڭگەيگە كوتەرىلگەنىن ايتتى. ونىڭ ايتۋىنشا, ەسكىرگەن ينجەنەرلىك جۇيەلەر مەن جەدەلساتىلاردى جوندەۋ ماسەلەسىندە پيك مۇشەلەرىنە مەملەكەتتىك جانە جەرگىلىكتى اتقارۋشى ورگاندار تاراپىنان قولجەتىمدى جاڭعىرتۋ باعدارلامالارى مەن ناقتى تاريفتىك ساياسات ارقىلى قولداۋ كورسەتۋ قاجەت.
ءوز كەزەگىندە پيك قاۋىمداستىعىنىڭ توراعاسى سەرگەي حۋدياكوۆ زاڭناما تالاپتارىنا سايكەس بيىلعى 16 شىلدەگە دەيىن پيك-تەر باسقارۋ نىسانى رەتىندە قايتا تىركەۋدەن وتۋگە ءتيىس ەكەنىن ەسكە سالدى. ونىڭ ايتۋىنشا, بۇل جۇيە قارجىنىڭ جۇمسالۋ اشىقتىعىن قامتاماسىز ەتكەنىمەن, ءىس جۇزىندە تىركەۋ ۇدەرىسىندە بىرقاتار بيۋروكراتيالىق كەدەرگىلەر ساقتالىپ وتىر.
باسقوسۋدى قورىتىندىلاي كەلە, جيىندا كوتەرىلگەن بارلىق وزەكتى ماسەلەلەر مەن ۇسىنىستار «تۇرعىن ءۇي قاتىناستارى تۋرالى» جاڭا زاڭ جوباسىنا ەنگىزۋ ءۇشىن جولداناتىنى اتاپ ءوتىلدى.
سولتۇستىك قازاقستان وبلىسى
