سۇحبات • 27 قازان، 2021

ۇشقىشتار اۋلەتى

971 رەت كورسەتىلدى

موڭعول ەلىندە اۋە كەمەسىن تىزگىندەۋگە قۇشتار قازاق اۋلەتى بار. بۇل اۋلەتتىڭ اۋەلگى ۇشقىشى – شەتەل قازاقتارىنان شىققان العاشقى گەنەرال (1944 ج)، موڭعوليا اۋە كۇشتەرىنىڭ باس قولباسشىسى (1939-1950) جايسانىپ رايىسحان ۇلى ءمۇدارىس بولسا، ەكىنشىسى – ونىڭ ءىنىسى وتستاۆكاداعى پولكوۆنيك تاشتۋان توتەي ۇلى. تاكەڭ 1936 جىلى باي-ولكە ايماعىندا دۇنيەگە كەلگەن. رەسەي فەدەراتسياسى ريازان وبلىسى ساسوۆو قالاسىنداعى اۆياتسيا ۋچيليششەسىن جانە ماسكەۋ تۇبىندەگى گاگارين اكادەمياسىن بىتىرگەن. موڭعولياعا ەڭبەك سىڭىرگەن ۇشقىش (2000 ج). 

سۋرەتتە: گەنەرال جايسانىپ پەن ءىنىسى تاشتۋان. 1962 ج. باي-ولكە.

ءۇشىنشىسى – تاشتۋان اعامىزدىڭ ۇلكەن ۇلى اۋەز. ول – 1963 جىلى باي-ولكە ايماعىندا تۋعان. قازىر MIAT Mongolian Airlines كومپانياسىنىڭ بەلدى ۇشقىشى، Boeing 767-300 ۇشاعىنىڭ ەكيپاج كومانديرى. ومبى ازاماتتىق اۆياتسيالىق ۇشۋ-تەحنيكالىق كوللەدجىن، كەيىن كيروۆوگراد جوعارى ۇشۋ اكادەمياسىن تامامداعان. ءتورتىنشىسى – تاشتۋان قاريانىڭ ءىنىسى بولتايدىڭ بالاسى اسەت. بۇل ازامات قازىر «ەيرباس» ۇشاعىن تىزگىندەپ ءجۇر. بەسىنشىسى – تاكەڭنىڭ كەنجە ۇلى ەسبولات. بۇل بالا اكەسىنىڭ جولىن قۋىپ، ساسوۆو اۆياتسيا ۋچيليششەسىن بىتىرگەن. ۇلىبريتانيا-جاپونيا بىرلەسكەن «يزنەسس» فيرماسىندا Boeing 737-800NG ۇشاعىنىڭ ەكيپاج كومانديرى. بۇل داڭعىل ءالى دە جالعاساتان ءتۇرى بار. تاكەڭنىڭ تۋعان ءىنىسى ءتابىلتاي قاريانىڭ ءبىر نەمەرەسى زامانبەك جۋىقتا ماجارستان ەلىندەگى ازاماتتىق اۆياتسيا وقۋىنا اتتانىپتى. بۇيىرسا، ءبىر اۋلەتتەن التىنشى ۇشقىش شىعادى.

وسى ورايدا، جاسى سەكسەننىڭ بە­سىنە اياق باسىپ وتىرعان، ۇشقىشتار ديناس­تياسىنىڭ كوزى ءتىرى كوشباسشىسى تاشتۋان اعامىزعا حابارلاسىپ، ونلاين سۇحباتتاستىق.

– تاشتۋان اعا، ءسىزدىڭ ۇشقىش بو­لۋىڭىزعا جايسانىپ اعاڭىزدىڭ كو­مەگى تيگەن دەيدى جۇرت. راس پا؟

– راس. مەن ورتا مەكتەپتى ۇلان-باتىر قالاسىندا ءبىتىردىم. ۇزدىك وقىعان بىرنەشە وقۋشىنى كەڭەس ەلىنە وقۋعا جىبەرەتىن بولدى. ىشىندە مەن بارمىن. ماعان ءۇش جوعارى وقۋ ورنىن كول­دەنەڭ تارتتى. ءبىرىنشىسى، لەنينگراد قالا­سىنداعى سپورت ينستيتۋتى. ەكىنشىسى – حا­لىقارالىق شەت تىلدەر ينستيتۋتى. ءۇشىنشىسى – يركۋتسك قالاسىنداعى قۇرى­لىس ينجەنەرى ينستيتۋتى.

ءۇش كۇن مۇرسات بەردى. وسى ۇشەۋىنىڭ ءبىرىن تاڭداۋىم كەرەك. «جارايدى» دە­دىم. سودان اياڭداپ جايسانىپ اعاما كەلدىم. ول كەزدە كوكەمنىڭ بەدەلى سۇم­دىق. موڭعولدار ءتىرى ءتاڭىر تۇتادى. با­رىپ ءجونىمدى ايتتىم. وسىلاي دا وسىلاي. جاكەڭ مەنى تىڭداپ از-ماز وتىردى. «بۇل بولمايدى»، دەدى: «مەن ساعان قازىر حات جازىپ بەرەم. وسى قاعازدى الىپ اۋە قاتىناستارى كوميتەتىنە بار. پولكوۆ­نيك تسەرەندورجعا تىكە كىر!». كوكەمنىڭ بۇيرىعى قاتتى. بۇلتارۋ جوق بىزدە. سو­دان كوميتەتكە بارىپ، باس­تىعىنا كىرىپ، قولىمداعى حاتتى بەردىم.

– حاتتا نە جازىلىپتى؟

– ونى ءوزىم دە بىلمەيمىن. ءسويتىپ تۇرعاندا تاعى بىرەۋلەر كەلىپ، الگىلەر ءوزارا اڭگىمەلەسىپ كەتتى. پولكوۆنيك ايتىپ جاتىر: «مىنا بالا گەنەرال جايسانىپتىڭ باۋىرى ەكەن. اعاسىنىڭ جولىن قۋىپ، ۇشقىش بولعىسى كەلەدى». سوندا ءبىلدىم. جاكەڭ مەنى كەڭەس ودا­عىنا ۇشقىشتار دايارلايتىن وقۋعا جىبە­رىڭدەر دەپ حات جازىپتى ەمەس پە.

قولما-قول كەڭەس ەلىنە ۇشقىشتىڭ وقۋىنا باراتىنداردىڭ تىزىمىنە قوستى دا جىبەردى. قولىما ەكى پاراق قاعاز ۇستاتتى دا: «دەرەۋ اۋەجايعا تارت. باي-ولكەگە اتتاناتىن ۇشاققا وتىر. مىنا ەكى بيلەت بارىپ-قايتاتىن جول شىعىنىڭ. جولىڭ بولسىن! ءۇش اپتادان كەيىن وقۋعا اتتاناسىڭ، كەشىگىپ قالما»، دەپ شىعا­رىپ سالدى.

بۇل قاراڭعىلىقتى قويساڭشى. جا­تاقحاناعا كەلسەم، بىرگە وقيتىن باي-ولكەلىك التى بالا ماشيناعا وتى­رىپ، جازعى دەمالىسقا ۇيلەرىنە جۇرگەلى جا­تىر ەكەن. سودان قىزىعىپ كەتىپ، كۋزوۆ­تىڭ ءبىر شەتىنە قىستىرىلىپ مەن دە وتىرىپ الدىم. ۇشاقتىڭ ەكى بيلەتى قالتادا شاڭ-شاڭ بولىپ جۇك كولىگىنىڭ ۇستىندە كەتىپ بارام. كۇن ىستىق، ماشينانىڭ سۋى قايناپ جۇرمەيدى. قوڭىر شيشاننىڭ (ماشينانىڭ) ىعىندا كولەڭكەلەپ جاتىپ، اسپاندا ۇشىپ بارا جاتقان اپپاق شاعالاداي ۇشاقتارعا قارايمىن. بەس ساعات ۇشىپ ۇيگە جەتىپ باراتىن اداممىن عوي. ەندى كەلىپ قىزىل قۇمدا كەسىرتكەمەن بىرگە تىپىرلاپ جاتىسىم مىناۋ.

– سونىمەن ارىپ-ارشىپ باي-ولكەگە جەتتىڭىزدەر...

– زورعا دەگەندە جەتتىك. قايتاردا جول­دىڭ ازابىنان اۋزىم قۇيىپ قالعان، ءارى قالتامدا بيلەتىم بار بولعاندىق­تان ۇلانباتىرعا جۇرەتىن ۇشاققا كەلىپ شۇبار قاعازىمدى كورسەتتىم. ەكي­پاج باستىعى كورىپ: «مىنانى قاراڭدار، باي-ولكەدەن تاعى ءبىر جايسانىپ شىعا­تىن بولدى»، دەپ كۇلدى. كەشىكپەي رەسەي­دىڭ جاسىل ورمانىن بەتكە الىپ تارتىپ وتىردىم.

– ءسويتىپ، رەسەيگە ۇشقىشتىڭ وقۋى­­نا كەلدىڭىز؟

– ريازان وبلىسىنا قاراستى ساسوۆو دەگەن شاعىن قالا بار. وسىنداعى ازا­مات­تىق اۆياتسيا ۋچيليششەسىنە 10 بالا وقۋعا كەلدىك. مەن عانا قازاق، قالعان­دا­رى موڭعول. جەرگىلىكتى حالىق موڭ­عول دەيتىن ەلدىڭ بارىن دا بىلمەيدى ەكەن. ءبىزدى «قىتايلىقتار» دەپ قابىلادى. ءۇش جىل وقىدىق.

جازدا تەوريا، قىستا ۇشىپ-قونۋ تا­­جىريبەسىن جاسايمىز. قاراشا ايىن­دا 10 كۇنگە دەمالىس بەرەدى. ونىڭ 3-4 كۇنى پويىزدا كەتەدى. باي-ولكە­دەگى ۇيى­مە كەلىپ، ەكى-اق كۇن قونىپ قايتا جولعا شى­عامىن. شەشەم جارىقتىق جاي­سا­نىپ­تى جازعىرادى: ء«وزى قاڭعىر­عانىمەن قوي­ماي، بالامدى دا قاڭعىرتىپ ورىستىڭ ۇشقىش وقۋىنا جىبەردى، بۇل دا ورىس­تان قاتىن اكەلە مە كىم ءبىلسىن...»، دەپ ەڭىرەيدى.

– رەسەيدەن ازاماتتىق اۆياتسيانىڭ وقۋىن ءبىتىرىپ كەلگەن سوڭ العاش ۇشاق­قا وتىرىپ، اسپانعا كوتەرىلگەنىڭىز ەسىڭىزدە مە؟

– وقۋدى 1960 جىلى ءبىتىرىپ ۇلان­با­تىرعا كەلدىك. بىزگە دەرەۋ اسكەري شەن بەردى. ءدال وسى جىلى باي-ولكە ايما­عىنىڭ ورناعانىنا 20 جىل تولىپ، ۇلكەن توي بولعالى جاتىر ەكەن. تويعا ورتا­لىق­ پارتيا كوميتەتىنەن ادامدار بارىپ سىي-سىياپات جاسايدى دەپ «يل-14» ماركالى ليۋكس ۇشاعىن دايىنداپ قويىپتى. باس­تىقتار الگى ۇشاقتىڭ تىزگىنىنە مەنى وتىر­عىزىپ، باي-ولكەگە قاراي سامعاتىپ قويا بەردى. وسىلاي ۇشقىش بولىپ شىعا كەلدىم.

– ال ەندى ۇشقىش بولعاننان كەيىنگى حيكايالارىڭىزدى ايتا وتىرىڭىز؟

– ول زاماندا باتىس ءۇش ايماق – قوب­دا، ۋبسى، باي-ولكەنىڭ ورتاسىنا ار­­­نايى ءبىر ۇلكەن ۇشاق قاتىنايدى. ول قوبدا­­عا تۇسەدى. ۇلانباتىردان قوبداعا كەل­گەن جولاۋشىلاردى باي-ولكەگە تاسيتىن شاعىن، 14 كىسىلىك «ان-2» ۇشاعىم بار. كۇن­دە تاڭەرتەڭ تەپەڭدەپ قوبداعا با­رامىن. جولاۋشىلاردىڭ قورجىن-قوس­پا­­عى مەن پوشتامدى سالىپ الىپ، تىرىل­­دا­تىپ جان-جاققا شابامىن. وسىلاي 9 جىل جۇمىس ىستەدىم. باي-ولكەنىڭ جىق­­پىل-جىقپىل شىڭ-قۇزدارىن جاتقا بىلە­­مىن. ساي-سايدى قۋالاپ تارتىپ وتىرام. ءبىز­دىڭ ەلدىڭ تاۋلارىنان بۇلتتىڭ ءوزى اسا المايدى. شۋدا سياقتى باسىنا بايلانىپ تۇرادى. مەن بولسام، قاق جارىپ تار­تا بەرەم. باسقا باسقا، جايلاۋدا وتىر­عان ءوز اۋىلىم ۇستىنە كەلىپ، كيىز ءۇيدىڭ مۇرجالارىن جاناي ۇشام. جەلىدەگى قۇ­لىندار ۇركىپ، جەلى-باۋ ءۇزىلىپ قىرعىن بو­لىپ قالادى.

– ءسىز سياقتى تاجىريبەلى ۇشقىشتى ورتالىققا شاقىرعان جوق پا؟

– ورتالىق مەنى ارقامنان قاعىپ جاتىپ كەپ ماقتايدى. سەبەبى تاۋلى ولكەدە ۇشاتىن تاجىريبەلى ۇشقىش از. ولار: «تاكە، ءسىز بولماساڭىز قىرىلىپ قالامىز»، دەيدى. ء«تۇبى قايىرلى بولسىن» دەپ جۇرە بەردىم.

 – ءبىز بالا كەزىمىزدە: «تاشتۋان سامو­لەتىن موڭكۋ-قايىرحان شىڭىنىڭ ۇشار باسىنا قوندىرىپتى» دەگەن اڭىز ەستۋشى ەدىك، شىندىعىندا سونداي بىر­دەڭە بولىپ پا ەدى؟

– ە..ە، بۇل 1967 جىلدىڭ ەڭ سوڭعى كۇنى بولعان وقيعا. ەل جاڭا جىلعا دايىن­دالىپ جاتقان. ايماق ورتالىعىنان الىس، بۇلعىن سۇمىنىنا تاڭەرتەڭ ءبىر با­رىپ كەلدىم. تۇستەن كەيىن قايتا ۇش­تىم. قايتاردا كۇن كەشكىرىپ، مەن جەت­كەنشە قاراڭعى تۇسەتىن ءتۇرى بار. جا­رىقتا اۋەجايعا جەتە الاتىن ەمەسپىن. ۇكى­مەت بەكىتىپ بەرگەن ارنايى جولمەن عانا ۇشۋعا ءتيىسپىز. قىسقاسى، بەكىتكەن جول­دى تاستادىم دا توتەلەپ تارتتىم. تەڭىز دەڭگەيىنەن 4300 مەتر بيىك موڭ­كۋ-قايىرحان دەيتىن شىڭ بار ەدى، الگىنى بوكتەرلەپ تارتىپ كەلەم. سالوندا جال­عىز جولاۋشىم بار. ۇيدە وتىن جوق. بۇل­عىننان ءتورت قاپ سەكسەۋىل تيەپ العام. ءبىر زا­مان­دا بىقسىعان ءتۇتىن ءيىسى شىقتى. كابي­نانى ىستىق جالىن كەۋلەپ كەتتى. ال­دىڭعى تەرەزەدەن تۇك كورىنبەيدى. ەندى نە ىستەۋ كەرەك؟

بۇرىن ارى-بەرى وتكەندە بايقاپ جۇ­رە­مىن، ىلديلاپ تۇسەتىن شاعىن جازىق تەپ­سەڭ بار ەدى، سونى مولشەرلەپ ۇشاقتى تومەن قاراي سىرعىتتىم. ءبىر زاماندا دوڭ­گەلەگى جەرگە ءتيدى-اۋ، توقتاي الماي زىر­لاپ كەلەم... تۇياعى ۇلكەن تاسقا تىرە­لىپ، ۇشاعىم توقتاپ قالدى. ءتۇسىپ قاراسام، ۇشاقتىڭ سىرتى ماي شاشىراپ ساتپاقتانىپ قالعان. سالونعا كىرسەم، الگى جالعىز جولاۋشىم ەستەن تانىپ، قۇلاپ قالىپتى. ء«اي، ولگەن جوقسىڭ، ءتىرىسىڭ!»، دەپ ونى تۇرعىزىپ الدىم. يەن دالا، قۇز تاۋدىڭ بوكتەرىندە ەكى قازاق پەن ءبىر ۇشاق قار جاستانىپ، مۇز توسەنىپ تۇردىق تا قالدىق.

– سودان...

– سودان ارەكەتكە كوشتىك. مەن كا­بيناعا وتىرىپ الىپ، ۇشاقتى تومەن سىرعىتتىم. قاسىمداعى جولاۋشى ۇشاق­تىڭ الدىنا ءتۇسىپ الىپ جاياۋ جۇگىرىپ وتىردى. ورما قۇز، تەرەڭ جىرا كەزىكسە ەسكەرتەدى. ءسويتىپ، جورعالاپ وتىرىپ ءولدىم-تالدىم دەگەندە ەتەككە تۇستىك.

– ۇشاققا نە بولىپتى؟

– موتورعا ماي ايدايتىن شلانگى جا­رى­لىپ كەتىپتى. ەتەككە تۇسكەن سوڭ را­تسيا ارقىلى ورتالىققا حابار بەردىم. تاڭ اتقانشا اينالانىڭ تاسىن تەرىپ «اەرودروم» جاساپ شىقتىق. ەرتەڭىندە، قاجەتتى بولشەك-سايماندى الىپ ەكىنشى ۇشاق كەلدى. ۇشقىش قونا الماي، ابدەن يت اۋرەسى شىقتى. راتسيا ارقىلى ءايت-ءبۇيت دەپ ءجۇرىپ زورعا قوندىردىق.

– قايتا ۇشقاندا قيىندىق بولمادى ما؟

 – اكەلگەن سايماندى سالدىم دا، ۇشاقتى گۇر ەتكىزىپ وت الدىرىپ، سايدى قۋالاي جۇگىرىپ كوتەرىلىپ كەتتىم. ەكىنشى ۇشاقتىڭ ۇشقىشى ۇشا الماي تۇرىپ قالدى. راتسيامەن بايلانىسقا شىعىپ، جول كورسەتىپ تە قايران بولمادى. سودان ءوز ۇشاعىمدى جازىققا قوندىرىپ، قوي قايىرىپ جۇرگەن شوپان بالانىڭ اتىن سۇراپ الىپ، شاۋىپ وتىرىپ كەلىپ، ەكىن­شى ۇشاقتى الىپ شىقتىم.

وسى وقيعادان كەيىن مەنى ورتالىقققا شاقىردى. ۇلانباتىرعا بارعان سوڭ «ان-24» ۇشاعىنا وتىرعىزدى. بۇل – 1968 جىل. ءبىر جىلدان كەيىن ورتالىق پارتيا كوميتەتى گاگارين اتىنداعى اسكەري ۇش­قىشتار اكادەمياسىنا جىبەردى. وقۋعا 3 ادام باردىق. ءبىزدى يسترەبيتەل ۇش­قىشى ەتىپ دايارلاپ شىعاردى.

– بىراق ءسىز وقۋ بىتىرگەن سوڭ اسكەري ۇتقىر ۇشاقتىڭ تىزگىنىن ۇستاعان جوق­سىز. وعان نە سەبەپ؟

– وقۋ ءبىتىرىپ كەلگەن سوڭ، دەنساۋ­لىعىما بايلانىستى ۇتقىر ۇشاققا وتىرۋدان باس تارتۋىما تۋرا كەلدى. سول سەبەپتى، ازاماتتىق اۆياتسياداعى قىز­مەتىمدى جالعاستىردىم.

– 80-جىلداردىڭ باسىندا ارنايى تاپسىرمامەن اۋعانستانعا ءجيى ۇشىپ بارىپ تۇردىڭىز...

– اۋعانستانعا جۇك تاسىدىق. كوبى – ازىق-ت ۇلىك، كيىم-كەشەك. ۇلانباتىردان ۇشىپ يركۋتسك، ءنوۆوسىبىردى باسىپ ءوتىپ، الماتىعا تۇسەمىز. ودان تاشكەنتكە بارامىز. وندا ماسكەۋدە ارنايى دايار­لىقتان وتكەن ادامدار كۇتىپ وتىرادى. سولاردى كابيناعا سالىپ الامىز. ولار جول-جونەكەي اۋعان جانە اعىلشىن تى­لىندە سويلەپ، ءبىزدى كابۋلمەن بايلانىس­تىرادى.

كابۋلعا ءتۇسۋ قيىن. قالانىڭ قاق تو­بەسىنە دەيىن 3،6 مىڭ مەتر بيىكتىكتى ۇستاپ ۇشامىز. ودان تومەندەسەڭ، تاۋعا بەكىنگەن جاۋ راكەتاسى قاعىپ تۇسىرەدى. سول سەبەپتى، تۋرا قالانىڭ توبەسىنە كەلىپ الىپ، 3،6 مىڭ مەتر بيىكتەن شىر اينالىپ، شەڭبەر جاساپ قۇلديلاپ تۇسەمىز. قايتا ۇشقاندا دا سولاي، كابۋلدى ءۇش اينالىپ ۇشاقتى ىشقىندىرىپ تارتىپ وتىرام...

– ايتپاقشى، سوناۋ ءبىر جىلدارى مۇساحان قاماتجان ۇلى دەيتىن قاي­رات­كەر قازاقتى قاتتى ناۋقاس ۇستىندە ۇلان­باتىردان الىپ ۇشىپ، ەلگە امان جەت­كىزگەنىڭىز جايلى اعا بۋىن اقسا­قال­­دار اڭىز قىلىپ ايتىپ وتىرۋشى ەدى...

 – مۇساحان مارقۇم – كوپ جىل باي-ولكە ايماعىن باسقارعان ادام. وسى كىسى قاتتى سىرقاتتانىپ، ۇلانباتىرعا ەمدەلۋگە كەپتى. سودان دەنساۋلىعى ناشارلاپ، انە-مىنە ءجۇرىپ كەتۋگە شاق تۇرادى. ەل باسقارعان سالاماتتى تۇلعا قالىڭ موڭعولدىڭ ىشىندە جان تاپسىرسا، سۇيەككە تاڭبا. قالاداعى وقىعان ­قازاقتار وسىلاي دەگەن سوڭ، اناۋ-مىناۋ جوق، حال ۇستىندە جاتقان مۇساحان اعانى سالىپ الىپ باي-ولكەگە تارتىپ وتىردىم. ۇشاعىم جاقسى، جاڭا ەدى. 50 كىسىلىك «ان-26» بولاتىن. جولاي باي-ولكەدەگى اۋەجاي كەزەكشىسىنە حابارلاسسام ايتادى: «ەشقانداي ۇشاقتى قابىلداۋعا مۇمكىندىك جوق، اۋا رايى جامان. جاڭا عانا ءبىر ءۇيىر سيىرعا جاي ءتۇسىپ قىرىلىپ قالدى. كەلۋشى بولما!».

ونى ەلەپ جاتقان مەن جوق، باي-ولكەنى بەتكە الىپ، تارتىپ كەلەم. تاياپ كەلىپ تاعى حابارلاسسام، كەزەكشى بەت قاراتپايدى. سودان قازاقشالاپ: ء«اي، امانباي، سالوندا مۇساحان اعا كەلە جاتىر. اۋىر ناۋقاس ءولىپ كەتۋى دە مۇمكىن، ءتۇسۋىم كەرەك»، دەدىم. امانباي جاۋاپ بەرۋگە ءداتى جەتپەي، بايلانىستى ءۇزىپ جى­بەردى. ماعان تۇسۋگە رۇقسات بەرسە، با­سى كەتەدى.

ولگەي قالاسىنىڭ ۇستىنە تاياپ كەلسەم، شىنىندا قونۋعا مۇمكىندىك جوق ەكەن. «شىڭدى بەل» دەيتىن بيىك اسۋعا كەلىپ، ۇشاعىمدى ەڭكەيتىپ قاراسام، اۋدەم جەردە ولگەيىم جىمىڭداپ تۇر. اۋەجايدىڭ باتىس جاعىنان كەلدىم دە، توپ ەتىپ قونا قالدىم. ۇشاق جەرگە قونعان سوڭ، كىرپىگى قىبىرلاپ جاتقان مۇسەكەڭ كوزىن اشتى. سىرتقا شىعىپ، قارا توپىراعىن جاتا قالىپ يىسكەدى. كوپ كەشىكپەي دۇعاسىن ايتىپ باقيلىق الەمگە اتتانىپ كەتە بەردى.

– سوناۋ ءبىر جىلدارى باي-ولكە­گە قوناققا كەلگەن جازۋشى ءسابيت مۇ­قا­نوۆ­تى ۇشاققا وتىرعىزىپ الىپ، نو­عو­نۇر دەگەن اۋىلعا تويعا بارعان ەكەن­سىز...

– ءيا، بۇل سول «ان-2» ۇشاعىن باس­قارىپ جۇرگەن كەزىم عوي. 1967 جىلى اتاق­تى جازۋشى ءسابيت مۇقانوۆ بايان-ولكە­گە كەلدى. ايماق باسشىلارى تارا­پى­نان: «سابەڭدى نوعونۇر اۋىلىنا ۇشاق­پەن جەتكىزەسىڭ!» دەگەن تاپسىرما ءتۇستى. «تاۋەكەل!» دەپ، سابەڭدى سالىپ الىپ تارتىپ كەتتىم. اۋىلدىڭ باس جا­عىن الا، كەڭ جازىقتى قولايلاپ الدىم دا، ۇشاقتى جايلاپ قوندىردىم. شاپقىلاپ جەتىپ، قاۋمالاپ العان ەلدىڭ تاڭدانىسىندا شەك جوق. بۇل – نوعونۇرعا تۇسكەن العاشقى ۇشاق ەدى. قازاقتىڭ ۇلى جازۋشىسى سابەڭە قىزمەت كورسەتكەن تاريحىم وسى.

 

اڭگىمەلەسكەن:

بەكەن قايرات ۇلى،

«Egemen Qazaqstan»

سوڭعى جاڭالىقتار

حاتتوننىڭ ۇلى اتتيلانى اتىنان ءتۇسىردى

كاسىپقوي بوكس • بۇگىن، 10:35

جەكپە-جەكسىز وتكەن العاشقى جىل

كاسىپقوي بوكس • بۇگىن، 09:08

«دينامودان» جەڭىلدى

حوككەي • بۇگىن، 07:34

كرەاتيۆتى كىتاپ دۇكەنى

ايماقتار • بۇگىن، 07:33

جانبوتا جاراپ تۇر

سپورت • بۇگىن، 07:27

اقىن تۇتىنعان كەسە

تاريح • بۇگىن، 07:24

ۇلى جامبىل مۇراسى ۇلىقتالدى

رۋحانيات • بۇگىن، 00:33

ۇقساس جاڭالىقتار