قوعام • 28 اقپان، 2022

Zhas Project: جوبا ناتيجەسى قۋانتارلىق

1317 رەت كورسەتىلدى

ەلوردادا «جاستار كورپۋسىن دامىتۋ جوباسىن جۇزەگە اسىرۋ قورىتىندىلارى» بويىنشا دوڭگەلەك ۇستەل وتىرىسى ۇيىمداس­تىرىلدى. جيىنعا ءبىلىم جانە عىلىم، اقپارات جانە قوعامدىق دامۋ، ەڭبەك جانە حالىقتى الەۋمەتتىك قورعاۋ مينيسترلىكتەرىنىڭ، ۇەۇ، جاستار ۇيىمدارىنىڭ وكىلدەرى، دۇنيەجۇزىلىك بانك قىزمەتكەرلەرى جانە دەپۋتاتتار قاتىستى.

قازاقستاندا جاستار كورپۋسىن دامىتۋ جوباسىنا 10 مىڭعا جۋىق جاس قاتىستى. ولار 3 مىڭ گرانتتىق جوبانى جۇزەگە اسىردى. جوبانى باسقارۋ جونىندەگى توپتىڭ ۇيلەستىرۋشىسى گۇلميرا ەسكەندىروۆانىڭ ايتۋىنشا، جاستار كورپۋسىن دامىتۋ جوباسىن ءبىلىم جانە عىلىم مينيسترلىگى مەن دۇنيەجۇزىلىك بانك 2016 جىلى قولعا الىپ، 2021 جىلى اياقتادى.

«جوبا ءۇش كومپونەنتتەن تۇر­دى. ولاردىڭ ىشىندەگى ەڭ ءىرىسى – Zhas Project گرانتتىق باعدار­لا­ما­سى. ەكىنشى كومپونەنت جاس­تاردى دامىتۋعا جاۋاپتى ۆەدوم­ستۆو – ءبىلىم جانە عىلىم مي­نيسترلىگىن، اقپارات جانە قو­عام­دىق دامۋ مينيسترلىگىن ينس­تي­تۋ­تسيونالدىق دامىتۋعا باعىت­تال­دى. مينيسترلىكتەردىڭ جاس­تار سايا­ساتىنداعى ينستيتۋتسيو­نالدى­لىعىن شەشۋ جانە نىعايتۋ، جاس قىزمەتكەرلەردىڭ الەۋەتىن ارتتىرۋ ءۇشىن ءتۇرلى ماقسات قويىلدى. جوبانى ىسكە اسىرۋ بارىسىندا گرانتتىق باعدارلاماعا 10 مىڭعا جۋىق جاس قاتىسىپ، ولار 3 مىڭعا جۋىق گرانتتىق جوبانى جۇزەگە اسىردى. ەكىنشى كومپونەنت اياسىندا جاستار ساياساتى بويىنشا ستراتەگيالىق قۇجاتتاردى دۇرىس زەرتتەۋگە، ازىرلەۋگە باعىتتالعان 6 تاپسىرما ورىندالدى»، دەدى گ.ەسكەندىروۆا.

سپيكەر اتاپ وتكەندەي، جاستار توپپەن جۇمىس ىستەپ جانە توپتىڭ ءاربىر مۇشەسى 6 اي بويى 40-60 مىڭ تەڭگە كولەمىندە ستيپەنديا الىپ وتىرعان. گرانتتىق قارجىلاندىرۋ وزدەرىنىڭ الەۋمەتتىك يدەيالارىن ۇسىنعاندارعا بەرىلگەن. الەۋمەتتىك جوبالار ءتۇرلى يدەيالارعا باعىت­تالعان. جاستار سپورت كلۋبتارىن، تىگىن تسەحتارىن، اياق كيىم سالوندارىن، نان ونىمدەرىنىڭ شاعىن وندىرىستەرىن اشقان.

ء«بىز ولاردىڭ الدىنا يدەيانى بيزنەسكە اينالدىرۋ مىندەتىن قويعان جوقپىز. بۇل ءۇشىن كوپتەگەن باسقا باعدارلاما بار. ءبىزدىڭ جوبامىز بيزنەستى باستاۋ ءۇشىن داعدىلارى جوق جاستارعا باعىتتالعان. ياعني ولارعا ءوز داعدىلارىن شىڭداۋعا مۇمكىندىك بەردىك، ولار جوبالىق باسقارۋدى ۇيرەندى، مەنتورلارمەن جۇمىس ىستەدى. وكىنىشكە قاراي، قازىر جوبانى قارجىلاندىرۋ اياقتالدى. بۇل باستامانى اقپارات جانە قوعامدىق دامۋ مينيسترلىگىنە بەرەمىز. مينيسترلىك تە جوبانى جالعاستىرۋدى جوسپارلاپ، قاراستىرىپ جاتقانىن ەستىدىك»، دەدى گۇلميرا ەسكەندىروۆا.

ءبىلىم جانە عىلىم ۆيتسە-ءمي­نيسترى قۋانىش ەرعاليەۆتىڭ ايتۋىنشا، Zhas Project جوباسى مەم­لەكەتتىك جاستار ساياساتىنىڭ قاجەتتىلىكتەرىن قاناعاتتاندىرىپ قانا قويماي، ونىڭ دامۋىنا، جاس­تارمەن جۇمىس ىستەۋدە جانە تا­سىلدەر مەن شارالاردىڭ پايدا بولۋىنا ىقپال ەتتى.

«وسى 5 جىل ىشىندە Zhas Project ەلىمىزدە كەڭىنەن تانىلدى جانە بۇل كەزدەيسوق ەمەس دەپ ويلايمىن. بۇل جوبا ومىرلىك ماڭىزدى داع­دىلاردى مەڭگەرگەن جاستارعا عانا اسەر ەتىپ قويعان جوق. جاستار وزدەرىنىڭ الەۋمەتتىك جوبالارىن جۇزەگە اسىرۋدى ۇيرەندى، بۇل تۇتاس قوعامىمىزعا وڭ ىقپالىن تيگىزەدى. اتالعان جوباعا 10 مىڭعا جۋىق جاس قاتىستى جانە 9 مىڭى وقۋدى تابىستى اياقتادى. 4 جىل ىشىن­دە ەكى مىڭنان استام الەۋمەتتىك جو­با جۇزەگە اسىرىلدى، ونىڭ 20 پايىزى اۋىلدىق جەرلەردە، 20 پايىزى ءبىلىم بەرۋ ماقساتىندا بولدى. جوبالاردىڭ 10 پايىزى مادەنيەتتى دامىتۋعا باعىتتالسا، كەيبىرى الەۋمەتتىك سالاعا ارنالدى. سونىمەن بىرگە اۋىلدىق جەرلەردە وتە ماڭىزدى تىلدىك كۋرس­تار، كومپيۋتەرلىك كلۋبتار ىسكە قوسىلدى، ەت جانە ءسۇت ءوندىرىسى، تاماق ونەركاسىبى قۇرىلدى، سۇلۋلىق سالوندارى، تىگىن سالوندارى دا اشىلدى، مۇنىڭ ءبارى جاستارعا ءوز جوبالارىن جۇزەگە اسىرۋعا جانە بيزنەسىن جالعاستىرۋعا مۇمكىندىك بەردى»، دەدى ۆيتسە-مينيستر.

سونداي-اق بۇل جوبالار قوعام­داس­تىق ءۇشىن، جەرگىلىكتى جەرلەردە جۇمىس ىستەيتىن مەملەكەتتىك ورگاندار ءۇشىن دە پايدالى بولدى.

«Zhas Project مەملەكەتتىڭ كەيبىر ستراتەگيالىق مىندەتتەرىن شەشۋ ءۇشىن بىرنەشە تاپسىرمانى ىسكە اسىردى. ولار جاستاردى جانە ولاردىڭ ۆولونتەرلىك قىز­مەتكە قاتىسۋىن دامىتۋعا، قو­عام­داستىقتىڭ ءومىرى ءۇشىن جاۋاپ­كەرشىلىككە جانە مەكتەپتى اياق­تاپ، ماماندىق تاڭداۋ كەزىندە دۇرىس شەشىم قابىلداۋدى ۇيرە­تۋگە باعىتتالدى. اتاپ ايتقان­دا، جوبا بارىسىندا NEET سانا­تىنداعى جاستارمەن جۇمىس جو­نىندەگى نۇسقاۋلىقتار، جاستاردى دامىتۋ يندەكسى، ۆولونتەرلىك قىزمەتتى دامىتۋ ستراتەگياسى، كا­سىپتىك باعدارلاۋ جۇيەسىن دامىتۋ جونىندەگى ادىستەمەلىك ۇسىنىم­دار جانە باسقا دا قۇجاتتار ازىر­لەنگەن بولاتىن. بيىل ءبىز جالپى ءبىلىم بەرەتىن مەكتەپتەردىڭ وقۋ باعدارلامالارىنا ومىرلىك ماڭىزى بار داعدىلاردى ۇيرەتۋ كۋرستارىن ەنگىزىپ جاتىرمىز. وسى ورايدا جوبا اياسىندا ازىرلەنگەن داعدىلار باعدارلاماسىن قاراستىرۋدامىز. وسى جىلدار ىشىندە جوبا مەملە­كەتتىك جاستار ساياساتىنىڭ قاجەت­تىلىكتەرىن قاناعاتتاندىرىپ قانا قويماي، ونىڭ دامۋىنا، جاستارمەن جۇمىس ىستەۋدە جانە تاسىلدەر مەن شارالاردىڭ پايدا بولۋىنا ىقپال ەتتى دەپ ايتا الامىز»، دەدى قۋانىش ەرعاليەۆ.

سوڭعى جاڭالىقتار

ۇقساس جاڭالىقتار