ارينە, مۇنىڭ بارىنە مىڭداعان مىسال كەلتىرىپ, كەلىستىرە تارقاتىپ ايتا بەرۋگە بولادى, دەگەنمەن بۇرىن وقىعان, بىراق قانشا ۋاقىت وتسە دە ءار كەز جادىمىزدا جاڭعىرىپ تۇرا بەرەتىن ءبىر مىسال ەسىمىزگە تاعى ءتۇستى. تۋرا قازىرگى قوعامنىڭ تامىرىن تاپ باسقان, وسى كەزەڭدە ءومىر ءسۇرىپ جاتقان ءار ادامنىڭ ىشكى جاراسىن تىرناپ وتەتىن تاماشا تۋىندىنى ارۋاعىڭنان اينالايىن الەكەڭ, ءاليحان بوكەيحان اۋدارىپتى. ەزوپتان.
«ۇستانىڭ دۇكەنىنە كۇزەن كىرىپ, ەگەۋىن تاۋىپ الىپ, جالاپ-جالاپ الدى. تىلىنەن قان اقتى. قان ءتاپ-ءتاتتى. تەمىردەن شىققان قان عوي دەپ, كۇزەن قۋانىپ ءۇستى-ۇستىنە جالاي بەردى. ءوستىپ كۇزەن تىلىنەن ايرىلدى». ءبىز كەيدە بىرەۋدى توناعانىمىزعا, بىرەۋدى قاناعانىمىزعا قارىق بولامىز. بىراق اينالىپ كەلگەندە ءوز-ءوزىمىزدى توناپ, ءوزىمىزدى ءوزىمىز ادەيىلەپ اكەلىپ وماقاستىرا ورعا جىعىپ جاتقانىمىزدى اڭدامايمىز.
اش كۇزەننىڭ اجالى اشتىقتان بولعان جوق, ول ءوز قۇلقىنىنىڭ قۇردىمىنا قۇلادى. وعان بىرجاقتى ارتار كىنامىز دە جوق. ول ءوز-ءوزىن جەمتىككە اينالدىرعان كىشكەنتاي جاندىك, ساناسىز ماق ۇلىقات. قارىنىنىڭ قامىمەن ءجۇرىپ, ءناپسىسىنىڭ ءنان قاقپانىنا وڭباي ءتۇستى. ءتاتتى قاندى تالعاماي جۇتقان اشكوزدىگى اقىرى ءوزىنىڭ سورى بولىپ شىقتى. ال ەندى سانالى ادام دەگەن اجەپتاۋىر الەۋمەتتىك سالماعى بار بىزگە نە جورىق؟
ەزوپ كۇزەنى ءبىزدىڭ كوز الدىمىزعا كوپ كەيىپكەردى الىپ كەلەر ەدى.
