ايماقتار • 20 قازان، 2021

ءىرى ينۆەستورلار ىلكىمدى ءىس باستاۋىندا

34 رەت كورسەتىلدى

جاقىندا الماتى وبلىسىنىڭ اكىمى اماندىق باتالوۆ وڭىردە اۋقىمدى جوبالارىن ىسكە اسىرۋعا نيەتتى جانە جۇزەگە اسىرا باستاعان ءىرى ينۆەس­تورلارمەن كەزدەستى.

كەزدەسۋ بارىسىندا ايماق باسشى­سى جاڭبىرلاتىپ سۋارۋ جۇيەسى قۇ­رىل­عىلارىن وندىرەتىن Valley Kusto GB BV كومپانياسىنىڭ، جىلۋ وق­شاۋ­لا­عىش قۇرىلىس ماتەريال­دا­رىن شى­عا­رۋعا ماماندانعان «تەحنو­نيكول» كوم­پانياسىنىڭ، ۇساق مال ەتىن وڭدەيتىن «باۋمانن» نەمىس كوم­پا­نياسىنىڭ Zhetysu Koy جشس وكىل­دەرىمەن جوبانى ىسكە اسىرۋ ماسەلەسىن ەگجەي-تەگجەيلى تالقىلاپ، ءىستى ودان ءارى ىلگەرىلەتۋگە قا­تىستى سالا باسشىلارىنا ءتيىستى تاپسىرمالار بەردى.

كەزدەسۋگە پرەمەر-ءمينيستردىڭ كە­ڭەسشىسى گۇلبانۋ پازىلحايروۆا قا­تىستى. وبلىس اكىمى اماندىق باتالوۆ جەتىسۋ سۋلى ولكە بولعانىمەن ىلعال ساقتاۋ تەحنولوگياسىنىڭ شارۋاشىلىق پەن وندىرىسكە اسا قاجەت ەكەنىن ايتتى. سوندىقتان جوبانى جان-جاقتى قولداۋعا، مەملەكەت تاراپىنان كورسە­تىلۋگە ءتيىس جاردەمدى جاساۋعا ءازىر ەكەندىگىن ءبىلدىردى.

Valley Kusto GB BV كومپا­نيا­سىنىڭ جوباسى جايلى «Valmont Industries» كومپانياسىنىڭ تمد ەل­دەرى بويىنشا باس ديرەكتورى كەۆين ميش قىسقاشا ايتىپ بەردى. ول كوم­پانيانىڭ قازاقستانعا زاۋىت سالۋعا مۇددەلى ەكەنىن جەتكىزدى.

– ءبىز بۇگىنگە دەيىن ەلدەگى نارىقتى جان-جاقتى زەرتتەدىك. قازىر ءبىزدىڭ كوماندا وسى زاۋىت جوباسىنىڭ دامۋ جوس­پارىن ازىرلەپ جاتىر. زاۋىتتى قاي يندۋستريالدى ايماققا ورنالاستىر­عان ءتيىمدى بولاتىنى ازىرگە قاراستىرى­لۋ­دا. جاقىن ارادا ءبىر شەشىمگە كەلەمىز دەپ ويلايمىن. مەملەكەت تاراپىنان قارجىلىق، ليتسەنزيالىق ماسەلەلەر­دى شەشۋ جاعىنان قولداۋ كورسەتىلىپ وتىر، – دەپ اتاپ وتكەن ك.ميش وبلىس باسشىسىنىڭ جىلى قابىلداۋى مەن قولداۋىنا نيەتىنە ريزاشىلىعىن جەتكىزدى. سول سياقتى كومپانيا ءوز ما­مان­دارىنىڭ بىلىكتىلىگى جوعارى بول­عانىن قالايتىندىقتان، جەرگىلىكتى ازاماتتاردى وقىتىپ، ۇيرەتىپ، جۇمىسقا قابىلدايتىن بولادى.

ءوز كەزەگىندە ءوڭىر باسشىسى الماتى وبلىسىنىڭ ەرەكشەلىگىنە توقتا­لىپ، رەس­پۋبليكا كولەمىندەگى اۋىل شارۋا­شىلىعى ءوندىرىسىنىڭ 18-20 پايىزى جەتىسۋ وڭىرىنە تيەسىلى ەكەنىن ايتتى. يرريگاتسيالىق جەلىلەر بۇل وڭىردە 17 مىڭ شاقىرىمعا سوزىلىپ جاتقانىن تىلگە تيەك ەتتى.

– ماسەلەن، قانت قىزىلشاسى بيىل 16 مىڭ گا جەرگە سەبىلسە، الداعى ۋاقىت­تا پرەزيدەنتتىڭ تاپسىرماسىمەن ونى 52 مىڭ گەكتارعا جەتكىزىپ، 2 ملن توننا قانت قىزىلشاسىن ءوندىرۋ مەجەلەنىپ وتىر. وسى جانە باسقا دا داقىلداردى وسىرۋدە سۋ قورىن ۇنەمدى پايدالانىپ، جاڭا تەحنولوگيالاردى ەنگىزۋىمىز كەرەك. سوندا سۋ ۇنەمدەپ قانا قويماي، ونىمدىلىك كولەمىن 3-4 ەسە كوتەرە الامىز، – دەدى وبلىس اكىمى.

سول سياقتى ءوڭىردىڭ قىتايمەن شەك­تەسىپ جاتقانى دا لوگيستيكالىق جا­عىنان مول مۇمكىندىك بەرەتىنىن ەسكە سالدى. جانە زاۋىتقا قاجەتتى بار­لىق گاز، سۋ، ەلەكتر، جول سەكىلدى ينفرا­قۇرىلىمداردى نىسانعا دەيىن وبلىس تارتىپ بەرەتىنىن ايتتى. سونىمەن جاقىن ارادا قوس تاراپ جوبانى جان-جاقتى تالقىلاپ، ەگجەي-تەگجەيىن ناقتىلاۋعا كىرىسپەك.

مۇنان كەيىن وبلىس باسشىسى رە­سەي­لىك «تەحنونيكول» كومپانيا­سىنىڭ وكىلدەرىمەن بىرنەشە ماسەلەنى تالقىلادى. «تەحنونيكول-ورتا­لىق ازيا» جشس باس ديرەكورى نياز سۋلەيمانوۆ جوبانى ىسكە اسىرۋ با­رىسىنداعى شەشىمىن كۇتكەن ماسەلەلەر جايلى باياندادى. جىلۋ وقشاۋلايتىن قۇرىلىس ماتەريالدارىن وندىرەتىن زاۋىت جوباسىنا 43 ملرد تەڭگە ينۆەستيتسيا سالىنىپ وتىر، مۇندا 200 جۇمىس ورنى قۇرىلادى. تالعار اۋدا­نىنداعى «قايرات» يندۋستريالدى ايما­عىندا ورنالاساتىن جوبانىڭ ىسكە اسى­رىلۋى بارىسىندا ينۆەستور «جەتىسۋ» اكك-مەن تىعىز بايلانىس ورناتۋ تىلەگىن جەتكىزدى. مەملەكەتتىك ساراپ­­تامادان وتكىزۋ مەرزىمىنىڭ جىلدام ءجۇرۋى دە جو­بانى ىسكە اسىرۋدا ماڭىزدى. سون­دىق­تان وعان دا ءمان بەرىلمەك. ونەر­كاسىپ گاز كولەمىن كوپ تۇتى­ناتىن­دىقتان، گاز اۋقىمىن مول الۋعا، ەلەكتر جەلى­سىنە رۇقسات قاعازدارىن رەتتەۋگە دە جەر­گىلىكتى اكىمدىكتىڭ قولداۋى قاجەت.

ءوز كەزەگىندە وبلىس اكىمى ا.باتالوۆ زاۋىتتىڭ اينالاسىن اباتتاندىرۋ، كوگال­داندىرۋ ءىسىن نازاردان تىس قال­دىرماۋ كەرەكتىگىن ايتتى. سونىمەن قا­تار وبلىس اكىمىنىڭ ءبىرىنشى ورىنباسارى ل.تۇرلاشوۆقا الداعى اپتادا سۋ، گاز، ەلەكتر، بايلانىس، تەمىر جول سياقتى ما­ڭىزدى سالالارداعى مونوپوليستەردى جيناپ جيىن وتكىزۋدى جانە ولاردى ء«بىر تەرەزە» قاعيداتى بويىنشا ينۆەس­توردىڭ بارلىق ماسەلەلەرىن شەشىپ بەرۋگە جۇمىلدىرۋدى تاپسىردى.

كەلەسى كەزەكتە وبلىس اكىمىمەن كەزدەسۋگە «باۋمانن» كومپانياسىنىڭ Zhetysu Koy جوباسىنا قاتىستى ينۆەس­تورلار كەلدى. پرەزيدەنت قاسىم-جومارت توقاەۆتىڭ تاپسىرماسىمەن جو­بانى ىسكە اسىرۋعا بارلىق مۇم­كىن­دىك جاسالۋدا. زاۋىتتىڭ ورنالاساتىن جە­رىنە قاتىستى تۋىنداعان كەيبىر ماسە­لەلەر وسى ارادا بىردەن شەشىمىن تاپتى. ىلە اۋدانى اۋماعىندا ورنالاساتىن، ۇساق مال ەتىن وڭدەيتىن، جاڭا تەحنولوگيامەن جۇمىس ىستەيتىن بۇل تەڭدەسسىز كاسىپورىننىڭ وبلىس، ءتىپتى ەل ەكونوميكاسى ءۇشىن ماڭىزى ەرەكشە بولماق.

سول سياقتى ەسكەلدى اۋدانىنان «دۇي­­سەنبينوۆ» جانە «نام» شارۋا قو­­جا­­­لىقتارىنىڭ جەتەكشىلەرى ايدىن دۇي­سەنبينوۆ پەن نيكولاي گەر­مان ەكى جوبا ۇسىنىپ، مەملەكەت تارا­پى­نان قولداۋ بولسا، ءبىرى 200 باس­قا ار­نالعان ءىرى تاۋارلى ءسۇت فەر­ما­سىن، ەكىن­شىسى ماۋسىمارالىق مەر­زىمدە كو­كو­نىستەردى ساقتايتىن جاڭا تەح­نولو­گيانى قولدانا وتىرىپ، قويما اشۋعا نيەتتى ەكەندەرىن ايتتى. بۇل ىستە ولار «جەتىسۋ» الەۋمەتتىك كاسىپكەرلىك كور­پوراتسياسىنىڭ قولداۋىنا جۇگىن­بەك.

وسى جيىندا ا.باتالوۆ 2014 جىلى وبلىستا ءسۇت ءوندىرۋ نەبارى 14-15 پا­يىز شاماسىندا بولعانىن، قازىر وسىنداي شارۋاشىلىقتاردى قولداۋ ارقىلى ونىڭ كولەمى 30 پايىزعا جەتكەنىن اتاپ ءوتتى. ماۋسىمارالىق كەزەڭدە كوكونىس باعاسىن ىرىقتاندىرۋعا جانە ءونىم تاپشىلىعىن بولدىرماۋعا ىقپال ەتە­تىن زاماناۋي قويما سالۋ ءىسى دە قولداۋعا تۇرارلىق ەكەنىن جەتكىزدى. پانفيلوۆ اۋدانىندا جۇگەرىگە ارناپ ەكى قىرمان سالىپ، ءونىمنىڭ توبەسى جابىق ورىندا ساقتالۋىنا مۇمكىندىك جاسالعانى قازىر شارۋاشىلىققا ءوزىنىڭ وڭ اسەرىن تيگىزگەنىن ەسكە سالدى.

سوڭعى جاڭالىقتار

جەكپە-جەكسىز وتكەن العاشقى جىل

كاسىپقوي بوكس • بۇگىن، 09:08

«دينامودان» جەڭىلدى

حوككەي • بۇگىن، 07:34

كرەاتيۆتى كىتاپ دۇكەنى

ايماقتار • بۇگىن، 07:33

جانبوتا جاراپ تۇر

سپورت • بۇگىن، 07:27

اقىن تۇتىنعان كەسە

تاريح • بۇگىن، 07:24

ۇلى جامبىل مۇراسى ۇلىقتالدى

رۋحانيات • بۇگىن، 00:33

ۇقساس جاڭالىقتار