رەسەي اقش-قا ەسكەرتۋ جاسادى

رەسەي قورعانىس مينيسترلىگى بورتتاعى وق-دارىلەر تۇسىنىكسىز ءورتتىڭ سالدارىنان جارىلىپ، كەمە پورتقا قايتىپ كەلە جاتقاندا سۋعا كەتكەنىن مالىمدەدى، ال ۋكراينا تاراپى كەمەنى ءوزىنىڭ «نەپتۋن» زىمىراندارىمەن شابۋىلداعانىن حابارلادى. رەسەيدىڭ قورعانىس مينيسترلىگى دالەل رەتىندە «موسكۆا» كرەيسەرىنىڭ ەكيپاجى بەينەلەنگەن سۋرەتتەردى جاريالادى. رەسەي ورتتەن نەمەسە سۋعا باتقان كەزدە زارداپ شەككەندەر تۋرالى حابارلاعان جوق.

كەلەسى كۇندەرى ۋكراينانىڭ بىرنەشە ايماعىندا تۇرعىن­دار­عا ەسكەرتۋ جاسالىپ، ۇيلەرىنەن، جەرتولەدەن شىقپاۋعا كەڭەس بەرىلدى. ۋكراينانىڭ استاناسى كيەۆ قالاسىنىڭ باسشىسى ۆيتالي كليچكو زىمىران شابۋىلىنان ءبىر ادام قازا تاۋىپ، بىرنەشە ادام جاراقات العانىن حابارلادى. لۆوۆتا دا جارىلىستار ەستىلگەن. ايماق باسشىسى ماكسيم كوزيتسكيدىڭ ايتۋىنشا، زەنيت بولىمشەلەرى رەسەيدىڭ سۋ-35 ۇشاقتارى اتقان ءتورت كرۋيزدىك زىمىرانىن جويعانىن اتاپ ءوتتى. دۇيسەنبىدەن باستاپ ماريۋپول قالاسىنا كىرۋگە جانە شىعۋعا تولىعىمەن تىيىم سالىنادى دەگەن دە حابار تارادى. بۇل دەگەنىمىز قالانىڭ وقشاۋلانىپ، حالىقتىڭ ەۆاكۋاتسياعا نە گۋمانيتارلىق كومەككە قول جەتكىزە المايتىنىن بىلدىرەدى.

سونداي-اق رەسەي وتكەن اپتادا اقش-قا ۋكرايناعا قارۋ-جاراق جەتكىزۋ ارقىلى جاعدايدى ۋشىقتىرىپ جاتقانىن ايتىپ، اقش پەن ناتو بۇل ارەكەتىن توقتاتپاسا، «اسا اۋىر سالدارى بولۋى مۇمكىن» دەگەن ەسكەرتۋمەن رەسمي ديپلوماتيالىق نوتا جىبەرگەن بولاتىن.

رەسەي ۇلىبريتانيانىڭ سانكتسياسىنا جاۋاپ بەردى. ۇلىبريتانيا ۇكىمەتىنىڭ لاۋازىمدى تۇلعالارى، ونىڭ ىشىندە پرەمەر-مينيستر بوريس دجونسون، پرەمەر-ءمينيستردىڭ ورىنباسارى-ادىلەت ءمينيسترى دومينيك رااب، سىرتقى ىستەر جانە قورعانىس مينيسترلەرىنىڭ باسشىلارى ەليزابەت تراسس پەن بەن ۋوللەس جانە بۇرىنعى پرەمەر-مينيستر تەرەزا مەي رەسەي فەدەراتسياسىنا كىرە المايدى.

« ۇلىبريتانيا ۇكىمەتىنىڭ بۇرىن-سوڭدى بولماعان دۇش­پان­دىق ارەكەتتەرىنە بايلانىستى، اتاپ ايتقاندا، رەسەي فەدەراتسياسىنىڭ جوعارى لاۋازىمدى تۇلعالارىنا سانكتسيا­لار ەنگىزۋىنە بايلانىستى، ۇلىبريتانيا ۇكىمەتىنىڭ نەگىزگى مۇشەلەرى مەن بىرقاتار ساياسي قايراتكەرىن رەسەيدىڭ ستوپ-تىزىمىنە ەنگىزۋ تۋرالى شەشىم قابىلداندى»، دەلىنگەن رەسەيدىڭ سىرتقى ىستەر مينيسترلىگى تاراتقان مالىمدەمەدە.

تولىق تىزىمگە جوعارىدا ايتىلعانداردان بولەك، كولىك ءمينيسترى گرانت شەپپس، ىشكى ىستەر ءمينيسترى پريتي پاتەل، قارجى ءمينيسترى ريشي سۋناك، بيزنەس، ەنەرگەتيكا جانە ونەركاسىپتىك ستراتەگيا ءمينيسترى كۆازي كۆارتەنگ، تسيفرلىق تەحنولوگيالار، مادەنيەت، باق جانە سپورت ءمينيسترى نادين دورريس، قورعانىس ءمينيسترىنىڭ ورىنباسارى دجەيمس حيپپي، شوتلانديانىڭ ءبىرىنشى ءمينيسترى نيكولا ستەردجەن، انگليا مەن ۋەلستىڭ باس پروكۋرورى سۋەللا براۆەرمان كىرگەن.

ۇلىبريتانيانىڭ سىرتقى ىستەر مينيسترلىگى 13 ساياساتكەردىڭ رەسەيگە كىرۋىنە تىيىم سالىنۋىنا بايلانىستى تىكەلەي جاۋاپ بەرگەن جوق، بىراق ۇكىمەت وكىلى رەسەيدىڭ باسىپ كىرۋىن تاعى ءبىر رەت ايىپتاعان مالىمدەمە جاساعان.

24 اقپاننان باستاپ رەسەيگە ەنگىزىلگەن باتىس سانكتسيالارى ءىرى ەكونوميكا يەسىنە قارسى جاسالعان ەڭ اۋىر شارا ەكەنى ايتىلدى.

بۇۇ قاقتىعىس باستالعاننان بەرى 1900-دان استام بەيبىت تۇرعىننىڭ ءولىمىن تىركەگەن، بىراق بۇل كورسەتكىش الدەقايدا جوعارى بولۋى مۇمكىن ەكەنىن ەسكەرتەدى. بۇۇ ادام قۇقىقتارى جونىندەگى جوعارعى كوميسسار باسقارماسىنىڭ (اقجكب) مالىمەتى بويىنشا 24 اقپان مەن 14 ءساۋىر ارالىعىندا قازا تاپقان 1982 ازاماتتىڭ 162-ءسى بالالار بولعان. تاعى 2 651 بەيبىت تۇرعىن جاراقات العان، ونىڭ 256-سى بالا. ءولىم مەن جاراقاتتاردىڭ كوپشىلىگىنە اتىس پەن اۋە سوققىلارى سەبەپ بولعان.

ادام قۇقىقتارى جونىندەگى جوعارعى كوميسسار ميشەل باچەلەت بۇعان دەيىن كيەۆ استاناسىنىڭ جانىنداعى بۋچا قالاسىندا قازا تاپقان بەيبىت تۇرعىندار تۋرالى حابار­لا­ما­لار­دىڭ جانتۇرشىگەرلىك بولعانىن جانە «سوعىس قىلمىستارى تۋرالى ماڭىزدى جانە الاڭداتارلىق سۇراقتار» كوتەرەتىنىن ايتقان، سونداي-اق ول دالەلدەردى ساقتاۋعا شاقىردى.

ۋكراينا پرەزيدەنتى ۆولوديمير زەلەنسكي قازىرگى ۋاقىتتا سوعىس كەزىندە 2 500-دەن 3 مىڭعا دەيىن ۋكراين اسكەرى قازا تاۋىپ، 10 مىڭعا دەيىنى جاراقات العان دەپ مالىمدەدى.