قوعام • 16 تامىز، 2022

بالالارعا ارنالعان ستارتاپتار

36 رەت كورسەتىلدى

مەملەكەت باسشىسى قاسىم-جومارت توقاەۆتىڭ باستاماسىمەن 2022 جىل بالالار جىلى دەپ جاريالانعانى بەلگىلى. پرەزيدەنت اتاپ وتكەندەي، بۇل جىلى مەرەكەلىك ءىس-شارالاردى وتكىزۋمەن شەكتەلۋگە بولمايدى. دۇرىسى – بالالار ءۇشىن دەنساۋلىق ساقتاۋ، ءبىلىم بەرۋ، الەۋمەتتىك قامسىزداندىرۋ سالالارىندا ناقتى شارالار قابىلداۋ. سوندىقتان بۇل يگى باستامادان Astana Hub حالىقارالىق IT ستارتاپتار تەحنوپاركى دە قالىس قالعان جوق.

ناقتىراق ايتساق، Astana Hub تەحنو­پاركىنىڭ بازاسىندا بالالاردى دامىتۋ مەن قورعاۋعا باعىتتالعان ستارتاپتار مەن IT جوبالار قۇرىلدى. سولارعا از-كەم توقتالىپ ءوتۋدى ءجون كورىپ وتىرمىز.

بىرەگەي جوبالاردىڭ ءبىرى – UvU. بۇل 5 جاستان 16 جاسقا دەيىنگى بالالاردى 4 ورىندى اۆتوكولىكپەن تاسىمالدايتىن ايەل جۇرگىزۋشىلەرى بار قاۋىپسىز، ىڭعايلى جانە قولجەتىمدى سەرۆيس. جوبا­نىڭ سەرىكتەستەرى – وتباسىلارعا ىنتى­ماقتاستىق پەن ءوزارا كومەك قاعيدات­تا­رىنا سايكەس تاسىمالداۋدى ۇيىم­داس­تىرۋعا كومەكتەسۋگە دايىن جۇرگىزۋشى انالار.

Roqed دەگەن دە جوبا بار. ول عىلىمدى وقىتۋعا ارنالعان جوعارى ساپالى ۆيزۋال­دى جانە ينتەراكتيۆتى باعدارلاما­لىق جاساقتاما. ءبىلىم بەرۋ مەكەمەلەرىنە جوعارى تەحنولوگيالاردى ەنگىزۋگە باعىت­تالعان. Roqed-ءتىڭ ۆيرتۋالدى جانە ينتەر­اكتيۆتى ورتادا عىلىمداردى ۇيرەنۋگە جانە پراكتيكالىق داعدىلاردى دامىتۋعا ارنالعان قوسىمشالارى بار. ەنتسيكلوپەدياسى بار 1 200-دەن استام ينتەراكتيۆتى 3D ۆيزۋاليزاتسيادان تۇرادى.

تەحنوپارك بازاسىندا بالالار ءمو­بيل­دى ويىندارىن دامىتۋ ستۋدياسى جۇمىس ىستەيدى. بۇل Funtyx Games دەپ اتالادى. مۇنداعى ازىرلەمەلەردىڭ ءبىرى – ەڭ كىشكەنتاي بالالارعا ارنالعان Jungle town ءموبيلدى ويىنى. ونىڭ باس­تى كەيىپكەرلەرى – سۇيكىمدى جانۋارلار.

Big dream – وقۋلىقتارداعى قارا­پايىم سۋرەتتەردى 3D فورماتىندا كورسە­تەتىن باعدارلاما. 2017 جىلدان باستاپ Big Dream lab ءبىلىم بەرۋ، ماركەتينگ، قۇرىلىس، ءوندىرىس جانە پوليگرافيا سالاسىندا تولىقتىرىلعان، ۆيرتۋالدى جانە ارالاس شىنايىلىقتىڭ وزىق تەحنولو­گيالارىن ازىرلەپ، ەنگىزىپ كەلەدى.

Bilim Media Group جوباسىنىڭ نەگىزگى ميسسياسى مەن ۇرانى – بارلىعىنا قول­جەتىمدى ساپالى ءبىلىم. نەگىزگى رەسۋرسى – Bilimland.kz پورتالى. وندا نولدەن ەكى جاسقا دەيىنگى بالالاردى مەكتەپكە دەيىنگى وقىتۋعا ارنالعان ماتەريالدار، باستاۋىش جانە ورتا سىنىپتارعا ارنالعان كۋرستار بار.

قازاقستانداعى بالاباقشالار مەن اتا-انالارعا ارنالعان العاشقى جانە بىرەگەي قوسىمشا BALAM دەپ اتالادى. بۇل اتا-انالار مەن بالاباقشالاردىڭ قارىم-قاتىناسىن تيىمدىرەك جانە جەڭىل­دەتۋگە باعىتتالعان يننوۆاتسيالىق جوبا.

ABCHESS – ونلاين جانە وفلاين رەجىمدە، جاتتىقتىرۋشىمەن نەمەسە ءوز بەتىنشە شاحماتتى ۇيرەتۋدىڭ زاماناۋي ەكوجۇيەسى. نەگىزگى مىندەت – بارلىعىنا قولجەتىمدى ساپالى شاحمات ءبىلىمىن قۇرۋ.

Balapay – بالالار ءۇشىن مەكتەپتەردە قولما-قول اقشاسىز تاماقتانۋ سەرۆيسى. وقۋشىلار جەكە smart-كارتانى مەكتەپ اسحاناسىندا تولەم قۇرالى رەتىندە پايدالانا الادى.

كەلەسى جوبا – KidSecurity. بۇل اتا-انا­لارعا بالالاردىڭ ورنالاسقان جەرىن ءبىلىپ وتىرۋعا مۇمكىندىك بەرەتىن ءموبيلدى قوسىمشا.

مىنە، Astana Hub حالىقارالىق IT-ستارتاپتار تەحنوپاركى بازاسىندا بالالاردى دامىتۋ مەن قورعاۋعا باعىتتالعان وسىنداي IT جوبالار جۇمىس ىستەيدى.

سوڭعى جاڭالىقتار

ۇقساس جاڭالىقتار