الەم • 17 قاڭتار، 2022

«وميكرون» جەدەل تارالۋدا

ەۋروپا مەديتسينا اگەنتتىگى گەرمانيادا «وميكرون» شتامىنىڭ تارالۋى جەدەلدەپ، رەكوردتىق دەڭگەيگە جەتكەنىن حابارلادى. كەشە ۆيرۋس جۇقتىرعاندار سانى 80 مىڭنان اسىپ، پاندەميا باستالعان ۋاقىتتان بەرى رەكوردتىق دەڭگەيگە جەتكەن.

سۆەتلانا عالىمجانقىزى

اتالعان اگەنتتىك ۆيرۋستىڭ جەرگىلىكتى (ەنەدميك) ۆيرۋسقا، ياعني ادامزات بىرگە ءومىر سۇرە الاتىن ۆيرۋس تۇرىنە اينالۋ مۇمكىندىگى بارىن العا تارتادى.

رەسەي دە «وميكرون» شتامىنىڭ جەدەل تارالىپ جاتقانىن حابارلادى. پرەمەر-ءمينيستردىڭ ورىنباسارى تاتيانا گوليكوۆا وسى اپتانىڭ سوڭىنا دەيىن ۇكىمەت پاندەميامەن كۇرەس بويىنشا جاڭا جوسپار ۇسىناتىنىن مالىمدەدى.

جاعداي قيىنداعانىن حابارلاعان تاعى ءبىر ەۋروپا ەلى – اۋستريا. ءبىر كۇندە 18 427 ناۋقاس انىقتالعان. اۋستريا كانتسلەرى اقپان ايىندا كوروناۆيرۋسقا قارسى مىندەتتى ۆاكتسينالاۋدى ەنگىزۋ جوسپارىن راستادى. كارل نەحاممەردىڭ ايتۋىنشا، ءتيىستى زاڭ جوباسىنىڭ پارلامەنتتىك ساراپتاماسى اياقتالدى. ۇسىنىستاردى ەسكەرە وتىرىپ، قۇجاتتى قابىلداۋ عانا قالدى. «مەنىڭ ويىمشا، مىندەتتى ۆاكتسينالاۋ قاجەتتىلىگى كۇمان تۋدىرمايدى»، دەدى نەحاممەر.

ماجارستان ۇكىمەتى سارسەنبىدە ۆيرۋس جۇقتىرعاندار سانى 5 270-تەن 7 883-كە جەتكەنىن حابارلادى. دەگەنمەن ەلدەگى اۋرۋحانالاردا ەم قابىلداپ جاتقان ناۋقاستار سانى ازايعان. ۇكىمەت دەرەگىنە سۇيەنسەك، ناۋقاستاردىڭ 29 پايىزىنان عانا «وميكرون» شتامى تابىلعان. الايدا جەكە زەرتحانالار بۇل كورسەتكىشتىڭ جوعارى ەكەنىن ايتادى. 10 ميلليونعا جۋىق حالقى بار ماجارستاندا پاندەميا باستالعاننان بەرى 40 مىڭنان استام ادام ۆيرۋستان كوز جۇمدى. قازىرگى تاڭدا 2 758 ناۋقاس اۋرۋحانالاردا ەم الىپ جاتىر، ولاردىڭ 257-ءسى وكپەنى جاساندى جەلدەتۋ اپپاراتتارىنىڭ كومەگىمەن تىنىستاۋدا.

دۇنيەجۇزىلىك دەنساۋلىق ساقتاۋ ۇيىمى ەۋروپالىق ءبولىمىنىڭ باسشىسى حانس كلۋگە الداعى 1،5 ايدا ەۋروپا حالقىنىڭ 50%-دان استامى كوروناۆيرۋستىڭ «وميكرون» شتامىن جۇقتىرۋى مۇمكىن دەيدى. بۇل مالىمدەمەنى ۆاشينگتون ۋنيۆەرسيتەتى دەنساۋلىق كورسەتكىشتەرى مەن باعالاۋ ينستيتۋتىنىڭ بولجامىنا سىلتەمە جاساپ حابارلادى. ول قازىردىڭ وزىندە ەۋروپا مەن ورتالىق ازيانىڭ 50 ەلىندە «وميكرون» ينفەكتسياسى انىقتالعانى تۋرالى حابارلادى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز