ازىق-ت ۇلىك باعاسىن تۇراقتاندىرۋ شارالارى

پرەمەر-ءمينيستردىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين بيىلعى قاڭتار ايىنىڭ قورىتىندىسى بويىنشا ينفلياتسيا 1،1%-دى قۇراعانىن، ونىڭ ىشىندە ازىق-ت ۇلىك بويىنشا ينفلياتسيا 1،4%-دى، ازىق-ت ۇلىككە جاتپايتىن تاۋارلار ينفلياتسياسى 0،9%-دى، اقىلى قىزمەتتەر بويىنشا 0،7%-دى قۇراعانىن حابارلادى. ازىق-تۇ­لىك ينفلياتسياسىنىڭ ەڭ جوعارى دەڭگەيى اس­تانا مەن شىمكەنتتە (2،2%-دان)، قىزىل­وردا جانە سولتۇستىك قازاقستان (1،8%)، اقتوبە (1،7%) جانە ۇلىتاۋ (1،5%) وبلىس­تارىندا قالىپتاستى.

الەۋمەتتىك ماڭىزى بار ازىق-ت ۇلىك تاۋارلارى باعاسىنىڭ يندەكسى جىل با­سىنان بەرى 1،7%-دى قۇرادى. اپتا سايىن ديناميكا ءارتۇرلى دەڭگەيدە – +0،3/+0،4%. ماڭعىستاۋ (3،4%)، ۇلىتاۋ (2،8%) وبلىستارىندا جانە استانا قالاسىندا (2،5%) باعا قاتتى وسكەن. اتاپ ايتقاندا، پياز 22،5%-عا، كۇرىش 5،2%-عا، قىرىققابات 4،1%-عا، ءسۇت پەن ءسابىز 3،1%-عا، كارتوپ 3%-عا، كەسپە 2،6%-عا قىمباتتادى.

قازىرگى ۋاقىتتا رەسپۋبليكادا باعانى تۇراقتاندىرۋ قۇرالدارى قايتا قارالدى. ماسەلەن، «اينالىم سحەماسى» شەڭبەرىندە قارىز بەرۋ بويىنشا ءتاسىل قايتا فورماتتالدى. ول قازىر تىكەلەي وندىرۋشىلەرگە بەرىلەدى. تۇراقتاندىرۋ قور­لارىن قالىپتاستىرۋ تەتىگى وزگەر­تىلدى. ول ەندى ءونىمدى ساتىپ الۋ ەگىن جي­ناۋ كەزەڭىندە، ياعني نارىقتا باعا­لار­دىڭ باسە­كەلەس كەزىندە ىسكە اسىرىلىپ، ماۋ­سىم­ارالىق كەزەڭدە ساتۋعا لايىقتالعان.

بۇعان قوسا اۋىل شارۋاشىلىعى وندى­رۋشىلەرىنەن ءونىمدى ساتۋعا دەيىن ساق­تاۋعا مۇمكىندىك بەرەتىن كەلىسىمشارت جاساۋعا فورۆاردتىق ساتىپ الۋ تەتىگى ەنگىزىلدى. بۇگىنگى تاڭدا 2022 جىلعى ەگىن كەلىسىمشارتى بويىنشا ناقتى قورلار: پياز – 110%، كارتوپ – 105%، ءسابىز – 87%، قى­رىققابات – 70%. قازىرگى ۋاقىتتا ساۋدا وبەكتىلەرى ارقىلى پيازدى ساتۋدى باستاۋ تۋرالى تاپسىرما بەرىلدى.

سەرىك جۇمانعارين رەسپۋبليكانىڭ بار­لىق ءىرى ساۋدا جەلىسى باعانى تۇ­راق­تاندىرۋ جۇمىستارىنا قاتىساتىنىن ايتتى.

ازىق-ت ۇلىك قورى تۋرالى اۋىل شارۋا­شى­لىعى ءمينيسترى ەربول قاراشوكەەۆ، ازىق-ت ۇلىك باعاسىنىڭ مونيتورينگى تۋرالى ۇلتتىق ستاتيستيكا بيۋروسىنىڭ باس­شىسى جاندوس شايماردانوۆ بايان­دادى.

ماڭعىستاۋ وبلىسىنىڭ اكىمى نۇرلان نوعاەۆ، ۇلىتاۋ وبلىسىنىڭ اكىمى بەرىك ابدىعالي ۇلى جانە استانا قالاسىنىڭ اكىمى جەڭىس قاسىمبەك وڭىرلەردەگى باعانى تۇراقتاندىرۋ ءىس-شارالارى تۋرالى بايانداما جاسادى.

ماسەلەنى قورىتىندىلاعان پرەمەر-مينيستر 2023 جىلعا ارنالعان نەگىزگى مىندەتتەردىڭ ءبىرى 2023 جىلدىڭ قورى­تىندىسى بويىنشا ينفلياتسيانىڭ دەڭگەيىن 9،5%-دان اسىرماۋ ەكەنىن ايتىپ ءوتتى. بۇعان قول جەتكىزۋگە ابدەن بولادى. تەك بۇل ءۇشىن وڭىرلەردىڭ ازىق-ت ۇلىك باعاسىن تۇراقتاندىرۋ، اسىرەسە ماۋسىمارالىق كەزەڭدە باعانى ۇستاپ تۇرۋ بويىنشا بەلسەندى جۇمىس قاجەت.

ۇكىمەت باسشىسىنىڭ ايتۋىنشا، اكىمدىكتەرگە بارلىق قاجەتتى تەتىك ۇسى­­ن­ىلدى، قاراجات ءبولىندى، الايدا جەرگى­لىكتى جەرلەردە اتالعان ماسەلەگە سال­عىرت قاراۋدىڭ سالدارىنان باعانىڭ ءوسۋى توق­تايتىن ەمەس. مىسال رەتىندە پرەمەر-مينيستر وڭىرلەرگە پياز بويىنشا كەلىسىم­شارت جاساۋ تاپسىرىلعانىن ايتتى. «اكىم­دەر ءونىم كولەمى جەتكىلىكتى دەپ بىرنەشە رەت ايتتى. وندا پياز نەلىكتەن قىمباتتايدى؟ ءبىزدىڭ ەلىمىزدە پياز كوپ وسەدى. الايدا باعانى تومەندەتۋ ءۇشىن پياز ەكسپورتىنا تىيىم سالىپ، شۇعىل شارالار قابىلداۋعا ءماجبۇر بولدىق»، دەدى ءا.سمايىلوۆ.

ۇكىمەت باسشىسى رەسپۋبليكاداعى فور­­ۆاردتىق ساتىپ الۋ تەتىگى ءبىرىنشى كەزەك­تە وندىرۋشىلەردى قارجىلاندىرۋ ءۇشىن قايتا فورماتتالعانىن ايتتى. الاي­دا اكىمدىكتەر دەلدالداردى كوبەيتە وتىرىپ، جەتكىزۋشىلەرگە قاراجات ءبولۋدى جال­عاس­تىرۋدا. «وڭىرلەرگە ءتيىمدى باعامەن تۇراق­تان­دىرۋ قورلارىن تولتىرىپ الۋعا مۇم­كىندىك بەرىلدى»، دەدى پرەمەر-مينيستر وسى­عان وراي.

سونىمەن قاتار ۇكىمەت باسشى­سى­نىڭ ايتۋىنشا، جىل باسىنان بەرى ساۋدا سالا­سىنداعى زاڭنامانى بۇزۋ­شىلىق فاك­تىلەرى بولعان جوق، دەگەن­مەن اكىمدىكتەرگە ءتيىستى وڭىرلىك كوميس­سيا­لاردىڭ جۇمىسىن جاقسارتۋ ءۇشىن الگوريتم­دەر مەن ۇسىنىمدار جىبەرىلگەن ەدى. «الايدا وڭىرلەردى كوميسسيا وتىرىس­تارىن وتكىزۋگە «قيناعانداي ەتىپ» ماج­بۇرلەپ وتىرمىز. ونىڭ ءوزى دە ەشقانداي ناتيجە بەرىپ وتىرعان جوق. تاعى دا قايتالاپ ايتامىن: ازىق-ت ۇلىك ونىمدەرىنە باعانى تۇراقتاندىرۋ – ۇكىمەت پەن جەرگىلىكتى اتقارۋشى ورگانداردىڭ اسا ماڭىزدى مىندەتى. جۇمىسقا نەمقۇرايدى قاراۋ ورىن السا جانە ناتيجە بولماسا، ءتيىستى شەشىمدەر قابىلدانادى. بۇل تۋرالى بۇعان دەيىن دە ايتىلدى»، دەدى ءا.سمايىلوۆ.

وسىعان بايلانىستى ۇكىمەت باسشىسى ساتىپ الۋ-ساتۋ كەزىندەگى تاۋارلاردىڭ كولەمى مەن باعاسىن ەرەكشە باقىلاۋعا الۋدى تاپسىردى. وسى ورايدا پرەمەر-مينيستر اكىمدىكتەردەن تەك باقىلاۋ-كاسسالىق اپپاراتتاردى قولداناتىن ساۋدا وبەكتىلەرىندە تۇراقتاندىرۋ قورلارىنان ونىمدەردى ساتۋدى جۇزەگە اسىرۋدى تالاپ ەتتى.

سونىمەن قاتار پرەمەر-مينيستر بارلىق اۋداندى قامتي وتىرىپ، تۇراقتى نەگىزدە ارنايى جارمەڭكەلەر وتكىزۋ جانە باعانى، كولەمدى، قارسى مىندەتتەمەلەردى جانە ايىپپۇل سانكتسيالارىن بەلگىلەۋ جونىندەگى مىندەتتى شارتتاردى كورسەتە وتىرىپ، فورۆاردتىق ساتىپ الۋ شارتىنىڭ بىرىڭعاي فورماتىن ازىرلەۋ قاجەتتىگىن اتاپ ءوتتى.

ۇكىمەت وتىرىسىندا تۇرعىن ءۇي-كوممۋنالدىق ينفراقۇرىلىمدى دامىتۋ جونىندەگى شارالار قارالدى. بۇل رەتتە يندۋستريا جانە ينفراقۇرىلىمدىق دامۋ ءمينيسترى مارات قاراباەۆتىڭ حابار­لاۋىنشا، 2022 جىلدىڭ قورى­تىن­دىسى بو­يىنشا ەلىمىزدە 15،4 ملن شارشى مەتر تۇرعىن ءۇي سالىندى، تۇرعىن ءۇي قۇرىلى­سىنا ينۆەستيتسيالار وتكەن جىلمەن سالىس­تىرعاندا 16،8%-عا ءوسىپ، 2،9 ترلن تەڭگەنى قۇرادى. بيىل 15،3 ملن شارشى مەتر تۇرعىن ءۇيدى، سونىڭ ىشىندە مەملەكەتتىك قولداۋ ەسەبىنەن پايدالانۋعا بەرۋ جوسپارلانعان. كەزەكتە تۇرعاندارعا جىلجىمايتىن م ۇلىك ساتىپ الۋعا جەڭىلدەتىلگەن نەسيە جانە جالداۋعا سۋبسيديالار بەرۋ كوزدەلگەن.

سونىمەن قاتار كوپپاتەرلى تۇرعىن ۇيلەردى كۇردەلى جوندەۋ بويىنشا جۇمىس جالعاسىپ جاتىر. بۇگىندە كۇردەلى جوندەۋدى قاجەت ەتەتىن كوندومينيۋم وبەكتىلەرىنىڭ ۇلەسى 31،1%-عا دەيىن تومەندەدى. كەيبىر وڭىرلەردە تۇرعىن ءۇي قورىنىڭ جوعارى توزۋى ساقتالىپ وتىر. اتاپ ايتقاندا، اباي وبلىسىندا – 67%، باتىس قازاقستان وبلىسىندا – 63،9%، اقمولا وبلىسىندا – 59،2%، جەتىسۋ وبلىسىندا – 52،6% جانە الماتى قالاسىندا – 52،4%. جالپى، بىلتىر 11 وڭىرىندە 215 كوپپاتەرلى تۇرعىن ۇيگە كۇردەلى جوندەۋ جۇمىستارى جۇرگىزىلدى.

اپاتتى جاعدايداعى تۇرعىن ءۇي يەلەرىنىڭ ماسەلەلەرىن شەشۋ جانە ەلدى مەكەندەردىڭ ساۋلەتتىك كەلبەتىن جاقسارتۋ ماقساتىندا بۇزىلاتىن ۇيلەردىڭ تىزبە­سىن ايقىنداي وتىرىپ، قابىلدانعان رەنو­ۆاتسيالاۋ باعدارلامالارى وزەكتەندىرىلەدى. 2029 جىلعا 1 500 ءۇيدى بۇزۋ جانە 40 مىڭ مەنشىك يەسىنىڭ تۇرعىن ءۇي ماسەلەلەرىن شەشۋدى قامتاماسىز ەتۋ جوسپارلانعان، ونىڭ ىشىندە بيىل 3 مىڭنان اسا مەنشىك يەسىن قامتيتىن 120 كوپپاتەرلىك تۇرعىن ءۇي بار.

ەلدىڭ كوممۋنالدىق سەكتورىن دامى­تۋ ماقساتىندا سۋمەن، جىلۋمەن جابدىق­تاۋ، سۋ بۇرۋ جۇيەلەرىن سالۋ جانە رەكون­سترۋكتسيالاۋ جۇمىستارى جالعاسىپ جاتىر. اتالعان جەلىلەردىڭ جالپى ۇزىندىعى 129 مىڭ شاقىرىمدى قۇرايدى (جىلۋمەن جابدىقتاۋ – 14 مىڭ كم، سۋمەن جابدىقتاۋ – 98 مىڭ كم، سۋ بۇرۋ – 17 مىڭ كم).

2022 جىلدىڭ قورىتىندىسى بويىنشا ءتۇرلى قارجىلاندىرۋ كوزدەرى ەسەبىنەن 3 مىڭ شاقىرىمعا جۋىق جەلى جاڭعىرتىلدى. ناتيجەسىندە جەلىلەردىڭ جالپى توزۋى 53%-دان 51%-عا دەيىن تومەندەدى. بيىل شامامەن 2 مىڭ شاقىرىم جەلىنى جاڭعىرتۋ ارقىلى جەلىلەردىڭ جالپى توزۋ كورسەتكىشىن 50%-عا دەيىن، ال 2029 جىلى 40%-عا دەيىن تومەندەتۋ جوسپارلانىپ وتىر.

يندۋستريا جانە ينفراقۇرلىمدىق دامۋ ءمينيسترىنىڭ ايتۋىنشا، سۋمەن جابدىقتاۋ قىزمەتتەرىنە قولجەتىمدىلىك قالالاردا 98،4%، اۋىلدىق ەلدى مەكەندەردە 94،5%-دى قۇرادى. جامبىل وبلىسىنىڭ (91،9%) قالا تۇرعىندارى جانە قوستاناي (79،6%)، اقمولا (89،8%)، سولتۇستىك قازاقستان وبلىس­تارىنىڭ (84،6%) اۋىل تۇرعىندارى ءۇشىن سۋمەن جابدىقتاۋ قىزمەتتەرىنە قولجە­تىمدىلىك تومەن ەكەنى بايقالادى. وسى جىلدىڭ قورىتىندىسى بويىنشا 5 قالا جانە 192 اۋىلدىق ەلدى مەكەن سۋمەن جاب­دىقتاۋ قىزمەتتەرىنە قول جەتكىزەدى. مەم­لەكەت باسشىسىنىڭ تاپسىرماسىنا سايكەس 2025 جىلدىڭ سوڭىنا دەيىن سۋمەن جاب­دىق­تاۋ قىزمەتتەرىمەن قالالار مەن اۋىل­دارداعى حالىقتىڭ 100%-ى قامتاماسىز ەتىلەدى.

سولتۇستىك قازاقستان وبلىسىندا 2022 جىلى تۇرعىن ءۇيدى ىسكە قوسۋ جوسپارى 401 مىڭ شارشى مەتردى قۇرادى. ونىڭ 299 مىڭى نەمەسە 75 پايىزى ەنگىزىلدى. بۇل تۋرالى ءوڭىر باسشىسى ايداربەك ساپاروۆ حابارلادى.

تۇرعىن ءۇيدى ىسكە قوسۋ كورسەتكىشىن ورىنداماۋعا قۇرىلىس ماتەريالدارىنىڭ قىمباتتاۋى سەبەپ بولدى. وسىعان باي­لا­نىستى وبلىس ورتالىعىندا تۇرعىن ۇيلەردى پايدالانۋعا بەرۋ جوبالاردى تۇزەتۋ سەبەبىنەن 2023 جىلعا اۋىس­تى­رىلدى. بۇل كوممەرتسيالىق تۇرعىن ءۇي قۇرىلىسىنىڭ قارقىنىنا دا اسەر ەتتى.

ەكىنشىدەن، 2019 جىلدان باستاپ وبلىس اۋداندارىندا تۇرعىن ءۇيدى پاي­دالانۋعا بەرۋدىڭ نەگىزگى ۇلەسى «ەڭبەك» باعدارلاماسىن ىسكە اسىرۋ اياسىندا جەكە تۇرعىن ءۇي سالۋ ەسەبىنەن قامتاماسىز ەتىلدى. تۇرعىن ءۇيدى ىسكە قوسۋ كورسەتكىشىنە قول جەتكىزۋ ءۇشىن 2023 جىلى قولدا بار مۇم­كىن­دىكتەردى ەسكەرە وتىرىپ، ىسكە اسىرىلاتىن جوبالاردى قايتا قاراۋ جونىندەگى جۇمىس جۇرگىزىلەدى.

اتىراۋ وبلىسىنىڭ اكىمى سەرىك شاپ­كەنوۆتىڭ حابارلاۋىنشا، 2022 جىلى ين­جەنەرلىك-كوممۋنيكاتسيالىق ينفراقۇ­رىلىم قۇرىلىسىن جۇرگىزۋگە 7،4 ملرد تەڭ­گە ءبولىنىپ، ونىڭ ىشىندە 4،7 ملرد تەڭگە يگە­رىلدى. بۇل – بولىنگەن قاراجاتتىڭ 63،3%-ى.

يگەرىلمەگەن 2 ملرد تەڭگەدەن اسا قاراجات – اتىراۋ قالاسىنىڭ تالعايران اۋىلىندا اۋدانى 62 گەكتار ۋچاسكەگە بار­لىق ينجەنەرلىك ينفراقۇرىلىمدى جۇرگى­زۋگە قاتىستى جوبالار.

قاراجاتتىڭ تولىق جانە ۋاقتىلى يگەرىلمەۋىنىڭ نەگىزگى سەبەبى – مەملەكەتتىك ساتىپ الۋ بارىسىندا ايقىندالعان مەر­دىگەرلەردىڭ وزدەرىنە العان مىندەتتەمەلەرىن ورىنداماۋى. ويتكەنى كەيبىر جەڭىم­پاز كومپانيالاردىڭ وڭىرى­­مىزدە ماتەريالدىق-تەحنيكالىق بازاسى­نىڭ بول­ماۋىنا باي­لا­نىستى جۇمىستاردى ۇيىم­داس­تىرا المادى.

اتالعان ماسەلەلەردى شەشۋ ءۇشىن اكىم­دىكپەن الىنعان مىندەتتەمەلەردى ۋاق­تىلى ورىنداماعانى ءۇشىن مەردىگەرلەرمەن كەلىسىمشارتتاردى بۇزۋ جانە ولاردى جوسىقسىز مەردىگەر دەپ تانۋ بويىنشا مامانداندىرىلعان ەكونوميكالىق سوتىنا تالاپ-ارىزدار جولدانىپ، تاپ­سىرىس بەرۋشىنىڭ پايداسىنا شەشىلدى.

قۇرىلىس ماتەريالدارىنا جانە قۇرال-جابدىقتارعا باعانىڭ وسۋىنە باي­لا­نىستى جوبالارعا تۇزەتۋ ەنگىزۋگە شەشىم قابىلدانىپ، جۇمىستار جۇرگىزىلىپ جاتىر.

پرەمەر-مينيستر تۇرعىن ءۇي-كوم­مۋنالدىق ينفراقۇرىلىمدى دامىتۋدىڭ الەۋمەتتىك جانە ەكونوميكالىق ماڭىزى وتە زور ەكەنىن اتاپ ءوتتى. وتكەن جىلى 130 مىڭنان اسا وتباسى وزدەرىنىڭ تۇرعىن ءۇي جاعدايلارىن جاقسارتتى. جالپى، ەلىمىزدە تۇرعىن ءۇيدى پايدالانۋعا بەرۋ جوسپارى ورىندالدى. بىراق 2021 جىلمەن سالىستىرعاندا ءوسۋ قارقىنى ءبىرشاما تومەندەدى. «بيىل 15،3 ملن شارشى مەتر تۇرعىن ءۇيدى پايدالانۋعا بەرۋ جوس­پار­لانىپ وتىر. بۇل 2022 جىلعى كورسەت­كىش­تەن تومەن. نەگىزگى پروبلەما – قاجەت­تى ينفراقۇرىلىمنىڭ بولماۋى. مىسالى، ەلوردادا ينفراقۇرىلىم مەن ەنەرگورە­سۋرستاردىڭ جەتپەۋىنەن الداعى جىلدارى جاڭا تۇرعىن ءۇي سالۋ كولەمى ءبىرشاما تومەن جوسپارلانىپ وتىر»، دەدى ءا.سمايىلوۆ.

ول مەملەكەت باسشىسى استانانى دامى­تۋ جونىندەگى كەڭەستە مۇنداي پروبلە­ما­لاردى شەشۋ ءۇشىن ينجەنەرلىك ينفرا­قۇرىلىمدى جۇيەلى جوسپارلاۋ جانە كەشەندى تۇردە دامىتۋ قاجەت ەكەنىن اتاپ وتكەنىن ايتتى.

پرەمەر-مينيستر مەملەكەتتىك باع­دار­لاما بويىنشا سالىنعان تۇرعىن ۇيلەردىڭ ماسەلەسىنە جەكە توقتالدى. وتىرىسقا قاتىسۋشىلارعا ساپا ستان­دارتتارىنا سايكەس كەلمەيتىن اۋلالاردىڭ فوتوسۋرەتتەرى كورسەتىلدى. «مۇنداي ۇيلەردىڭ قاي وڭىردە سالىنعانىن ايتپاي-اق قويايىن. بىراق بارلىق جەردە وسىنداي كورىنىس. بالالاردىڭ ويىن الاڭىنا قاراڭىزدار! جولداردىڭ جاعدايى قانداي؟ بۇل نە، قالىپتى نورماعا اينالعان با؟ اكىمدەر بيۋدجەت قارجىسىنا سالىنعان ۇيلەرگە رەۆيزيا جاساپ، بارلىق كەمشىلىكتى جويۋى كەرەك. قۇرىلىستىڭ ساپاسىن قاتاڭ باقىلاۋعا الۋ قاجەت»، دەدى ءا.سمايىلوۆ.

پرەمەر-ءمينيستردىڭ ايتۋىنشا، بۇگىنگى تاڭدا تۇرعىن ءۇي-كوممۋنالدىق شارۋا­شىلىق سالاسىندا شۇعىل ءارى ساپالى شەشۋدى قاجەت ەتەتىن ماسەلەلەر كوپ. سونى­مەن قاتار جاۋاپتى مەملەكەتتىك ورگان­داردىڭ جۇمىسىندا دا حالىقتىڭ الەۋ­مەتتىك وسال توپتارىن تۇرعىن ۇيمەن قامتاماسىز ەتۋدە كەمشىلىكتەر بار. كەزەكتە تۇرعانداردى باسپانامەن قامتاماسىز ەتۋ جۇمىس­تارىنىڭ ساپاسىز جوسپارلانۋىن دا بولەك الىپ قاراۋعا بولادى. «سالىنىپ بىتكەن تۇرعىن ۇيلەرىن الا الماي جۇرگەن ازامات­تاردان شاعىمدار كوپتەپ تۇسۋدە. سە­بەبى وتباسى بانكىندە جەڭىلدىكپەن نەسيە بە­رۋگە قاجەتتى قاراجات جوق. جۇمىسقا بۇلاي سالعىرت قاراۋعا بولمايدى»، دەدى ءا.سما­يى­لوۆ.

ايتىلعانداردى ەسەپكە الا وتىرىپ، پرەمەر-مينيستر كەزەكتە تۇرعاندارعا جالداۋ اقىسىن سۋبسيديالاۋ جونىندەگى شارالاردىڭ تيىمدىلىگىنە قوسىمشا تالداۋ جۇرگىزىپ، ناقتى ۇسىنىستار ەنگىزۋدى، سونداي-اق كەزەكتە تۇرعانداردى تۇرعىن ۇيمەن قامتاماسىز ەتۋ كەزىندە مەملەكەتتىك قولداۋدىڭ بارلىق باعىتىن ۋاقتىلى قارجىلاندىرۋدى تاپسىردى.

ءا.سمايىلوۆ وڭىرلەردە قۇرىلىس ماۋسىمىن ۋاقتىلى باستاۋ ءۇشىن ءتيىستى جەر ۋچاسكەلەرىن الدىن الا ءبولۋ، جوبالىق قۇجاتتامانى ازىرلەۋ جانە قاجەتتى ينفرا­قۇرىلىمدى جۇرگىزۋ ماڭىزدى ەكەنىن اتاپ ءوتتى.