ايماقتار • 19 قازان، 2021

ورتالىقتاندىرىلعان جىلۋ جۇيەسىنە قوسىلدى

56 رەت كورسەتىلدى

بالقاش قالاسىنىڭ ىرگەسىندەگى قوڭىرات شاعىن اۋدانىنىڭ ەجەلدەن كەلە جاتقان وزەكتى ماسەلەسى بار-تىن. بۇگىنگە دەيىن اتالعان ەلدى مەكەننىڭ تۇرعىندارى ۇيلەرىن ەسكىرگەن قازاندىقپەن جىلىتىپ كەلگەن ەدى. قازاندىق قۋاتىنىڭ جەتىسپەۋشىلىگىنە بايلانىستى ءار جىلىتۋ ماۋسىمىندا قوڭىراتتىقتار سۋىقتان قاتتى زارداپ شەگەتىن.

ەندى بۇل شاعىن اۋدان جىلۋدى بالقاش جىلۋ-ەلەكتر ستانساسىنان تىكەلەي الادى. بۇل ماق­سات­تا بيىل اتالعان جەو-دان ۇزىن­دىعى 17 شاقىرىم بولاتىن جاڭا جىلۋ ماگيسترالى تارتىلىپ، قازىردىڭ وزىندە الەۋمەتتىك نىسان­دار مەن العاشقى 145 ءۇي ورتا­لىق­تاندىرىلعان جىلۋ جۇ­يە­­سىنە قوسىلدى.

جىلۋ ماگيسترالىنىڭ «جۇ­مىس­پەن قامتۋدىڭ جول كارتاسى» مەملەكەتتىك باعدارلاماسى بو­يىنشا سالىنعانىن ايتا كەتكەن ءجون. مۇنداعى ءتورت سورعى ستان­ساسىندا 20-عا جۋىق جاڭا جۇ­مىس ورنى اشىلعان.

جالپى، جىلۋمەن بىرگە قو­ڭىرات­قا الەۋمەتتىك تۇرعى­دا­عى باسقا دا يگىلىكتەردىڭ كەلە باس­تا­عانى راس. مىسالى، ەلدى مەكەندە الداعى ۋاقىتتا جاڭا تۇرعىن ۇيلەر سالىنا باستايدى. ناقتىراق ايتقاندا، 300 پا­تەردەن تۇراتىن التى ءۇي بوي كو­تەرمەك.

بۇدان بولەك، قوڭىراتتا قازىردىڭ وزىندە «نۇرلى جەر» باعدارلاماسى بويىنشا جەكە ينۆەستيتسيالار ەسەبىنەن ارقاي­سى­سى ەكى پاتەردەن تۇراتىن تو­عىز ءۇيدىڭ قۇرىلىسى ءجۇرىپ جا­تىر. سونىمەن قاتار 20 پات­ەرلىك ون ءۇيدىڭ قۇرىلىسى دا اياق­­تالۋعا تاياۋ. جەرگىلىكتى بيلىك بۇل پاتەرلەردىڭ كەزەكتە تۇرعان­دار­عا جالعا الۋ شارتىمەن بەرى­لە­تىنىن ايتادى.

قوڭىرات شاعىن اۋدانىنىڭ ورتالىقتاندىرىلعان جىلۋ جۇ­يە­سىنە قوسىلۋى اۋماقتىڭ ەكو­لو­گي­ياسىنا دا وڭ اسەرىن ايتار­لىقتاي تيگىزەدى دەگەن بولجام بار. ماسەلەن، بۇرىن جىلىتۋ ماۋ­سىمىندا كومىر جاعاتىن جەرگ­ى­لىكتى قازاندىقتاردان قىز­مەت كورسەتۋ كەزىندە اتموسفەراعا شا­مامەن 51 توننا زالالدى شىعا­رىندىلار تارايتىن. ەندى جاعداي مۇلدە باسقاشا سيپات الىپ، اۋا ۋلى قالدىقتارمەن لاستانبايتىن بولادى دەگەندى ايتا­دى جەرگىلىكتى بيلىكتىڭ جاۋاپتى وكىلدەرى.

قوڭىرات ەلدى مەكەنىنىڭ قا­بىر­­عاسى 1928 جىلى وسى ماڭ­نان ءىرى مىس كەنىشى اشىل­عان­نان كەيىن ىلە-شالا قالانعان. ال 2013 جىلى ول بالقاش قالاسىنىڭ قۇرامىنا قوسىلىپ، شاعىن اۋدان رەتىندە اتالا باستادى. ەكى جىل بۇرىنعى ساناق مالىمەتىنە ساي مۇندا 2 753 ادام تۇرادى.

سوڭعى جاڭالىقتار

ۇقساس جاڭالىقتار