جەدەل جەلى قوسىلدى

قازىر تۇركياداعى قازاقستان ديپلوماتتارى سول ەلدەگى وتانداستارىمىزبەن بايلانىس ورناتۋ جۇمىستارىن مىقتاپ قولعا العان. ستۋدەنتتەر اراسىندا ءتيىستى اقپاراتتىق حابارلاما تاراتىلدى. قازاقستاننىڭ ەلشىلىگى تۇركيانىڭ توتەنشە جاعدايلار باسقارماسىمەن تۇراقتى بايلانىستا. وسى ۋاقىتقا دەيىن زارداپ شەككەن نەمەسە قازا تاپقانداردىڭ تىزىمىندە قازاقستان ازاماتتارى جوق. سونىمەن قاتار، كوپتەگەن قيراعان عيماراتتىڭ استىنان زارداپ شەككەندەردى قۇتقارۋ جۇمىستارى ءالى جالعاسىپ جات­قانىن اتاپ وتكەن ءجون.

قازاقستان رەسپۋبليكاسى سىرتقى ىستەر مينيسترلىگى +7 (7172) 72-05-00 ءنومىرى بويىنشا جەدەل جەلى اشىلعانىن حابارلادى. وسى تەلەفون ارقىلى ازاماتتارىمىز بەن ولاردىڭ تۋىس­تارى كومەك سۇراي الادى. بۇدان باسقا، جاقىن ارادا تۇركياداعى قازاقستاننىڭ ديپلوماتيالىق وكىلدىكتەرىنىڭ شۇعىل بايلانىس­تارى قوسىمشا جاريالانادى.

قازاقستاننىڭ سىرتقى ىستەر مينيسترلىگى اپات سالدارىنان قازا تاپقانداردىڭ وتباسىلارى مەن جاقىندارىنا قايعىرا وتىرىپ كوڭىل ايتادى جانە زارداپ شەككەندەردىڭ تەزىرەك ساۋىعىپ كەتۋىن تىلەيدى.

ەستەرىڭىزگە سالا كەتەيىك، سوڭعى مالىمەت بويىنشا تۇر­كيا­­نىڭ كاحرامانماراش، گازيان­تەپ، وسمانيە، ديارباكىر، شان­لى­ۋرفا پروۆينتسيالارىندا بولعان جويقىن جەر سىلكىنىسىنەن 4 مىڭنان استام ادام قازا تاۋىپ، 20 مىڭنان استام ادام جاراقات العان. تابيعي اپات 13،5 ميلليون تۇرعىنى بار 10 پروۆينتسياعا كەرى اسەرىن تي­گىز­دى. وكىنىشكە قاراي زارداپ شەك­كەندەردىڭ سانى ساعات سايىن ءوسىپ كەلەدى.

ال سيريادا كەم دەگەندە 1 500 ادام قايتىس بولىپ، الەپپو، يدليب، لاتاكيا جانە حاما پروۆينتسيالارىندا كوپتەگەن ادام قيراندىلار استىندا قالىپ قوي­عان.

جالپى، بۇگىندە تۇركيادا كون­سۋلدىق ەسەپتە قازاقستاننىڭ 968 ازاماتى تۇر (انكارا – 498، ىس­تانبۇل – 45، انتاليا – 189). ءسىم تاراتقان مالىمەتكە قارا­عان­دا، اپات بولعان ەلدە قازاق­ستاننىڭ 8 219 ستۋدەنتى ءبىلىم الىپ ءجۇر. ال تۇرىك تاراپىنىڭ مالى­مەتىنشە، قازاقستاننىڭ 75 مىڭعا جۋىق ازاماتى بولۋى مۇمكىن.