رەفەرەندۋم-2022 • 19 مامىر، 2022

تابىستى بولاشاققا سەنىم مول

ءماجىلىس دەپۋتاتتارى امانجول ءالتاي، گۇلنار بيجانوۆا، يۋري جۋلين، ارمان قوجاحمەتوۆ جانە تىلەكتەس ادامبەكوۆ قاراعاندى وبلىسىنداعى ە.بوكەتوۆ اتىنداعى مەملەكەتتىك ۋنيۆەرسيتەتكە بارىپ، وقىتۋشىلار قۇرامىمەن كەزدەستى.

قايرات ءابىلدا

كەزدەسۋدە دەپۋتاتتار كونستيتۋتسياعا وزگەرىستەر مەن تولىقتىرۋلار ەنگىزۋ جونىندەگى رەسپۋبليكالىق رەفەرەندۋمنىڭ ماڭىزى مەن ماقساتى تۋرالى ايتتى.

«رەفورما حالىقتىڭ ەلدى باسقارۋعا قاتىسۋ مۇمكىندىگىن كەڭەيتۋگە جانە تۇتاستاي العاندا ازاماتتاردىڭ كونستيتۋتسيالىق قۇقىقتارىن قورعاۋدى كۇشەيتۋگە مۇمكىندىك بەرەدى»، دەدى يۋري جۋلين.

ءوز كەزەگىندە گۇلنار بيجانوۆا رەفەرەندۋمنىڭ ماڭىزدى ساياسي وقيعا ەكەنىن ايتىپ، ءاربىر قازاقستاندىق ءوز جاۋاپكەرشىلىگىن كورسەتە وتىرىپ، تۋعان ەلىنىڭ تابىستى بولاشاعىن قۇرۋعا ءوزىنىڭ قاتىستىلىعىن سەزىنۋگە ءتيىس ەكەنىنە نازار اۋداردى. «پرەزيدەنت ۇسىنعان جوبالار ەل ەكونوميكاسىنىڭ وركەندەۋىنە، قوعامنىڭ مەملەكەتتى باسقارۋ ىسىنە ىقپالىن كۇشەيتۋگە سەرپىن بەرەدى»، دەدى دەپۋتات.

ال پروفەسسور نۇرساحان احمەتوۆا رەفەرەندۋمعا قولداۋ كورسەتىپ، ريزاشىلىعىن ءبىلدىردى. «اتا زاڭعا ەنگىزىلەتىن تۇزەتۋلەر قاتارىندا جەردى، ونىڭ قويناۋىن، سۋدى، وسىمدىكتەر مەن جانۋارلار دۇنيەسىن، باسقا دا تابيعي رەسۋرستاردى حالىق مەنشىگى دەپ جاريالاۋ قاراستىرىلعان. مەنىڭ كوكەيىمە قونعان وسى وزگەرىستەردى زاڭمەن بەكىتۋ ءۇشىن رەفەرەندۋمعا بارامىن. ويتكەنى بۇل ءبىزدىڭ داۋىسىمىزبەن، شەشىمىمىزبەن جۇزەگە اسىرىلادى. مەن وسىعان سەنەمىن»، دەدى.

سونىمەن قاتار ءىس-شارادا ۇجىم مۇشەلەرى دەپۋتاتتارعا زەينەت جاسىن تومەندەتۋ مۇمكىندىگى تۋرالى ۇسىنىستارىن جانە باسقا دا بىرقاتار ماسەلەنى جەتكىزدى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز