پرەزيدەنت • 07 جەلتوقسان، 2021

مەملەكەت باسشىسى رەفورمالار جونىندەگى جوعارى كەڭەستىڭ وتىرىسىن وتكىزدى

61 رەت كورسەتىلدى

پرەزيدەنت قاسىم-جومارت توقاەۆتىڭ توراعالىعىمەن رەفورمالار جونىندەگى جوعارى كەڭەستىڭ كەزەكتى وتىرىسى ءوتتى، دەپ جازادى Egemen.kz اقورداعا سىلتەمە جاساپ.

الەۋمەتتىك قامسىزداندىرۋ سالاسىنداعى رەفورمالاردى ىسكە اسىرۋ جونىندە پرەمەر-ءمينيستردىڭ ورىنباسارى ەرالى توعجانوۆ بايانداما جاسادى. ول الەۋمەتتىك كودەكستىڭ ازىرلەنۋى، زەينەتاقى جۇيەسىنىڭ جاڭعىرتىلۋى تۋرالى ايتتى.

اتالعان ماسەلە بويىنشا پرەزيدەنتتىڭ ەكونوميكالىق دامۋ ماسەلەلەرى جونىندەگى شتاتتان تىس كەڭەسشىسى سەر سۋما چاكرابارتي دە ءوز پىكىرىن ءبىلدىردى.

باياندامانى جانە قاتىسۋشىلاردىڭ پىكىرلەرىن تىڭداعان مەملەكەت باسشىسى پاندەميا الەۋمەتتىك-ەكونوميكالىق دامۋدىڭ پروبلەمالارىن اشىپ كورسەتكەنىن جانە ولاردىڭ شيەلەنىسە تۇسكەنىن اتاپ ءوتتى.

پرەزيدەنت حالىق تابىسىنىڭ ءوسۋ قارقىنى باياۋلاپ، الەۋمەتتىك تەڭسىزدىك ماسەلەسىنىڭ ۋشىعۋى باستى تۇيتكىلدەردىڭ ءبىرى دەپ سانايدى. ونىڭ ايتۋىنشا، بۇكىل الەمدەگىدەي قازاقستاندا دا بيزنەس پەن حالىققا قولداۋ كورسەتۋ ءۇشىن داعدارىسقا قارسى ءارتۇرلى شۇعىل باستامالار مەن شارالار جۇزەگە اسىرىلدى. بۇل تاۋەكەل-قاتەرلەردى ازايتۋعا جانە ەلىمىزدىڭ ەكونوميكالىق احۋالىن تۇراقتاندىرۋعا مۇمكىندىك بەردى.

«ۇكىمەت ءتيىستى شارالاردى قابىلدادى دەپ سانايمىن. پاندەميادان ساباق الىپ، الەۋمەتتىك ساياساتىمىزدى جاڭا جاعدايلارعا جۇيەلى تۇردە بەيىمدەۋىمىز كەرەك. جالپى، ۇسىنىلىپ وتىرعان ماقساتتار مەن مىندەتتەردى قولداي وتىرىپ، ازىرلەنىپ جاتقان الەۋمەتتىك كودەكستىڭ جاڭا «قوعامدىق شارتتىڭ» نەگىزگى بولىگىنە اينالۋى قاجەت ەكەنىن ايتقىم كەلەدى. كودەكس بويىنشا مەملەكەت جاڭارتىلعان الەۋمەتتىك مىندەتتەمەلەردىڭ ورىندالۋىنا كەپىلدىك بەرەدى. الايدا، بارلىق قازاقستاندىق بولاشاعىن ويلاپ، وزدەرىنە جاۋاپكەرشىلىك پەن مىندەتتەمەلەر الا باستاۋى كەرەك. الەۋمەتتىك جاڭعىرۋدىڭ بارلىق قۇرالى ناقتى جۇمىس ىستەپ، ازاماتتار مەن بيزنەس ءۇشىن تۇسىنىكتى بولۋعا ءتيىس»، دەدى پرەزيدەنت.

جيىن بارىسىندا پرەزيدەنتتىڭ ەكونوميكالىق دامۋ ماسەلەلەرى جونىندەگى شتاتتان تىس كەڭەسشىسى سەر سۋما چاكرابارتي مەن قارجى نارىعىن رەتتەۋ جانە دامىتۋ اگەنتتىگىنىڭ توراعاسى مادينا ابىلقاسىموۆا بانك سەكتورىنىڭ دامۋى جانە قۇندى قاعازدار نارىعى تۋرالى ءتيىمدى ماكروەكونوميكالىق ساياسات بويىنشا كونسۋلتاتيۆتىك كوميتەتتىڭ ەسەبىن ۇسىندى.

ۇلتتىق قور مەن بىرىڭعاي جيناقتاۋشى زەينەتاقى قورىن باسقارۋ ستراتەگياسىنىڭ تيىمدىلىگىن ارتتىرۋ جونىندە  ۇلتتىق بانك توراعاسى ەربولات دوساەۆ بايانداما جاسادى. اكتيۆتەردى باسقارۋ ستراتەگياسىن ودان ءارى جەتىلدىرۋ ءۇشىن جاڭا ستراتەگيالىق اللوكاتسياعا كوشۋ، ينۆەستيتسيالىق ۇدەرىسكە ESG فاكتورلارىن ەنگىزۋ، اكتسيالاردىڭ پورتفەلدەرىن حەدجەرلەۋ (نارىقتىق تاۋەكەل-قاتەرلەردەن ساقتاندىرۋ)، سونداي-اق اكتيۆتەردى باسقارۋ ۇدەرىستەرىنىڭ تسيفرلاندىرىلۋىن قامتاماسىز ەتۋ شارالارى ۇسىنىلدى.

ۇلتتىق بانكتىڭ بولجامىنا سايكەس كەپىلدەندىرىلگەن ترانسفەرتتەردىڭ ازايۋىنا بايلانىستى 2022-2030 جىلدار ارالىعىندا ۇلتتىق قورعا تۇسەتىن قارجى كولەمى 20 ميلليارد دوللاردى قۇرايدى. ناتيجەسىندە ۇلتتىق قوردىڭ اكتيۆتەرى 2030 جىلعا قاراي 100 ميلليارد دوللارعا جەتەدى. ونىڭ كەمىندە 50 پايىزى ينۆەستيتسيالىق تابىستان تۇسەدى. 

بيىل رەفورمالار جونىندەگى جوعارى كەڭەس ەل دامۋىنىڭ بارلىق باعىتىن قامتيتىن 20-دان اسا ماسەلەنى قاراستىردى.

جيىن سوڭىندا كەڭەس مۇشەلەرى الداعى 2022 جىلعا ارنالعان جۇمىس جوسپارىن بەكىتتى.

سوڭعى جاڭالىقتار

شابىت پەن شاراپ

ادەبيەت • بۇگىن، 22:13

ديلەتانتتان داۋىرگە دەيىن

ادەبيەت • بۇگىن، 21:57

ەرتەڭ اۋا رايى قانداي بولادى؟

قازاقستان • بۇگىن، 16:20

اندرادەنى مۋنگيا الماستىرۋى مۇمكىن

كاسىپقوي بوكس • بۇگىن، 14:25

ۇقساس جاڭالىقتار