قازاقستان • 17 قاڭتار، 2022

2 ميلليون مونتاجدالعان انود ءوندىردى

پاۆلودارداعى قازاقستان ەلەكتروليز زاۋىتى 2 ميلليون مونتاجدالعان انود ءوندىردى. انود – اليۋميني وندىرىسىندەگى نەگىزگى شيكىزاتتىڭ ءبىرى. بۇل كاسىپورىننىڭ ەلەكترود ءوندىرۋ تسەحىندا 14 جىل بويى تۇراقتى تۇردە مونتاجدالىپ كەلەدى.

فارحات قايرات ۇلى

كاسىپورىننىڭ حابارلاۋىنشا، انود وندىرىسىندە زاماناۋي تەحنولوگيالار مەن تيىمدىلىگى 99،8 پايىزدى قۇرايتىن گازتازارتۋ جابدىقتارى پايدالانىلادى. ياعني پروتسەسس ەكولوگيالىق تۇرعىدا بارىنشا قاۋىپسىز. ەلەكترود ءوندىرۋ تسەحىنىڭ قۋاتى كاسىپورىندى ماتەريالدىڭ قاجەتتى قورىمەن قامداۋعا جەتكىلىكتى. قازىر زاۋىت كاسىپورىننىڭ مونتاجدالعان انودقا دەگەن سۇرانىسىن تولىق قامتاماسىز ەتىپ وتىر.

انود قۇيۋشى قۋات مەدەۋباەۆتىڭ ايتۋىنشا، انود قاجەتتى قالىپقا كەلتىرىلەدى. كەيىن ءتيىستى ستاندارتتارعا ساي بولۋى ءۇشىن الدىمەن ونى سىعىمداپ، كۇيدىرىپ، سوسىن بارىپ مونتاجدايدى. بۇل ءىستى ءتۇرلى ۋچاسكەلەردىڭ بىلىكتى ماماندارى ءوز اۋىسىمدارىندا اتقارادى.

ەكى ميلليونىنشى انودتى №54 اۋىسىم ماماندارى وندىرگەنىن ايتا كەتكەن ابزال. ولەگ سەرەبرەننيكوۆ اتالعان ەلەكترود ءوندىرۋ تسەحىندا انود قۇيۋشى بولىپ جۇمىس ىستەيدى.

– زاۋىتتا 2013 جىلدان بەرى ەڭبەك ەتىپ كەلەمىن. ءار اۋىسىم الدىندا ازداپ قوبالجيتىنىمىز بار. ويتكەنى انود ساپاسى تۇپكىلىكتى ونىمگە دە اسەر ەتەدى. مەنىڭشە، بۇل كاسىپتە ءوز ءىسىڭدى شىن ءسۇيىپ، جانىڭدى سالا ىستەسەڭ، جۇمىس جاقسى جۇرەدى. ناتيجە دە كوڭىل تولتىرىپ، جۇمىستان راحات الاسىڭ. مەن ءۇشىن وسى ەكى ميلليونىنشى انودتىڭ ماڭىزى زور. سەبەبى ونى ءوز قولىممەن دايىندادىم، – دەيدى و.سەرەبرەننيكوۆ.

اۋىسىم سايىن انود مونتاجداۋ ۋچاسكەسىنەن 250 انود وتەدى. بۇل – ايىنا 12 مىڭ 900 انود دەگەن ءسوز. قازاقستان ەلەكتروليز زاۋىتىندا وندىرىلگەن انود وتاندىق اليۋميني ساپاسىن باقىلاۋعا مۇمكىندىك بەرىپ، ونىمدەگى جەرگىلىكتى ۇلەستى 90 پايىزعا جەتكىزۋگە سەپتەسەدى. 2013 جىلى ءوز انود ءوندىرىسىن ىسكە قوسقان ساتتەن بەرى كاسىپورىن قىتايدان انود يمپورتتاۋدان باس تارتقان بولاتىن.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز