ايماقتار • 18 قاڭتار، 2022

جەتىسۋ: جاعداي تۇراقتالدى ما؟

69 رەت كورسەتىلدى

جەتىسۋداعى دۇربەلەڭنىڭ دابىسى الىستاعانمەن، ايماقتا ءالى دە تەررورلىق قاۋىپتىڭ «قىزىل دەڭگەيى» ساقتالىپ وتىر. قازىر وڭىردە الەۋمەتتىك نىساندار مەن قوعامدىق كولىكتىڭ جۇمىسى تولىق قالپىنا كەلىپ، ادامداردىڭ بويىنداعى ۇرەي سەيىلە باستاعانداي. الايدا وبلىس ورتالىعى ماڭىنداعى اۋىلداردا اسكەريلەر قوسىمشا وپەراتسيالار جۇرگىزىپ جاتقانى جونىندە اقپارات تا بار.

جالپى، جاپپاي تارتىپسىزدىك كەزىندە الماتى وبلىسىندا 337 ادام مەديتسينالىق كومەككە جۇ­گىنگەنى انىقتالدى. ونىڭ ىشىندە جاراقات العانداردىڭ 13-ءى اسكەري قىزمەتكەر. وقيعادا زارداپ شەككەندەر قاتارى تالدىقورعان قالاسىندا كوپ بولىپ تۇر. وسى كۇندەرى وبلىس ورتالىعىنداعى كوپ سالالى اۋرۋحاناعا 114 ادام كومەك سۇراپ جۇگىنگەن.

– ءبىزدىڭ مەكەمەگە زارداپ شەككەن 114 ادام جۇگىنىپ، ونىڭ 25-ءى اۋرۋحاناعا جاتقىزىلدى. قالعاندارىنا ءتيىستى امبۋلا­تو­ر­لىق ەم جاسالدى. كۇردەلى كەزەڭدە اۋرۋحانادا دارىگەرلەردىڭ كۇشەيتىلگەن بريگاداسى جۇمىس ىستەپ، زارداپ شەككەندەرگە جوعا­رى دەڭگەيدە مەديتسينالىق كو­مەك كورسەتتى. قازىر اۋرۋحاناعا تۇسكەن 25 ادامنىڭ 15-ءى جازىلىپ شىقتى. وپەراتسيا جاسالعان 10 ادام وڭالتۋ ەم شارالارىن قابىلداۋدا. ولاردىڭ دەنساۋلىعى بىرتە-بىرتە تۇزەلىپ كەلەدى، – دەيدى تالدىقورعان قالالىق كوپ سالالى اۋرۋحاناسىنىڭ ديرەكتورى جۇماحان مولداعۇلوۆ.

ايتپاقشى، الماتى وبلىسى­نىڭ اكىمى قانات بوزىمباەۆ اتال­عان كوپ سالالى اۋرۋحاناعا بارىپ، ب ۇلىك كەزىندە زارداپ شەككەن ازاماتتاردىڭ دەنساۋلىق جاعدايىن ءبىلدى. اكىم جارالانعان قاراپايىم ازاماتتارمەن جانە كۇشتىك قۇرىلىمدار وكىلدەرىمەن تىلدەستى. قىزمەتتىك مىندەتتەرىن ادال ورىنداپ، قايسارلىق پەن باتىرلىقتىڭ ۇلگىسىن كورسەت­كەندەرى ءۇشىن اسكەري ماماندارعا العىس ءبىلدىردى. ولاردىڭ وتباسىلارىنا بارلىق قاجەتتى كومەك كورسەتىلەتىنىن ايتتى.

وكىنىشكە قاراي، جەتىسۋلىقتار «قاڭتار قىرعىنى» كەزىندە قازا بولعان جەرلەستەرىن جەر قوينىنا تاپسىرىپ جاتىر. سونىڭ ءبىرى الماتى قالاسىنداعى جاپپاي تارتىپسىزدىككە تويتارىس كەزىندە بۇزاقىلار قولىنان مەرت بولعان شەكارا قىزمەتىنىڭ ارناۋلى ماقساتتاعى ۇتقىر ءىس-قيمىلدار توبىنىڭ تەحنيك-جۇرگىزۋشىسى، 22 جاستاعى شاۆكات ارميدينوۆ بولاتىن. 2000 جىلى 21 شىلدەدە ۇيعىر اۋدانى، ۇلكەن ديقان اۋى­لىندا دۇنيەگە كەلگەن جاس جاۋىن­گەر 2020 جىلى قوردايداعى شەكارا بەكەتىندە اسكەري بورىشىن وتەپ، كەيىننەن سول بولىمدە كەلىسىمشارتپەن قىزمەتكە قالاعا كەتكەن. جاقىندا وتان الدىنداعى بورىشىنا ادال بولىپ، ەل تۇتاستىعىن ساقتاۋ جولىندا ەرلىكپەن قازا تاپقان جاس ۇلاننىڭ دەنەسى ءوزىنىڭ تۋعان جەرى – ۇلكەن ديقان اۋىلىنا جەتكىزىلىپ، اۋدان جۇرتشىلىعى ونى اقتىق ساپارعا شىعارىپ سالدى.

سونداي-اق جاپپاي تارتىپسىزىك سالدارىنان وبلىستاعى 120 كاسىپ­كەرلىك نىسانى زارداپ شەككەن كورىنەدى. نەگىزگى شىعىنعا باتقان كاسىپكەرلەر تالدىقورعان قالاسى، قاراساي، جامبىل، اقسۋ اۋداندارىنان انىقتالعان. الدىن الا ەسەپتەۋلەر بويىنشا كەلتىرىلگەن زالالدىڭ جالپى سوماسى 8،5 ملرد تەڭگەدەن اسىپ وتىر. ماسەلەن، وبلىس ورتالىعىندا «قاراعاش» ساۋدا ءۇيى مەن ونداعى 5 بۋتيك، Sulpak تۇرمىستىق تەحنيكا دۇكەنىنىڭ 3 جەلىسى، 2 Technodom تەحنيكا دۇكەنى، Small سۋپەرماركەتى، پوليتسيا دەپارتامەنتى مەن وبلىس اكىمدىگىنىڭ اسحانالارى زارداپ شەكتى، قاراساي اۋدانىندا «اپورت» ساۋدا جانە ويىن-ساۋىق ورتالىعىندا 70-كە جۋىق دۇكەن مەن بۋتيك جانە «التىن وردا» بازارىنىڭ 20-عا جۋىق ساۋدا دۇكەنى، سونداي-اق 2 جانارماي بەكەتى، اقسۋ اۋدانىندا 1 كاسىپورىن، جامبىل اۋدانىندا 1 جانارماي قۇيۋ ستانساسى جانە باسقا دا نىساندار تونالىپ، ورتەلگەن.

 

الماتى وبلىسى

سوڭعى جاڭالىقتار

ۇقساس جاڭالىقتار